زبانحال حضرت زهرا (س)
..
..
..
..
احمدی جوان
..
..
..
..
گل عم اوغلی یا علی زهرا بو دنیادن گیدور
شکر لِله دینجلوبدور ظلم اعدادن گیدور
..
..
..
..
چوخ یوبانما قورتاروب عمریم داخی جان اوستیم
باشیم اوسته گل اوتور ای شهریار محترم
سایه ن اولسا قابض الارواحدن باک ایتمرم
مرغ روحی پر ویروبدور جسم زهرادن گیدور
..
..
..
..
یاندی قلبیم سوز غمدن اولدی آتش پاره سی
باشیمی آل سینوه ای چاره سیزلر چاره سی
سینمون بلکه بیر آز دینجلسون آهن پاره سی
زخم مسماریله دوشدی فاطمه پادن گیدور
..
..
..
..
بوندان آرتوخ جور و ظلمه یوخدی زهراده دؤزوم
بیله ساعت آختاروردی دائماً آغلار گؤزوم
واردی قلبیمده ولکن یاعلى گیزلین سؤزوم
آیریلور زهرا دریغا شاه والادن گیدور
..
..
..
..
قورتولوب عمریم حسینیله حسندن دویمادیم
زینب کبرا کیمی شیرین سخندن دویمادیم
بلبل شوریده تک باغ و چمندن دویمادوم
عندلیب پر شکسته باغ طاهادن گیدور
..
..
..
..
بی وفا أمّت الیندن باغریم اولدی لخته قان
زلفیمی غملر آغارتدی قامتیم اولدی کمان
گرچه من جان اوسته یم سن ایلمه داد و فغان
دینجلوب چون مرغ روحیم ظلم و ایذادن گیدور
..
..
..
..
آغلاما سیل گوزلرین ای حجّت حقّ الاه
سوز آهین یاندیرار طاق سپهری چکمه آه
چشم خونبار حسینه یاعلی ایله نگاه
خون قلبیمدور عذاره چشم شهلادن گیدور
..
..
..
..
حسرتیلن آغلاما سن مجتبانون گوگلون آل
اینجیسه قلیون حسینیمدن اگر ایله حلال
قویما قونسون تار موی زینبه گرد ملال
آیریلور زهرا او زلف عنبر آسادن گیدور
..
..
..
..
چوخ سنه بو مدّتی زحمت ویروبدور فاطمه
گورمدیم خوش گون جهاندا تاپدی عمریم خاتمه
قویما باتسون خوردا اطفالیم عم اوغلی ماتمه
چون بو اطفالین آناسی دار دنیادن گیدور
..
..
..
..
ایلمیشدیم یثربی بیر مدّتی بیت الحزن
قویمادی تا من دویونجا آغلیام اهل وطن
ویر خبر بو نوعی اهل شهره ای شاه زمن
دینجلون سیز دخت پیغمبر بو مأوادن گیدور
..
..
..
..
هیچ جوان بیر عورته یوز ویرمیوب بو اتفاق
همدمی اولسون اونون روز ازلدن آغلاماق
چرخ دون بیلدی روا زهرایه سینه داغلاماق
دود آهیم اوج ایدوب طاق ثریّادن گیدور
..
..
..
..
گورموشم دنیاده گرچه ظلم و جور بی شمار
گوزلریمده گوندوزوم اولموشدی مثل لیل تار
ظلم ثانی آلدی زهرادن ولیکن اختیار
ظلم ثانیدندی قلبیم تاب و یارادن گیدور
..
..
..
..
بیرده تنها غسل ویر زهرایه ای شیر خدا
قوی مزاره اؤز الونله ایله زهرانی دعا
گلمسونلر قبریم اوسته امّت دیر آشنا
چون که زهرا قبره ظلم و جور اعدادن گیدور
..
..
..
..
باشه گلمز حضرت صدّیقه زهرا محنتی
سنده آغلا توک «جوان» رخساره اشک حسرتی
صدقیلن دوت دامن کنز وقار و عفّتی
زنگ قلبون واردى امّیدیم بو انشادن گیدور
..
..
..
..
گل عم اوغلی یا علی زهرا بو دنیادن گیدور #فاطمیه_احمدی_جوان
نظر دهید