گل که من سقای مستسقایه سقا سن حسین #عباسیه_هادی_تبریزی

عاشق ایثارگر
..
..
..
مرحوم هادی تبریزی
..
..
..
..
گل که من سقّای مستسقایه سقّا سن حسین
سن همان آب بقا بخش گورارا سن حسین
..
..
شمع عمروم کلبۀ جسمیمده هی سو سو ویرور
یول گوزتلیر گوزلریم کوکو کیمین کوکو ویرور
مرغک حقّم دلیم هو حق ویرور هوهو ویرور
سن حقیقت لفظینه مفهوم و معنا سن حسین
..
..
من نه من، من بو منیّتدن اوزاق بیگانه ام
هر نه وار سنسن سنه ای شمع حق پروانه ام
محو عشقم عاشق افسونی و افسانه ام
من کلیمم سن منه طور تجلّا سن حسین
..
..
انتظارین مجمرینده بیر یانان عود اولموشام
بیر یانان عود اولموشام آخر یانوب دود اولموشام
دود اولوب نابود اولوب نابود نابود اولموشام
گل که سن معجز گر اعجاز عیسی سن حسین
..
..
قوزانوب طوفان وحشتناک درد آلود جنگ
تندریله همطنین اولموش غریو دیو جنگ
پهنۀ دنیا اولوبدی دخمۀ خاموش و تنگ
برق ویر، سن آذرخش پاک تقوا سن حسین
..
..
کام آچوبدی اژدهای کین و عصیان بشر
عالمه چوکموش غبار دردناک زشت و شرّ
آغلورام آغلور منیله چشم روح البشر
قانه دونموش گوز یاشمدا سن هویدا سن حسین
..
..
..
سن اگر ئولسن سنیله هیکل ایمان ئولوب
قلعه بان قلعۀ مستحکم قرآن ئولوب
روح لفظ و کلمۀ پاکیزۀ انسان ئولوب
وای منه مندن صورا تنهای تنها سن حسین
..
..
چولقیوبدور جوّ اسلامی حریر التهاب
ماوراء جوّده واردور عجیبه انقلاب
گوی دچار التهاب و یر دچار اضطراب
سن اوزون مشکل گشای هر معمّا سن حسین
..
..
گل منیم قوی رتبۀ اعزازیمی ممتاز اولا
سر فرازون تا که سربازندۀ جانباز اولا
بیر سینان باش خاک پای شاهه پای انداز اولا
تحفۀ درویشه سن حتما پذیرا سن حسین
..
..
..
#عباسیه #هادی_تبریزی #عباسیه_شهادت #ترکی #زبدةالاشعار