حالات مجلس یزید و خرابه شام
..
..
مرحوم انور اردبیلی
..
..
زینب علی ولیّ خدایه سلاله دی
ناموس ذوالجلالیدی هم ذوالجلاله دی
..
ماهیّتی کریمه دی ذاتاً علیه خو
زهرای ثانی دی اوزی زهرا خصاله دی
..
نامحرمان شمایل رویون گورنمیوب
معجر سیز اولسادا پر جبریل عِقاله دی
..
دین مکتبینده عالمه دور بی معلمه
علیا منشدی منطقی شیوا رواله دی
..
توحیدیده یگانه دی تحمیدیده حمید
تشبیهده اراده سی محکم جباله دى
..
مام حیادی دست یدالله در آستین
هر نکتۀ کلامی هزاران رساله دی
..
ذلّت توزی اوتورمادی بیر ذرّه حسنینه
رخساری مهر عزّته بسکه مثاله دی
..
دوران دولاندی اولدی یزیدیله روبرو
صندل نشین او بزمده قوم ضلاله دی
..
فکر ایلدی یزید او مجلسده تکیه سی
تخت مرصّع و هدف ایده آله دی
..
گتدی دیله کنایه لی سوزلر ایدوب بیان
هر سوزده تهمتی شه فرخنده فاله دی
..
الله منی عزیز ایلیوب سلطنت ویروب
دنیا سیادتی منه حقدن حواله دی
..
قدرت منیم مقام منیم خیزران منیم
فاش ایله یا حسین گنه فکرون قتاله دی
..
واردور ولایتیم اولوالامرم جماعته
تنفیذ حکموم هر طرفه هر محاله دی
..
تأیید ایدوبدی کیم منی تأیید حق ایدوب
سر سفرمه چاتوب الى صاحب نواله دی
..
ایکاش اولیدی بدر و حنین ده ئولن شیوخ
سینم گوریدیلر نجه لایق مداله دی
..
حمد ایلورم آلوبدی پرین آرزولریم
قدرت عروسنون منه عقدی حباله دی
..
بو یوم انتقامده حامی اولان منه
بیر خیزراندی بیرده می چند ساله دی
..
ایچدی شرابی ئوز ئوزینه نوش جان دیدی
سرمست اولوب قزاردی گوزی سوز اطاله دی
..
یر گلدی نالیه گویه قوزاندی خیزران
ای دل واروندی عشقون اگر وقت ناله دی
..
ضربت توخاندی قهریله قانلی دوداقلارا
ارواح انبیا متأثر او حاله دی
..
گولدن آلوبدی بوسه تکان پارچالاندی گول
نسگل بو سوز سوز اهلینه نازک خیاله دی
..
ریحانۀ محمّدی اولدی اسیر خار
هر بیر لبین گوروبدوله بیر برگ لاله دی
..
هر برگنون داموردی قزیل طشته شبنمی
طشتون محیطنی بورین سُرخ ژاله دی
..
سجّاد باخدی زینبه زینب اوشاقلارا
باخماقلارین اشاره سی اهل کماله دی
..
تحقیر ایدوب ایوین بُیوگون وورسالار اگر
یوخ شبهه سی حقارتی اهل و عیاله دی
..
زینب گوروبدی قارداشنون لبلرینده قان
بدری دوشوب خُسوفه شبیهی هلاله دی
..
مهر سکوتی شدّت قهریله سندیروب
شیرون کانّه حمله سی ترسو شغاله دی
..
سسلندی یا یزید او کسوک باشدان ال گوتور
وورما او قانلی لبلری زیبا کلاله دی
..
یوخ سنده معرفت او کسوک باشین حقّینه
بیزده ولی علاقه او صاحب جماله دی
..
توهین لری که سن ایدوسن سبط احمده
رجّاله نون اهانتی فَخرالرّجاله دی
..
مظلومی وورما لعنت اوخور ذاتیوه سنون
حتی او کسلریکه سنه هم پیاله دی
..
باده ویروب ذکاوتوی باده ای دنی
مسموم مغزله هَوَسون قیل و قاله دی
..
گردن چکوب تبخّریله صحبت ایلوسن
فکر ایلوسن که آدیوه یر گوی قباله دی؟
..
آلّانما طمطراقیوه چوخ آز زمان کئچر
بو قصریوی گورلّه محلّ زباله دی
..
نسل أمیّه ارذل أمّتدی سنکه هیچ
دورونده اگلشن اُمراده تُفاله دی
..
من زینیم ولیّ خدانون بیوک قزی
هر بیر سوزوم مُدَلّل و مُتقَن مقاله دی
..
کوه غم و مصیبتی کاه ایلرم حساب
غم چکمگه دوغولمشام عشقیم ملاله دی
..
واردور وکالتیم شهدادن دفاع ایدم
زلفوم آغارماقی منه حقّ الوکاله دی
..
نامردسن طنابه چکوبسن قوناقلاری
باغلی بیر ایپده بیر سوری یورقون غزاله دی
..
صحبت سنیله ایتمزدیم ایش دوشوب بیله
سن بیر لجن منیم سوزوم آب زلاله دی
..
..
..
لعنت شریح شومه سنی ایلیوب جری
صیقلّیوب ویروب الیوه تیز خنجری
..
..
..
امّیدیمیز بیزیم بیر اولان لاینامه دی
قدرت الى همیشه کمک انتقامه دی
..
اوچ پر اوخیلا صودامر ئولدورموسن یزید
دیل سیزلرون تناسبی گور اتّهامه دی
..
کرب و بلاده قانیله بیر خط چکوب حسین
بیر خطّ سرمدیدی مکمّل قیامه دی
..
خطّون بدایتی باشی ذبح اولدوقی مکان
گودالیدور تسلّطی دربار شامه دی
..
هر کیم او خطّی سیر ایده بُلسه حسینی دور
ترک ایلسه او خطّی مؤیّد ظلامه دی
..
منده او خط سرخ کبیرون سفیریم
جانیم دلیم رگیم قانیم حامی امامه دی
..
تاریخی بیر محاکمه ده حاکمم بوگون
سایم مثال صاعقه فاسق نظامه دی
..
سن آیه آیه مُنزله سرسخت خصم سن
قرآنی فکر ایدورسن اساطیر نامه دی؟
..
من دلخوشام شهیدلرون قانینه، سنون
دلخوشلوقون بو سلطنت بی دوامه دی؟
..
دوز سلطنت فضیلت و تقوایه بسته دی
نه سیم و نه طلا نه کنیز و غلامه دی
..
آغزون مثال مست شُتُر باغلیوبدی کف
خودسر سن ای یزید نیازون لُجامه دی
..
بو گونکه ظاهراً سته روشندی شاد سن
باطنده منتهی ابدى تیره شامه دی
..
تاریخ لر بوئی جوشاجاقدی حسین قانی
بو پاک قان همیشه مبیّن پیامه دی
..
وردون گوله گوله او باشا سنکه خیزران
هر ضربتون پیمبر صاحب سلامه دی
..
ظاهرده پارچالاندی حسینون دوداقلاری
باطنده پاره لر لب فخر الانامه دی
..
معناده باشه اولوالعزم انبیا ورور
ختم نبی آچوب باشنی بی عمامه دی
..
زهرا آناسی اللرینی قوینونا قویوب
جنّت خانملاری باش آچوب تیره جامه دی
..
کاش خیزران ئوپن دوداقی بیزده بیر ئوپک
حسرت بالالاری او لب لعل فامه دی
..
افسوس اولا هامی بیر ایپه باغلانوب یزید
عاشق هامی او سرور عالی مقامه دی
..
ویر بیر گیجه کسوک باشی بیز ساخلیاق قوناق
چوخ خوار اولوب نیازی اونون احترامه دی
..
..
..
موی محاسنی دولاشوب شانه ایستیور
شمع رواق عشقیدی پروانه ایستیور
..
..
..
گوردى یزید على قزى عالیه پایه دی
قلبی دولوبدی منطقیله لایه لایه دی
..
علم کلامه نکته به نکته بصیر دور
قابل وکیله یتمیش ایکی خونبهایه دی
..
قرآن ناطقون قزی آیات مخبری
قرآن دیلینده ازبر اونون آیه آیه دی
..
فرمان ویروب خرابیه گتسون اسیرلر
قالسونلا بیر محلّده بی سقف و سایه دی
..
گردنلریندن آچدیلا بند اسارتی
نسگل منیم بو جمله سوزوم ماسوایه دی
..
ویرانسرایه بوشلادیلار گون باتان زمان
یاندی دلیم تعجّبوم حِلم خدایه دی
..
بیر وا محمّدا دیوب آغلاشدیلار بیر آز
ماتملی هاردا اگلشه عشقی عزایه دی
..
مژگاندان آخدی گوز یاشی توز قونموش ئوزلره
مسکن بُلوبدیلر او یر آلعبایه دی
..
یورقون اوشاق داش اوسته ده اولسایومار گوزون
نه رختخوابه حاجتی نه متکایه دی
..
یورقون یتیمه لر آخان اولدوز تک آخدیلار
اولدوزلارا او منظره غملی کنایه دی
..
فکر طعامی آتدی اوشاقلار خیالدن
وقت اولمادی دیسین بیری میلیم غذایه دی
..
تللر توکلدی یوزلره چکدی قرا نقاب
قاره لچک بلی گونی بختی قرایه دی
..
هر قز شبیهدی پوزولان بیر گویرچنه
یا هر بیری مثل پری سنمش هُمایه دی
..
زینب باخوب بالالارا سسلندی ایخدا
بو طفل لر عزیز حرم مرتضایه دی
..
سنسن اللهی دهرده بیکسلرون کسی
بیکس یتیمه لر سنه تحت الحمایه دی
..
یا رب بو قزلارون چوخی الآن مریضدور
نو گُل لریم دچار خزان جفایه دی
..
شرمنده ایتمه زینبی مظلوم حسیندن
سندن کرم بو بندہ دن اللر دعایه دی
..
سالم خرابه دن آپارام کاش اوشاقلاری
چون نیّتیم ئورکده اَوَل کربلایه دی
..
عرض نیاز ایدوب گینه باخدى بالالارا
ایتام آناسی باغلی طناب وفایه دی
..
اگلشدی قزلارون باشنون اوسته بیر به بیر
صورتلرین گوروبدی مثل کهربایه دی
..
آهسته هر یاتان قزون ئوپدی دوداقنی
بو سوز دیدی دوا بو دلِ مبتلایه دی
..
آخر گلوب رقیّه سنون باشی اوستونه
زینت گوروبدی پیکری ویرانسرایه دی
..
شیرین یاتوب بلا قفسینده قناری تک
زیور یولون غباری او زهرا نمایه دی
..
طعنه ورور شقایقه لعلی دوداقلاری
قاره تلى جبینده چون ابر آیه دی
..
مین نرگس اسیر ایلیوب هر یوموق گوزی
غم بسترینده اوخشاری خیرالنّسایه دی
..
ئوپسم دیدی دوداقلارینی دیسکنر بالام
عشقیم منیم بو دختر شیرین ادایه دی
..
گر ئوپمه سَمده حسرت اودی یاندیرار منی
هر دردمندون حاجتی آخر دوایه دی
..
تنها بو خورداجا قزی زینب چوخ ایستمور
قارداشمونده عشقی بو گویچک بالایه دی
..
افسوس اولا منیم بو قرا گوز غزالیمه
آز سنّیده دچار کمند بلایه دی
..
یولّار غمی یوروب یاری جاندور گوزل بالام
گاهی سویوق اسیری که ایستی هوایه دی
..
صحبت ایدن زماندا یانور قلبمون باشی
باشدان ایاقه سوزلری نسگل گلایه دی
..
گاهی دیور بی بی علی اکبر هایاندادی
حسرت گوزوم هاچاندی او قدّ رسایه دی
..
چوخداندی هیچ منی گلوب آلمور قوجاقینه
اهل دلم محبّتیم اُول دلربایه دی
..
قیمتلی گوهرم نیه گوزدن سالوب منی
صرّاف اودور منیمده نیازیم بهایه دی
..
بلمور مگر جلای وطندور رقیّه سی
چوللرده دستگیر سپاه دغایه دی
..
بلمور مگر آلوبلا ایکی گوشواره می
روشن گونوز قرا گیجه بو بی نوایه دی
..
بُلمور مگر فلک دؤنومی ایلیوب قرا
عشقیم بو قلبده منیم الوان قبایه دی
..
بُلمور مگر قرا تلیمون یوخدی شانه سی
بُلمور مگر بو ساچلاریم حسرت حنایه دی
..
بُلمور مگر گلین باجمون یوخدی معجری
مشکل باشی آچیقلیق او کان حیایه دی
..
«انور» بازاندا سعی ایله یاز محتوالی سوز
لطف سخن همیشه گوزل محتوایه دی
..
..
..
..
#مجلس_یزید #انور_اردبیلی #خرابه_شام_انور_اردبیلی #خرابه_شام #ترکی #زبدةالاشعار
نظر دهید