گوردوم کتاب غمده بیله بیر کتابتی #الهادی_تائب_تبریزی

حالات حضرت امام هادی (ع) و جنایات متوکل ملعون
.
.
#زبدةالاشعار
.
: @nohe_torki
.
مرحوم تائب تبریزی
.
گوردوم کتاب غمده بیله بیر کتابتی
شرح ایلرم بیاناً او غملی روایتی
.
طغیانی باشلیوب متوكل غروریله
عاق اولدی هم خدایه دانوب هم امامتی
.
امکان ویروبدی فرقه اشراره ظلمیله
چوخ تنگنایه سالدى امام عدالتی
.
فرصت تاپوب مُداهِنه گرلر ایدوبدیلر
حقّ امام حقّده چوخ چوخ سعایتی
.
سویلردیلر امام ایدور جمع اسلحه
مطلق سنون علیهوَه وار فكر نهضتی
.
حال غروریله متوکل روان ایدوب
مظلوم امام منزلینه بیر جماعتی
.
بیت امامته گجه وقتی توكولدیر
نه عرض ایدیم یاراتدیلا نه خوف و وحشتی
.
الله بولور نه حاله قالوب اهل بیت دین
نه نوع ایلدی نگران آل عصمتی
.
بیر زاد تاپولمیوبدی ولیکن تاپوبدیلار
حال عبادت اوسته او روح عبادتی
.
جانانیله گوروبله که راز ونیاز ایدر
گوز یاشی ایسلادوبدی او گلرنگ صورتی
.
شرم ایلورم دیم که او مشروب بزمینه
نه نوع گتدیلر او سلیل ولایتی
.
مشروب مجلسی هارا میر هدا هارا
بیر بیله مجلسیله امامین نه نسبتی
.
وارد ایدنده مجلسه افسرده حالیله
اول مهتدای دینی او رکن شریعتی
.
سرمست جامیدی متوكل الینده جام
اگلشدیروب او شوم کنارینده حضرتی
.
جام شرابی ایتدی تعارف او سروره
باخ بیر حیایه سیر ایله بیر گور خباثتی
.
حضرت بویوردی دوت منی معذور اولمیوب
داخل شراب قانیمه چون واردی حرمتی
.
مَعفوّ دوتدی قصد اهانتله سویلدی
اشعار اوخی بیر آز منه ویر روح لذتی
.
سویلوب امام شعرده چوخ یوخ روایتیم
ال چکمدی نقدر واریدی وقاحتی
.
مجبور ایدوب امامی او بی شرم و بی حیا
باشلوب امام شعریله پند و نصحیتی
.
فرمایش ایتدی مرگ سلاطین دن صورا
شرح ایلرم که واردی نه خواری نه ذلتی
.
چوخلار گیدوبدی قلۀ محکمده اگلشوب
اما اولوبدی قطع اونون هر حراستی
.
غالب اولوبلا قلعه لره لیک او قلعه لر
بیر نفع ویرمیوب اولا را پشّه قیمتی
.
فریاد او وقتدن که او عزّتلی قلعه نی
جبراً انوب تاپاللا حضیض ذلالتی
.
پیک اجل تاپار اولاری قبض روح ایدر
چوخ پیس مکان لرده تاپالّار سکونتی
.
مدفنده دفن اولاندا منادی ایدر ندا
نولدی او دستبندلر اعضاء زینتی
.
نولدی او چهره لر که تنعّم ده غرقیدی
نولدی او پرده لر هانی تالار دولتی
.
نولدی او گیرودار او فرامین او تاج و تخت
نولدی او زرق و برق او میز حکومتی
.
نولدی او چلچراغ لی تالار زرنگار
فی الحال اختیار ایلیوب دار ظلمتی
.
مأمورلر سؤاله گلر قعر قبرده
وحشت دوتار او وقتده اهل ضلالتی
.
اوندا ندور جواب او طغیان ایدن لره
حقی دانوب دوتوبلار أولار راه بدعتی
.
دنیاده هر قدر که اولار عیش و نوش ایدوب
جبران ایدر مزار ویرن رنج و زحمتی
.
غفلت یولیله شربت شیرین ایچنلره
بیر تلخ صحنه ایچدیری بیر تلخ شربتی
.
قبر ایچره مردمان جهانخوار گوزلرین
فی الجمله مور و مار ییَر وار روایتی
.
اوندا بیلر اولار نه جنایت ایدویدیلر
یا انجیدوبدیلرنجه مظلوم ملتی
.
سوز بو یره یتوب متوکِل چکوب بیر آه
حالی پوزولدی توکدی یوزه اشگ حسرتی
.
سس چکدی آغلادی اوجادان هایهائیله
ایسلاندی گوز یاشیله اونون ریش و صورتی
.
جام شرابی وردی یره گوزده گوزیاشی
برچیده ایلدی او گجه بزم عشرتی
.
دوندی امامه چوخلی محبت ویروب نشان
چوخ احترامیله یولا سالدی او حضرتی
.
ظاهرده خوش دلیله امامی سالوب یولا
باطنده آرتیراردی دمادم عداوتی
.
گاهی ایدوب اذیت و آزار او سروره
گاهی اولوب او حضرته طعن و اهانتی
.
گاهی جفائیله عَلویّونی انجیدوب
گاهی حسین مزارینه اولدی جسارتی
.
امر ایلدی حسین مزارین ایدون خراب
شخم ایلیون شروع ایدون اوردا زراعتی
.
گه باغلیوب جفائیله کرب و بلا یولون
ممنوع اولوندی خلقه حسینین زیارتی
.
اللر کسیلدی لیک اویولّار کسیلمدی
چکدی آپاردی خلقی حسینین محبتی
.
راوی دیر بیر عورت ایدوب عزم کربلا
مأمورلر گوروبله یول اوسته او عورتی
.
سویلوبله شرط دور صاق الیندن گیدن گچه
تا ایلیه زیارت شاه شهادتی
.
عورت ولیک ایلدی آماده صول الین
سویلوبله صول الون ویروسن وار نه علتی
.
ویردی جواب صاق الى ویردیم گچن سفر
ویرّم بوگونده صول الى وار جانه منّتی
.
چون که آقام حسینی گوزومدن چوخ ایسترم
گوز ایسته سَزده گر وئررم یوخ کراهتی
.
ال گوز ندور بو جانیمی ارزانی ایلرم
جانانیمین محبّتی نین چوخدی قیمتی
.
بیر عمریله برابر اولار هانسی شیعه نین
اولسا حسین زیارتی عالمده قسمتی
.
یا رب نه وقت اولور آچیلا کربلا یولی
قسمت اولا بو جمعه حسینین زیارتی
.
با هم طواف ائداخ بیر او ششگوشه مدفنه
بالای سرده بیرده دؤیاخ باب رحمتی
.
پائین پایه بیر دؤشه ناخ وای علی دیاخ
لیلا دلینجه اوخشیاق أوُل ماه طلعتی
.
تائب باشوندا واردی سنون شوق کربلا
اما گورنمیوبسن او گلزار جتنی
.
عهد ایله نائل اولسان اگر بو زیارته
اوردا دعا ایله هامی اعضاء هیئتی
.
#الهادی_تائب_تبریزی
#الهادی_شهادت
#گوردوم_کتاب_غمده_بیله_بیر_کتابتی
#ترکی
.
#زبدةالاشعار
.
: @nohe_torki