راه شام
طبق روایت
.
✍️ زبدة الاشعار ✍️
.
?: @nohe_torki
.
سید بشیر حسینی میانجی
.
.
گوش جانیله قولاق وئر منه ای پیر و جوان!
«دمعة السّاکبه»ده نقل اولونوب بو جریان
کوفه دن اولدی اسیران بلا شامه روان
دوه لر اوسته قولی باغلی گئدوردی اسراء
نیزه باشینه وریلموشدی رؤوس شهداء
.
.
خطّه ی «قصرمقاتل»ده چوخ ایستئیدی هوا
قالمادی راکب و مرکوب نه طاقت نه قُوا
قالدی حسرت هامی اُول دشتیده بیر جرعه سووا
سعدین اوغلی دئدی برپا ائلیون خیمه ی شاه
ایستیدن بلکه پناهنده اولا بوردا سپاه
.
.
دوزه لوب نئچّه بویوک خیمه سرا، واویلا
دولوشوب خیمه لره قوم دغا، واویلا
گون قباقینده قالوبدور اُسرا واویلا
باش باشا وئردی رئوس شهدا یاره گوره
سالالار سایه یئره عابدبیماره گوره
.
.
زینبین کیمدی چاتا رُتبه سینه پایه سینه
شرح و تفسیر یازوب سوره ی عشق آیه سینه
حضرت ساجدی قویدی دوه نین سایه سینه
دئدی یار اُسراسن سنه عمّون قربان
یادگار شهداسن سنه عمّون قربان
.
.
واردی گوردی او حوالی ده سکینه، بیر آغاج
بئله فکر ائتدی که اوز دردینه دای تاپدی علاج
یوز قویوبدور آغاجا ساری او فرخنده مزاج
ائله کی اُول آغاجین سایه سینه چاتدی خانیم
توپراقی جمع ائلیوب بالش ائدوب یاتدی خانیم
.
.
اشقیاء خیمه ده دینجلدی دوروبلار ایاقا
نیزه باشینده کی باشلاری سالوبلار قاباقا
نه ترحّم بویوگه ائتدی اولار نه اوشاقا
هاموسین ناقه سوار ایله دیلر سرعتیلن
گئنه باشلاندی اوزون یول غمیلن محنتیلن
.
.
کاروان گِئتدی بیر آز گون گویه ساری اوجالوب
باتدی مغربده، طبیعت باشینا قاره سالوب
ناگهان فاطمه بیلدی باجی سی چؤلده قالوب
دئدی ای شمر! باجیم گلمسه گئتمه م بو زمان
دئدی هاردا؟ دئدی بیلمه م ائلیوب هاردا مکان
.
.
ساربان سرعتیلن قاچدی بویانه اویانا
اوجادان نعره چکوب بلکه او یاتمیش اویانا
آتش شعله ور غمده اویانه او، یانا
اویانوب دوردی چاغوردی باجی سی فاطمه نی
دئدی تنها نیه قویدون باجی بو چؤلده منی؟!
.
.
ساربان دوشدی بیابانه سکینه سسینه
تاپوب اُول بی کسی بلکه یئتوره اوز کسینه
یئتوروب میندوروب اُول خسته قیزی ناقه سینه
ایکی باجی اوتوروبدور گئنه بیر محملده
گورورم حال بُکا واردی بیزیم محفلده
.
.
راه شامین جریانی یازیلوب مقتلده
نئچه جور نقل اولونوب مدرکی واردور الده
بیرینی عرض ائله دیم محضروزه اوّلده
ایکمنجی یازیلان قلب لری قان ائلییَر
ائشیدنلر بیلیرم ناله و افغان ائلییَر
.
.
نقل اولوب کوفه نی ترک ائتدی اسیران بلا
یولون اوّل گجه سی چوخ چتین اولدی اولارا
ساربان گوردی سکینه ائلیور آه و نوا
سالوری یادینه خوش گونلرین آغلور او بالا
آتش آهیله عالَم لری داغلور او بالا
.
.
ساربان سسلدی: چوخ آغلاما اینجتمه منی
یوخسا ئولدورّم اوزوم شامه کیمی یولدا سنی
قمچی وُردی او قیزین باشینه اُول پست و دنی
آغلادی خسته سکینه دئدی: ای خسته بابا!
آغلارام، چون سنی ئولدوردوله حق اوسته بابا!
.
.
او یتیمه قیز اوشاقی چاغیروردی بابانی
خشمگین اولدی او ظالم ائله وُردی بالانی
ضربتینون اثریندن چیخا آز قالدی جانی
ناقه اوستن یخیلوب قالدی بیاباندا او قیز
سولدی ریحان کیمی بیر بوته ی هجراندا او قیز
.
.
کاروان گئتدی او مأوادن اوزاقلاشدی بیر آز
قورخولی چؤلده قالوب بی کس و بی محرمِ راز
هوشیدن گئتمیشیدی دختر سلطان حجاز
ائله کی هوشه گلوب گوردی گئدوب قافله سی
بیلمه دی وار نَقَدر قافله یه فاصله سی
.
.
الی باشینده قاچوب گاهی صولا گاهی صاقا
باخدی چوخ وحشتیلن گاهی داشا گاهی داغا
آغلادی چؤلده کی آهولر او یورقون اوشاقا
گه اوتوردی یئره گه دوردی ایاق اوسته او قیز
او قَدَر قاچدی تیکان اوسته اولوب خسته او قیز
.
.
ایاقین یاره ائدوب خار مغیلان یاران!
قانیلن اولدی مزین او بیابان یاران!
ناله ائتدوقجه اولوب نی کیمی نالان یاران!
دیه بولّم کی او قیز اوز یاراسین باغلامادی
قورخوسوندان سسین اورتدی اوجادان آغلامادی
.
.
دئدی آهسته الهی نوه ی زهرایم
بیر یتیمم بو بیاباندا تک و تنهایم
آی چیخوب، قورخودور حتّی اوزومی اوز سایه م
یواسیز قوش کیمی گوزیاشیمی گوزدن الَرَم
سورودن آیری دوشن اؤو کیمی منده ملَرَم
.
.
آند وئرّم سنی یارب! بابامین حُرمتینه
اوجا بُوی تشنه علمدار عمومین غیرتینه
حضرت زینب کبری بی بیمون عفّتینه
اکبر و اصغره خاطر منی بابامه یئتور
یولدا ئولدورمه، اقلاًّ بو قیزی شامه یئتور
.
.
صورا سسلندی خانیم: سن منی تک قویما بابا!
جامه ی وصلیمی هجرانیویلن سویما بابا!
دویمازیدون گؤروشومدن گئنه گَل دویما بابا!
بو تیکانلار آراسیندا گل باغ فدکم
منی درک ایله که وحشتلی بیاباندا تکم
.
.
کارواندان چون اثر تاپمادی آخر او بالا
دوشدی غم لر اثریندن اوره گی آیری حالا
گئنه لازمدی باباسی او قیزی یاده سالا
باغبان آلدی گولون عطرینی ثابت دُوردی
یولون اوستونده حسین بزم محبّت قوردی
.
.
نیزه بان گوردی یئره باتدی جِدا نئچّه وجب
یارالی باش دایانوب سسله دیلر: یاللعجب!
نَقَدر زور وئروب نیزیه اُول قوم عرب
گئتمه دی ذرّه، سالوب قافله نی لنگه امام
قالدی حیران بو ایشین حکمتینه ملّت شام
.
.
دئدیلر سرّ کتاب حقی استاد بیلر
عشقِ شیرین نه دی بیلمز هامی، فرهاد بیلر
بو ایشین حکمتینی سیدِسجّاد بیلر
گرچه باغلیدی قولی، بوینی، اوزی زار و علیل
ولی شمر ئوپدی ایاقین او شهه اولدی دخیل
.
.
دئدی چاره ائله ای حجّت برحقِّ خدا
گور ندور علّتی گئتمور سر شاه شهداء
او زمان ناقه دن اَندی یئره سجّاد آقا
روبرو گلدی دایاندی یارالی باشه اوزی
باخدی باباسینه یاندی اوره گی، دولدی گوزی
.
.
وئردی اوّلده ادبلن یارالی باشه سلام
صورا عرض ائتدی: اَیا سید و سالار و امام
ئولدوروبلر سنی ظلمیله سوسوز، قوم ظلام
نیه گتمورسن ائدولّر بو قدر سعی و تلاش؟
ناگهان دوندی دالا باخدی سرِ نیزده باش
.
.
یوز دوتوب عمّه سینه زین العباد ائتدی خطاب:
ای پرستار یتیمانِ حسین ایله شتاب
بیر اشاریله آتام وئردی سؤالیمه جواب
دوندی باشی دالا باخدی که بودور عمده دلیل
سرشماری ائله قیزلاری، قالان وار ائله بیل
.
.
قیزلارین آدینی بیربیر دئدی زینب اوجادان
بیربه بیر وئردیله سس حضرته، قیزلار او زمان
ولی سس گلمه دی تک نازلی سکینه بالادان
اوزونی ناقه دن آتدی یئره اُول ماه لقای
اوجادان وای، آدامیزلیق الیندن دئدی وای
.
.
قئییدوب چؤل لره زینب اوره گی قان دولانور
الی باشینده بیابانیده حیران دولانور
مرتضی نین قیزی چوخ حالی پریشان دولانور
ائلدریم تک او قرانلوق گئجه ده گور نه شاخور
حیف اولا یاره لنوبدور ایاقی، قانی آخور
.
.
مهریلن سسله دی نئچه دفعه یولدا قالانی
قهریلن لعن ائله دی مرکبین اوستن سالانی
قوی دیوم تاپدی نئجه، زینب او یورقون بالانی
درد و آهیله خانیم بیر یئره آخرده چاتوب
گوردی اُول خسته سکینه سیخلوب داشه یاتوب
.
.
آلدی آهسته قوجاقینه ئوپوبدور دوداقین
پاره ائتمیشدی عدو غارت اولاندا قولاقین
ایندی ده یاره ائدوب خارِ مغیلان ایاقین
آلوب آغوشه محبّتله بالانی گئتوروب
کاروانه اونی اوز عمّه سی آخر یئتوروب
.
.
بیرده کی بیله دیولّر خانیمی زجرِ دغا
آختاروب تاپدی، اونا ایله دی چوخ جور و جفا
ال لرین باشینه قویدی دئدی: ورما، او بالا
دئدی مین منله. دئدی: مینمرم ای شوم و دنی!
سن آپار پایِ پیاده باباما ایندی منی
.
.
ائله دون همدم اگر چه منی درد و غمیلن
دلخوشام همدم اولام غصّه چکن عمّه میلن
بیر آتا مینمَز حسینون قیزی نامحرمیلن
باخما آز سِنّیمه سن، من نوه ی زهرایم
یعنی قرآندا حجاب آیه سینه معنایم
.
.
الغرض دوشدی قباقه الی باشدا او بالا
قمچی الده آتینا میندی قالوب زجر، دالا
مرکبین قؤودی دالیجا بالانین صبرین آلا
گه چکوب نعره او ظالم غضب و وحشتیلن
گه وُروب قمچی او یوروقون بالیا شدّتیلن
.
.
یئتوروب قافله یه گلدی خانیملار قاباقا
هاموسی سعی ائله دی تا اونی آلسین قوجاقا
اعتنا ائتمه دی اُول قیز نه بویوک نه اوشاقا
مستقیماً یئتشوب باخدی باباسی باشینا
نئچه یول دوندی یارالی ایاقیلان باشینا
.
.
اوّل ایش کی او بالا گوردی بوئیدی او زمان
یئره اگلشدی، ایاقین او باشا وئردی نشان
یعنی بابا! ایاقیمدان آخوری گور نئجه قان!
عیبی یوخ گرچه اولوب یاره بو چؤلده ایاقیم
حسرتم بیر بونا، اُول لب لره چاتمور دوداقیم
.
.
بابا! هجرونده همیشه گییرم من قاره
گئنه شکر ایلیورم دیلده حق داداره
چون منه قول وئروبسن گلسن دیداره
دوزه رم هر غمه شاماته گلرسن بیلورم
کُنج ویراندا ملاقاته گلرسن بیلورم
.
.
یاحسین! جمع عزاداره عنایت قیل آقا!
هامی عاشقدی سنه سنده حمایت قیل آقا!
پای میزان عدالتده شفاعت قیل آقا!
اتگوندن یاپیشوب دست نیازیله، «بشیر»
قبریوه زائر اولور «کالبا نیاز»یله «بشیر»
.
#راه_شام
#گوش_جانیله_قولاق_وئر_منه_ای_پیر_و_جوان
#سیدبشیرحسینی
#ترکی
.
✍️ #زبدةالاشعار ✍️
.
?: @nohe_torki
نظر دهید