گویدن شب عاشورا نورانی لوا گلدی #شب_عاشورا_یحیوی_اردبیلی

رجز شب عاشورا
#طفلان_زینب
..
..
مرحوم یحیوی اردبیلی
..
..
گوگدن شب عاشورا نورانی لوا گلدی
پرچمده یازیلمیشدی نام شهدا گلدی
..
..
یوم غم تاسوعا گون باتدی باشا یتدی
حضرت او جماعتلن اقدام نماز ائتدی
بیر عده نماز اوستن گیزلینجه دوروب گئتدی
اصلا او گیدنلردن نه سس نه صدا گلدی
..
..
بیعت گوتوروب حضرت قتلین دیدی منبرده
مشعل لر اولوب خاموش ظلمت توخودی یرده
گئتدی او قرانلوقدا بیر دسته ی دیگرده
ثابت قالان انصاره تحسین خدا گلدی
..
..
بیگانه و نامحرم ترک ایلدی جانانی
تشکیل تاپوب ناگه بیر مجلس روحانی
جمع ائتدیلر اول بزمه دلداده احبّانی
یتمیش ایکی جاندان بیر آواز وفا گلدی
..
..
بیر خطبه اولوب جاری لبهای امامتدن
آچدی علنی پرده اسرار شهادتدن
گورسندی عجب عالم اول وقتده حضرتدن
العلم یقین أوسته رؤیتله قوا گلدی
..
..
انگشت مبارکله رد ائتدی حجاباتی
اندیردی اشاریلن گوگدن یئره جنّاتی
جنّتده شهیدانون گورسندی مقاماتی
اوردا نظره قصر یاقوت و طلا گلدی
..
..
وار میوه ی رنگارنگ اول باغ مشجّرده
هر قصرده حورالر رخت زر و زیورده
وار جام زبرجدده شربت دولی اللرده
سیراب اولور هر کیمسه تئز گلسه ندا گلدی
..
..
گلدی دل انصاره بیر نشئه ی روح افزا
یاتمادی سُروریندن بیر گوز شب عاشورا
هر خیمه و چادردن دوتمیشدیلا چون احیا
صبحه کیمی آواز تسبیح و دعا گلدی
..
..
بیر خیمه که اولموشدی زهرا قیزینا تسلیم
اوغلانلارینا مشق دعوا ائلیور تعلیم
سلطانه بو طرزیله صبّاح ائده سوز تعظیم
گورسون آقامون اوغلی مندنده فدا گلدی
..
..
بیر جفت بالا شمشیر بیر جفت بالا قلخان
ائتدی او ایکی طفلون صول صاقینه آویزان
تاپشوردی که دعواده شمشیره وئرون جولان
قلخانیله ردّ إیلون هر تیر جفا گلدی
..
..
راضی ائلیون جدّوز اول جعفر طیاری
پیغمبر و زهرانی هم حیدر کرّاری
شرمنده حسینیمدن ائتمون بو دل افکاری
سیز اینجیمیون اوغلوم هر قدری یارا گلدی
..
..
نصف شبیدی حضرت چیخمیشدی مصلّایه
قصد ایلدی تا گئتسون دیدار احبّایه
دوشدی یولی خرگاه صدیقه ی صغرایه
ناگاه قولاقینه آشفته نوا گلدی
..
..
بهت عالمی یوز وئردی خیمه قاپوسین آچدی
ناگاه او باجی قارداش بیر نوعی قوجاقلاشدی
اول خورداجا قربانلار بو حالته آغلاشدی
هم ناله و افغانه سکّان سما گلدی
..
..
آغلار گوزیلن یازدی چون «یحیوی» اشعاری
بیر سبک جدید آچدی خلق ائتدیگی آثاری
اخلاصیله آکنده اولموشدی چون افکاری
معناده لقب گویدن «تاج الشّعرا» گلدی
..
..
#شب_عاشورا #یحیوی_اردبیلی #طفلان_زینب_یحیوی_اردبیلی #ترکی #زبدةالاشعار