گچدی جدایه چون سر سلطان تاجدار #کوچ_کربلا_شانی_تبریزی

کوچ از کربلا
.
زبدة الاشعار
?: @nohe_torki
.
مرحوم شانی تبریزی
.
گچدی جدایه چون سر سلطان تاجدار
اولدی بتول قیزلارینا محشر آشکار
.
دوردی جدا باشندا حسین باشی گون کیمی
یاندی او حاله گون اوزی، آفاق آلوب شرار
.
آتلار قویانمازیدی ایاق ایستیدن یره
گویا دوتوب جهانی شرر، گویدن اود یاغار
.
نه حالدیدی گور او سوسوزدان یانان بنات
اوچ گون سو ایچمه میشدی چوخی بعضیلر یازار
.
دوتموشدی کفر ظلمتی کرب و بلا چولین
مستور ایلمیشدی چو حق نورین اهل نار
.
ایتمیشدی هم خسوف بنی هاشمون آیی
اولموشدی دشت ماریه چون شام تیره تار
.
تا گون کیمی اوجالدی جداده حسین باشی
عالم ایشیقلانوب شب تاریک اولوب نهار
.
خرگاه اودلاناندا داغیلشمدی چوللره
اطفال بی پناه حسین، بالغ و صغار
.
ایستردی اهل بیتنی یغسون کنارینه
سسلردی نوک نیزه ده تکبیر او شهریار
.
بولدورماقا بو عالمه اوز معنویتین
اوچ دفعه ایتدی نیزه ده تکبرینی کرار
.
یعنی بولون بو باشی نماز اوسته ویرمیشم
اولسون جهاندا جدّیمون احکامی پایدار
.
بو ئولماقیم دیریتدی پیغمبر شریعتین
تکبیریمون نتیجه سی تا وار زمانه وار
.
بی اختیار سسلدی تکبیر هامی قوشون
سس ویردی شاه دین سسینه لشگر شرار
.
جمع اولدی اهل بیتیده نیزه ایاقینه
بیر محشر اولدی، حشرده اولماز او آه و زار
.
شهزاده لر جدایه باخوب توکدی گوز یاشین
شه باشی قیزلارینا باخوب اولدی اشکبار
.
خوردا اوشاق گورنده جداده آتا باشین
نه حالته دوشر، نولور احوالی؟ کیم قانار؟
.
باجی گورنده سویگلی قارداشنون باشین
اوز قاتلی جدایه ووروب، تازه قان آخار
.
قان اولسا اشگی، چوخ دگی، وار حقّی واقعاً
آز ایلیوب اگر اوزینی ایتسه انتهار
.
اما عجبدی دوزدی بو قدری مصیبته
وار بیر بشرده گور بو دوزوم یا بو اصطبار؟
.
یوخ یوخ عجب دگل، اوزی آخر وداعده
امر ایلمشدی صبره امام بزرگوار
.
تاپمشدی قوّه قلبی، قویاندا الین امام
اولموشدی صبر معدنی دریای بردبار
.
باشین گوروب جداده دؤزوب، نعشینی ولی
تاپجاق نه حاله قالدی؟ بولر حیّ کردگار
.
باجی نه نوعی قاداشنی تاپدی، شرحینه
معذورم ایلورم آناسندان من اعتذار
.
دلده عزیز قارداش آدی، گوزده گوز یاشی
باشدا هوای شور حسین، دلده اضطرار
.
نه دیز گلور نه گوز گورور، آختاردیقین تاپا
نه گیتماقا توان نه دورماقه اختیار
.
یورقوندی یاتمامیشدی گجه پاسبانیدی
یانمش چادردا دربدر اطفاله خوار و زار
.
دل قارداش عطرینی آلوری، گورموری گوزی
بولمور نه دور بو حالته آخر مآل کار
.
قارداش دیوب گزوب دولانوب قان دولان چولی
داش اولسا دل او حاله دوام ایلمز یانار
.
گوردی جواب اولمادی، قطع اولدی چاره سی
زهرا آدین آپاردی او زهرایه یادگار
.
ویرّم قسم سنی آنامون حقّینه دانیش
سس ویر سسیمه ای یارالی جسم زخمدار
.
باخ بیر آنا اوغول آراسیندا علاقیه
گور اُلفَت و محبته وار حدّ و انحصار؟
.
منظور ایدوب آنا آدینون احترامینی
باشسیز بدن کلامه گلوب، دوتمادی قرار
.
سسلندی گل گل ای آنامون یادگاری گل
چوخ گزمه قان دولان چولی حیران و دلفکار
.
قارداش سسی گلن طرفه یوز قویوب باجی
گویا که گل سراغین آلوب عندلیب زار
.
فوراً اوزین یتوردی همان سس گلن یره
گوردی دونَن کی یر دگی، ایتمشدی کم گذار
.
سوز بیر مقامه یتدی که توضیحه شرم وار
اولسون گوروم او لشگری محشرده شرمسار
.
یا صاحب الزّمان آقا مستوریدی بدن
من ایلیوم بو مطلبی نه نوعی استتار؟
.
هر قدر ایتدی دقت او مظلومۀ جهان
گوردی بدن گورونموری ای ربّ کردگار
.
داشدور، شکسته نیزه دی، خنجر قلجدی، اوخ
بیر یرده چوخ توکوبدیله اشرار بدشعار
.
بیر بیر گوتوردی نیزه لری اوخلاری آتوب
گوردی گوروندی جسم، اولوب اسلحه کنار
.
اما نه جسم؟ باش که یوخ، اللرده قطع اولوب
حتی سویوب لباسینی اعدای نابکار
.
گلشندی جسمی، هر یارا بیر گل کیمی آچوب
دل آچدی گلدی ناله و فریاده چون هزار
.
حالی پوزولدی، چخدی اوزیندن فغانیله
بیر نوعی نوحه باشلادی اول معدن وقار
.
سس چکدی حال زینبه دشمنلر آغلادی
زهرا بهشتی ایتسه عزاخانه حقی وار
.
گاهی باساردی باغرینا صد پاره نعشنی
گاهی یاخاردی زلفینه قانین خضاب وار
.
بیر بیر هامی یارالارینی اوپدی ایگلدی
دوشمز گوروب اله ایله گلشن ایله بهار
.
اوپدی هامی یاراسینی، اوچ شعبه اوخ یرین
قلبینده گوردی، اولدی گینه قلبی داغدار
.
سویلوب دگیدی کاش بو اوخ قلب زینبه
تا دلمییدی قلبیوی بو تیر جان شکار
.
زینب او دوغرانان بدن اوستنده نیلدی
شرحیله #شانی اولماز ادا، ایله اختصار
.

#کوچ_کربلا
#گچدی_جدایه_چون_سر_سلطان_تاجدار
#شانی_تبریزی
#ترکی
.
#زبدةالاشعار
?: @nohe_torki