گیت علی اکبر اوغول اللّهَه تاپشوردوم سنی #اکبریه_راجی_تبریزی

وداع حضرت علی اکبر (ع)
.
#زبدةالاشعار
.
: @nohe_torki
.
مرحوم راجی
.
گیت علی اکبر اوغول اللّهَه تاپشوردوم سنی
شبه پیغمبر اوغول اللّهَه تاپشوردوم سنی
.
.
چک قلج حیدر کیمی بیر حمله ایت بو لشکره
ویر بو دشمن صفلرین مور و ملخ تک بیر بیره
ممکن اولسا بیر ایچیم سو آل علی اصغره
تشنه دور اصغر اوغول اللّهَه تاپشوردوم سنی
.
.
کربلا دشتین نجه گور شورش و غوغا دوتوب
خیمه لرده ایندیدن یاسون آنان لیلا دوتوب
بیر سنی اولدورمگه الده عدو یکجا دوتوب
نیزه و خنجر اوغول اللّهَه تاپشوردوم سنی
.
.
کربلا دشتینده سن بیر آهوی آزاده سن
توش اولورسان قورخورام بیر جان آلان صیاده سن
یکّه و تنها قالورسان بیر نفر شهزاده سن
چوخدی بو لشکر اوغول اللّهَه تاپشوردوم سنی
.
.
حسرتیم گویلومده قالدی آرزومه یتمدیم
هم دوتوب بیرده الون سمت حجازه گیتمدیم
نوجوانلار تک سنه زینت ایدوب طوی ایتمدیم
گورمدون زیور اوغول اللّهَه تاپشوردوم سنی
.
.
چکدیم اون سگّیز ایل ای شبه پیمبر زحمتون
گوز یاشیله بسلدیم سرو صنوبر قامتون
ظلم الیله ایلدی آخر کفن طوی خلعتئن
شمر بد اختر اوغول اللّهَه تاپشوردوم سنی
.
.
گتدی قربانگاه عشقه شاه مظلومان سنی
حق یولوندا تا خلیل آسا ایده قربان سنی
گر آنان گورسه بو چولده قانوا غلطان سنی
سینه چاک ایلر اوغول اللّهَه تاپشوردوم سنی
.
.
سالما درده فرقتون غملر محلی گویلومه
چون گیدیرسن تز قییت پر وِیر تسلی گویلومه
موسیِ عشقم علی ایله تجلّا گویلومه
مهرپر انور اوغول اللّهَه تاپشوردوم سنی
.
.
قویما بو لیلانی اولسون دلفکارون حشره تک
راضی اولما کی اولا بی غمگسارون حشره تک
گلمسن واللهی راه انتظارون حشره تک
گوزلریم گوزلراوغول اللّهَه تاپشوردوم سنی
.
.
چون اولوبدی بینوا گویلوم مقامی کاکلون
قرخورام گتسن اولار برهم نظامی کاکلون
ایلسونله ظلم الیله قوم شامی کاکلون
قانله احمر اوغول اللّهَه تاپشوردوم سنی
.
.
اولموسان طالب چو ایندی باش و جاندان گیچمگه
بزم وصل لیچره آلوب جام اجلدن ایچمگه
راضیم منده کفن بو سرو قدّه بیچمگه
سرو سیمین بر اوغول اللّهَه تاپشوردوم سنی
.
.
(راجیا) بزم عزاده یوزمین آه و زاریلن
لاله گون ایله جهانی دیدۀ خونباریلن
سویله اهل ماتمه بو مصرعی تکراریلن
گیت علی اکبر اوغول اللّهَه تاپشوردوم سنی
.
.
#اکبریه_راجی_تبریزی
#اکبریه_شهادت
#گیت_علی_اکبر_اوغول_اللهه_تاپشوردوم_سنی
#ترکی
.
#زبدةالاشعار
.
: @nohe_torki