زبانحال على علیه السلام بر مزار حضرت زهرا سلام الله علیها
..
..
حاج غلامرضا عینی فرد زنجانی
..
..
گیجه لر قبریوه زهرا گلورم آغلاماقا
بالالار ائوده دی تنها گلورم آغلاماقا
..
..
تا قرانلوق چکوری کامینه دشت و دمنی
قاره پوش ایلوری جبریله هامی مرد و زنی
ظلمت شب سنه آغلور چاغیرور یاسه منی
ما خلق اولدی معزّا گلورم آغلاماقا
..
..
بو سکوتینده قرانلق سنه آغلور بیلورم
یل اسور توپراق اَلور گلشنه آغلور بیلورم
آغلورام من سنه، صحرا منه آغلور بیلورم
تنگ اولوب حیدره دنیا گلورم آغلاماقا
..
..
بو بلالر که گلوب فاتح خیبر باشینا
اورگیم قانینی تبدیل ائلیوب گوزیاشینا
سپورم اشگیمی مرجان کیمی قبرون داشینا
قبریدن ایله تماشا گلورم آغلاماقا
..
..
ایستمم ناله م اوجالسون یوخودان خلق اویانار
آیریلق شعله لریندن اورک آهسته یانار
حالیمه آگه اولوب احمد مرسل اوتانار
گورسه پوزقون منی طاها گلورم آغلاماقا
..
..
راضی اولمازدون عم اوغلون اورگین غم دوتسون
ایندی عهد ائتدی ئولونجه سنه ماتم دوتسون
فاطمه، شیعه گرک محنتون اعظم دوتسون
بی جهت قبریوه سانما گلورم آغلاماقا
..
..
من سنی قبریده آختارمورام ای فخر زنان
گون غروبینده اولور ظلمت و تاریک جهان
گون کیمی باتدون اولوب مغربون هر یرده عیان
رحلتون ایلدی غوغا گلورم آغلاماقا
..
..
بو مزارون سنه ای مهر ولا مغرب اولور
آیری بیر مشرقه سیر ایلوسن ای چشمۀ نور
مرقدون سینۀ سینادی اؤزون نخلۀ طور
نور پاک ید بیضا گلورم آغلاماقا
..
..
اورگیم آیریلقیندان قان اولوب فاطمه جان
اولموشام خانه نشین ای گل گلزار جنان
زور و زر حاکم اولوب شهره دوشوبدی خفقان
تاپورام بوردا تسلّی گلورم آغلاماقا
..
..
آشیانی پوزولان قوش کیمی آغلور بالالار
یالوارور دؤردیده یول قبریوین اوسته سالالار
قورخورام گئتمیه لر منزله بوردا قالالار
تا که جانلاری چیخینجا گلورم آغلاماقا
..
..
کیشیلر آغلیا عالمده برازنده دگل
نیلیوم آغلامیوم؟ ای چمن عشقیده گل
زندگیده هانی لذّت داریخور ائوده گوگل
بوشالا غملی اورک تا گلورم آغلاماقا
..
..
کیم ائدر باور علی سینه سینی داغلیالار
قلعۀ خیبر آچان پنجه لری باغلیالار
ئولدوروب همسرینی یاس دوتالار آغلیالار
دینه خاطر دؤزه اما گلورم آغلاماقا
..
..
دین آدیلان که عدو خلقه حکومت ائلیور
پایۀ عدلی یخور ظلم و جنایت ائلیور
نسل انسانلارا واللهى خیانت ائلیور
غربت دینه مجزّا گلورم آغلاماقا
..
..
اورگیم غصه لرین گر بیله داغلار داغیلار
ابر رحمت کسیلر گلشن و باغلار داغیلار
جنّ و انس اشگینی رخسارینه باغلار داغیلار
یعنی محشر اولو برپا گلورم آغلاماقا
..
..
یرمی اوچ ایل که آتان مردمی ارشاد ائلدی
سیندیریب بتلری توحید ائوین آباد ائلدی
ثانی بیر گونده او دانشگهی برباد ائلدی
منی تهدید ائدور حتی گلورم آغلاماقا
..
..
ذوالفقاریم ولی بیر گون یخاجاق غم قالاسین
قویمارام پیکر اسلامی خطر چولقالاسین
گونده ثانی قولوما شالیمی مین یول دولاسین
تا عدالت اولا اجرا گلورم آغلاماقا
..
..
دئمرم دردیمی بیگانیه ای کنز وقار
ساخلارام قلبیده دردون منی قبره آپارار
اؤزومه غصّه یمم دینه ورور ضربه بولار
ظلمه دامن ورولاندا گلورم آغلاماقا
..
..
گئجه نین دردی گونوزدن منه آسان گلوری
صبر و طاقت گئدوری رنج فراوان گلوری
گئت گل ائودن کسیلوب گلسه ده سلمان گلوری
او که شأنینده دی «مِنّا» گلورم آغلاماقا (1)
..
..
صبر دریاسینه غوّاص اولانون صبری هانی
عمرینون سولدی بهارینده گل ابری هانی
دیورم فاطمه ئولدی دیدیلر قبری هانی
قبریوی گورسدم حاشا گلورم آغلاماقا
..
..
گر حیا گئتسه اولار جامعه میدان فساد
اودی که نفسیله الله بویورور ایله جهاد
ثانی ئولدوردی حیانی چوخالوب استبداد
امتحاندور منه زهرا گلورم آغلاماقا
..
..
وای او گوندن که بولار غیرتی ئولدورسونلر
مظهر عزّ و شرف صولتی ئولدورسونلر
یعنی محرابیده حیثیتی ئولدورسونلر
قاریشار قان قانا اوندا گلورم آغلاماقا
..
..
کربلا فاجعه سی عالمه طوفان سالاجاق
بیر منافق لر او گون من بیلورم قان سالاجاق
لرزیه عرشیله فرشی او گون عدوان سالاجاق
بودی آل اللها فردا گلورم آغلاماقا
..
..
محنتون یاد ائلیوب یاندی گینه «عینی فرد»
مشگلی اولسا دیر فوری سنه «عینی فرد»
مرثیه جای مقالیله سنه «عینی فرد»
یازدی خوش دوشدی بو املا گلورم آغلاماقا
..
..
۱ – السلمانُ مِنا اهل البیت حدیث نبوى
..
..
#فاطمیه #عینی_فرد #فاطمیه_شهادت #ترکی #زبدةالاشعار
نظر دهید