کرامات حضرت رقیه(س)
خبر
.
✍️ #زبدةالاشعار ✍️
.
🆔: @nohe_torki
.
کربلایی بهروز بلادی اردبیلی
.
گینه ده غم گتیروب درده منی اهل عزا
آغلیام قلبی یارا یاریمه قلبیم بوشالا
.
.
عاشیقم بیر آدا من عشقیده پرونده سی وار
گون به گون تازه لنن شهرته پاینده سی وار
سنّی گر آزدی ولی منصبِ ارزنده سی وار
قاپوسون کیم دوگه امّیدیله واللهی آچار
دردمندی قاپیدان بوش یولا سالسا اوتانار
.
.
ای یهودی چاغیران وقتده الیندن یاپوشان
ای گوگرمیش الیلن نسخه مریضانه یازان
ولی اوز دردینی زهرا کیمی قبره آپاران
دردی درمان سیز اولان درده نتایج تانینان
قولسوز عبّاس کیمین باب الحوائج تانینان
.
.
سنی امیدیله چوخ دردی اولاننار چاغیروب
مرض مهلک الیندن یورولاننار چاغیروب
آدووی دادینه مشگلده قالاننار چاغیروب
چاره سیز دردّیلره دهریده درماندور آدون
نظر ایت غملرینه صاحب احساندور آدون
.
.
بو خبر کی یازورام دفتره ای اهل ولا
لطفونی یاریم اگر ایلسه بو یولدا عطا
تا یازام بو خبری فیض آپارا اهل عزا
یازا یارین آدینی دفتره عشقیم تلسور
ای عزا اهلی علملر کیمی بو قلبیم اسور
.
.
گزسه ویرانه دوزعاشق بلی گنجینه تاپار
گنج عشقی تاپان عاشق دل بی کینه تاپار
رسمیدورعاشقینی عاشق دیرینه تاپار
بیر خانم اوز آقاسیلن گذری شامه دشوب
حکم کنسول گری الده او بلاده یتشوب
.
.
شامیده ویردیله بوعورته بیرهم صحبت
بواقامتده اِئده بو خانما تا خدمت
حسن نیّتله اِئده همدمینه چوخ حرمت
بیر گونی ایسته دی شهری گزه بازاره گئده
دولانا کوچه و بازاری بیر آز گردش ائده
.
.
ظهر وقتیدی گلوبلر در صاحب کرمه
بو فرنگی خانمون دوشدی گوزی بیر علمه
سوز آچوب ایسته دی واقف اولا هر کیف و کمه
قاپی آغزیندا سوروشدی بو کیمین پرچمی دور
عرب عورت دِئدی بو بزم عزا شبنمی دور
.
.
وارد اول صحنه گوزل ایستمه لی مرقدی وار
اوچ یاشیندا بو قیزین چوخلی دخیل همقدی وار
ئولن آق گیسه بونون قاره کفن چرقدی وار
غربی عورت دئدی پس بوردا نیه آغلولار
بعضی سی سینه ویرور بعضی سی دل داغلولار
.
.
روبرو گلدی ضریحیله دوروب ائتدی بیان
کیمدی قبر ایچره یاتان ایله بو اسراری عیان
دئدی مظلومه رقیّه ایلدی آه و فغان
آغلیا آغلیا ذکرائتدی حسینون قیزیدور
نسخه امراضه یازان بزم عزانون دوزیدور
.
.
او دئدی طبّیده استادیدی لقمانه مگر
اوچ یاشیندا قیز اوشاقی نه طبایت ایلر
گورمه میش درس الفبا مرضِ خلقی ایلر
بو دئدی طبّیده استادیدی مین لقمانه
چوخ اطبّا اوزی گلمیش بو قیزا درمانه
.
.
عرض ائدیب شک ایلمه چوخ مرضه نسخه یازوب
عالم طبّیده دنیایه بو آوازه سالوب
چاره سیز دردی اولان چاره بو درگهدن آلوب
دئدی بو یاره لی نیلر یارالی اولسا بیری
علم طبّی بیله بیلمزدی گر اولسیدی دیری
.
.
عرب عورت دئدی قبر ایچره یاتوب سینه یارا
هیچ کسی بوش یولا سالماز قاپوسیندان بو بالا
مکتبِ فاطمه ده گر بیری درسین اوخیا
بولارا ارث ویرن طبّی خانم فاطمه دور
آناسی نابغه دور بو نوه سی عالمه دور
.
.
گینه تکرار ائدورم ایلمه شک ایتمه گمان
خواب غفلتده یاتوپسان بیر اویان سن یوخودان
دادووه سن چاغرارسان بو قیزی غملی زمان
غم ویرنده سنه ئوز اوندا بیلرسن کیمدور
الون الدن یوزولن وقته گوررسن کیمدور
.
.
دئدی استاد اولا لقمانیله سقراطَه اگر
غربیده علم طبابت بو ائدن طبّ دگر
عِلم سیز طبّ بشر هیچ مرضه ویرمز اثر
عرض ائدیب دینمه بو طبّون باشینون سایه سیدور
نسل پاکی بو قیزین علم لرین پایه سیدور
.
.
بار آخر دئیورم بو سوزی من ایلمه شک
منیلن گل خانمون خردا مزاریندن اوپک
بیز رقیّه خانما عرض ارادت ایلیک
یارالی جسمینه درمان خانمون گوز یاشیدور
کربلادن بی بی سی زینبه بوغم باشیدور
.
.
گون باتاندا ئورگین غصه وغم داغلاردی
درِ ویرانه ده حسرتله دوروب آغلاردی
سیریدن آغلاماسی ره گذری ساخلاردی
خردا قیزلاری گورن وقتیده اصغر باجیسی
الی قوینوندا دوراردی علی اکبر باجیسی
.
.
بو بالا شامیده جان ویردی ئورک داغلادیلار
وای رقیّه دئدیلر آل عبا آغلادیلار
ای عزایه جمع اولان شیعه کفن تاپمادیلار
بو فرنگی خانما ایتمدی بو سوزلر اثر
دیدی امّا عرب عورت گورک اللّه نیلر
.
.
صحنی ترک ایلدیلر منزله یول باشلاندی
عرب عورت دئدی اللّه ئورگیم شان شاندی
اِئوه جک ذکر ایلدی بوغمه قلبیم یاندی
غربی عورتده ائوه گئتدی عرب عورتیده
او یاتوب دوردی عرب آچدی باشین نوحه دیه
.
.
دئدی سن تک بوگئجه یاتمارام آی الده ئولن
صُبحه جک آغلیارام آی یوزونه سیلی دگن
آی ئولن وقتده یارالی دوداقی قانلی ئوپن
یول یول اولموش قولووا غملرووه آغلیارام
قلبیمی یاره لی قلبون کیمی من داغلیارام
.
.
وقت او وقت اولدی کی شاماتی اولار ترک ائده لر
موطن اصلی سینه یعنی فرنگه گئده لر
او خانم ویردی عرب عورتینه تازه خبر
نئچه آیلیق دئدی بطنیمده اوشاق وار گئدورم
ایستورم بو خبره من سنه بیر هدیه ویرم
.
.
گئتدیلر کئچدی نئجه آی دولانوب چرخ زمان
وضع حملینده خانم اولدی ئورکدن نگران
قوی آچوم بوخبری خلقه اولا گون تک عیان
وضع حملینده بیوک مسئله گلدی قاباقا
دئدی دکتر یا بالا ئولمه لیدور یا بو آنا
.
.
عورته ویردیله تا غملی اولان بوخبری
ائشیدن وقتیده مرگ آدینی یاندی جگری
آغلادی آغلادی قلبینده دولاندی نظری
دئدی ای خرداجا قبر ایچره یاتان داده یتیش
سسلدیم من سنی امیدیله امداده یتیش
.
.
یارالی اللره قربان منه سن ایله عطا
سن کرم صاحبی سن یاز منه ارزنده دوا
دئیرم هر کسی گورسم منه کیم ویردی شفا
جان رقیّه منی عفو ایله دوا ویر مَنَه ده
نیلیوم آرزولاریم چوخدی شفا ویر مَنَه ده
.
.
پرچم اوسته یازیلان آدووه قربان یارالی
من مریضم ئوزون ائت دردیمه درمان یارالی
عِلم سیز طبّووه قربان ایله احسان یارالی
قوی اطبّایه دیوم تاج اطبّا آدینی
بیلدیم ایندی قسم اوز آدووه عشقین دادینی
.
.
سن بیل اصغر توت الیمدن ایله سن احسانی
عمّه وون خاطرینه لطفووی ائت ارزانی
اولمیان فاطمه تک یاره سینون درمانی
قان دولان گوزلره قربان منه احسان ایله
آی علینون نوه سی دردیمه درمان ایله
.
.
آند وئرّم سنی یوللاره باخان گوزلرووه
آند وئرّم سنی قلبونده قالان کوزلرووه
زینبین سینه سین اوخ مثلی بولن سوزلرووه
توتموشام من اتکوندن منی سن قوما خانم
آی سنان قلبی منیم قلبیمی سندرما خانم
.
.
گووَرَن اللرین آچدی دئدی ای ربّ جلیل
من حسینون قیزیام سن ایلدون حشره کفیل
بیر یهودیدی گلوب درگه احسانه دخیل
منی سیندرما آدیملان اونا سن ایله دوا
وئر بیبیم زینبه خاطر بو یهودیه شفا
.
.
عرشیده غملی سوزه اهل سما آغلاشدی
گوورن اَللره خاطر اَلین حورا آشدی
رحمت لم یزلی جوشه گلیبدور داشدی
ایپ کَسن اَللریلن درده دوا وئردی خانم
قان دولان گوزلریلن باخدی شفا وئردی خانم
.
.
بو خبر حیرته دکتورلری سالدی او زمان
سوروشوب شوهری سویله منه اصل جریان
ندورعلت کی ئولوبسان بوقدرخنده کنان
دئدی بیر خیرداجا دکتور منه احسان ایلدی
شامیدن گلدی منیم دردیمه درمان ایلدی
.
.
مین امیدیله چاغیردوم اونی قلبی دولی غم
سنی زهرا ننوون حرمتی منده ننیم
بئله چوخ ایستمه لیدی ولی نیلیدی ئوزی
یاندیرار دردی منی قانیله دولموشدی گوزی
.
.
ای عزا اهلی یوخیدی خانمون چاره لری
یاندیرار فاطمه نون سینه سینی یاره لری
حشره جک قالدی ربابون باشینون قاره لری
کنج ویرانه ده یثرب گولی تالان اولدی
گوزلره اشک محن، سینه لره غم دولدی
.
.
قاره توپراقلارون اوسته سریلوب قاره تلی
کربلا بلبلونون ظلمیله باغلاندی دیلی
اَلینه غملی رباب آلدی شفا گستر اَلی
در ویرانیه باخدی چاغیروب سقانی
یاندیروب ناله سینه اَلده ئولن زهرانی
.
.
خاک ویرانه قیزیم غملی وطن اولدی سنه
اکبرون قاره سی غربتده کفن اولدی سنه
حجله سی غارت اولان نوحه دیین اولدی سنه
یول گودَن گوزلرووه دیدهٔ زاریم قربان
سیلی دگمیش یوزووه ایل و تباریم قربان
.
.
کربلا حسرتی دردونده سنون یاندی بیبون
دامنون تک ننون ئولسون بالا اودلاندی بیبون
اصغرین حلقی کیمین محنته اوخلاندی بیبون
علی اکبر گوزلی دور ائویمی یئخدی فلک
سن یات آسوده فلک ائتدی منی قاره لچک
.
.
باجی قارداش ایلدوز سینه می شان شان ئولدوز
بیروزعطشان,بیروزآج,دیده سی گریان ئولدوز
یاروزون اولمادی هیچ دردینه درمان ئولدوز
بو «بلادی» اَل آچوب دور سیزه احسان ائده سوز
نوکر آل عبا دردینه درمان ائده سوز
.
.
.
.
#حضرت_رقیه_بلادی_اردبیلی
#حضرت_رقیه_مدح
#گینه_ده_غم_گتیروب_درده_منی_اهل_عزا
#ترکی
.
✍️ #زبدةالاشعار ✍️
.
🆔: @nohe_torki
نظر دهید