زبان حال حضرت اباعبدلله الحسین(ع) در بالین برادر
.
✍️ #زبدةالاشعار ✍️
.
🆔: @nohe_torki
.
مرحوم رجایی تبریزی
.
یاتما بو قان ایچره ای پشت و پناهیم دور گیداخ
ای امیر لشکریم ای سر سپاهیم دور گیداخ
.
.
گلموشم امدادوه روح و روانیم آچ گوزون
دشمنه تأثیر ایدر آه و فغانیم آچ گوزون
جانوه قربان اولا بو خسته جانیم آچ گوزون
ای امیر لشکریم ای سر سپاهیم دور گیداخ
.
.
غم گونونده سن منه بیر مونس و غمخواریدون
اهل بیتون عزّتیدون لشکره سرداریدون
قلبیم آسودِیدی قارداش هر قَدَر سن واریدون
ای امیر لشکریم ای سر سپاهیم دور گیداخ
.
.
خیمه لرده صف چکوب اهل حرم خورد و کبار
اَلده سو جامی اوشاقلار پیشوازه دوردولار
بولدولر یاتدی علم گوز کاسه سین دولدوردولار
ای امیر لشکریم ای سر سپاهیم دور گیداخ
.
.
بو مصیبت منده هرگز قویمادی صبر و قرار
قیزلارون حالین گورنده آغلادیم بی اختیار
آت گتوردی زینبیم بیر نحوله ایتدی سوار
ای امیر لشکریم ای سر سپاهیم دور گیداخ
.
.
حالمی پوزقون گورنده عترتیم باش آچدیلار
موج ایدوب گوز یاشلاری گوز کاسه سندن داشدیلار
سس سسه ویردی حرملر قیزلاریم آغلاشدیلار
ای امیر لشکریم ای سر سپاهیم دور گیداخ
.
.
دیلده یارا یوخدی قارداش شرح ایدم احوالیمی
هامّودان آرتوخ سکینه حالی پوزدی حالیمی
اَلده سو جامی یغوب دور باشنه اطفالیمی
ای امیر لشکریم ای سر سپاهیم دور گیداخ
.
.
شرحه یوخ حاجت حیاتیمدن بولورسن دویموشام
رونق دین آختاروب دنیا لباسین سویموشام
اکبریمدن گیچموشم لیلانی آغلار قویمشام
ای امیر لشکریم ای سر سپاهیم دور گیداخ
.
.
سنده ایتدون بو مقدّس یولدا قربان جانوی
سو یرینه گلستان دینه ویردون قانوی
خلقه اثبات ایلدون اوز پایۀ ایمانوی
ای امیر لشکریم ای سر سپاهیم دور گیداخ
.
.
اَل حیاتوندن چکوب ایتدون حمایت دینوه
قویمادون صدمه یتیشسون مذهب و آئینوه
دین یولوندا ووردولار اوخ دیدۀ حق بینوه
ای امیر لشکریم ای سر سپاهیم دور گیداخ
.
.
بیر جهاد نفسله یتدون بو عالی منصبه
جان نثار ایتدون آتام اوغلی مقدّس مذهبه
وای منیم احوالیمه ایوای بلالی زینبه
ای امیر لشکریم ای سر سپاهیم دور گیداخ
.
.
ای وفا کانی یوخوم دور هجروه تاب و توان
حالیمی گوزدن آخان اشکیم سنه ایلور بیان
چوخدی قارداشی اُلَن یوخ من کیمی آغلار قالان
ای امیر لشکریم ای سر سپاهیم دور گیداخ
.
.
نه شقاوت صاحبیموش کوفیان بی وفا
کیم گوروب بیر جسمه وورسونلار بیله سانسیز یارا
کاسۀ مغزون هارا قارداش عمود کین هارا
ای امیر لشکریم ای سر سپاهیم دور گیداخ
.
.
ایلین تیره جهانی دود آهیم دور منیم
یا سبب بو ظلمته مخسوف ماهیم دور منیم
تار اولوب عالم منه الله گواهیم دور منیم
ای امیر لشکریم ای سر سپاهیم دور گیداخ
.
.
گوز یاشیم بی جا توکولمور صورته وار علّتی
ذلّته اولدی مبدّل اهل بیتون عزّتی
استراحت بیرده گورمزلر پیمبر عترتی
ای امیر لشکریم ای سر سپاهیم دور گیداخ
.
.
وار یری بیر عمر بو غمده دِیَم واحسرتا
قویماز اعدا زینبیم سندن صورا راحت یاتا
سسلنور اهل حرم واغربتا واذلّتا
ای امیر لشکریم ای سر سپاهیم دور گیداخ
.
.
کیمسه بولمز وار بو صحراده نه احوالیم منیم
اولسا قارداشی اُلَن آنلار ندور حالیم منیم
بس کیمه اولسون پناهنده بو اطفالیم منیم
ای امیر لشکریم ای سر سپاهیم دور گیداخ
.
.
دور اوتور بو چولده بیر کابینۀ شورا قوراخ
اوخلانان سو مشکنی اشکیله باهم دولدوراخ
پرچم اسلامی قلب لشکر کفره ووراخ
ای امیر لشکریم ای سر سپاهیم دور گیداخ
.
.
یوخدی فرصت شرحنه چوخدور اورکده نیسگِلیم
بولمورم گوز یاشمی یا گوزلرون قانین سیلیم
قالمارام سندن صورا دنیاده من سندی بّلیم
ای امیر لشکریم ای سر سپاهیم دور گیداخ
.
.
اود ووروب یاندوردی دنیانی گروه اشقیا
بولمورم قیمت ندور عالمده بیر شربه سویا
کوفیان بیر عدّه اطفالون گوزون یولدا قویا
ای امیر لشکریم ای سر سپاهیم دور گیداخ
.
.
سعدون اوغلی قتلوه گیرم بیله فرمان ویروب
بی وفا شام اهلی بو امره نیه اذعان ویروب
هانسی سقّا سو کنارینده لب عطشان جان ویروب
ای امیر لشکریم ای سر سپاهیم دور گیداخ
.
.
دور گیداخ اهل حرم بو حاله سینه داغلاسون
قیزلاریم زلفون آچوب اشکین توکوب قان آغلاسون
ایتمه نیسگِل یوخ آنان زینب یاراوی باغلاسون
ای امیر لشکریم ای سر سپاهیم دور گیداخ
.
.
نیلرم دنیانی قارداش اولمیه گر لشکریم
ظلمله اوغلوم اُلَه قانه باتا سرلشکریم
گورسه لر من یالقوزام جرأت تاپار دشمنلریم
ای امیر لشکریم ای سر سپاهیم دور گیداخ
.
.
ای «رجائی» هامّونون عبّاسده وار دور گوزی
معدن جود و سخا باب الحوائج دور اوزی
اَل گوتورمه آغلا یاز قارداش دیلینجه بو سوزی
ای امیر لشکریم ای سر سپاهیم دور گیداخ
.
.
.
#عباسیه_رجایی_تبریزی
#عباسیه_شهادت
#یاتما_بو_قان_ایچره_ای_پشت_و_پناهیم_دور_گیداخ
#ترکی
.
✍️ #زبدةالاشعار ✍️
.
🆔: @nohe_torki
نظر دهید