زبدةالاشعار

ای اولان عاشق دربار حسین بن علی #حضرت_رقیه_رسولی_زنجانی

جریان سیّد ابراهیم دمشقی
.
.
.
حاج جواد رسولی زنجانی
.
.
ای اولان عاشق دربار حسین بن علی
سنی تأیید ائلیوب خالق پاک و ازلی
وئره جاق مزدیوی محشرگونی زهرا و علی
شیعه ی پاک، جهنم اودونا یانمیاجاق
شرر ناریله قلبون ائوی اودلانمیاجاق
.
.
.
وار عزادارلیقا دربار حسینده درجات
کیم عزادار اولا کسب ایلیه جاقدی حسنات
وئروب الله او قدر نام حسینه برکات
آغلیوب آغلادان اشخاصه شفاعت ائده جاق
فاطمه اوغلی قیامتده قیامت ائده جاق
.
.
.
کیم بوگون آغلاسا محشرگونی زار اولمیاجاق
ایکی دنیاده چتین درده دچار اولمیاجاق
کیم کیچیتسه ئوزونی حشریده خار اولمیاجاق
سُفره گسترده دی نعمتله همیشه دولاجاق
هر کس ئوز معرفتیجه متنعّم اولاجاق
.
.
.
اشگیله غسل ائله گل آل عبا مجلسینه
پاک اول اوندان صورا باخ اهل ولا مجلسینه
قدسیان غبطه ائدور ایندی عزا مجلسینه
کیم بو دنیاده بهشت ایستسه بو بزمه گلر
تاحسینین آدی گلدی گوزونون یاشین الر
.
.
.
وار خبرده سنهٔ مین ایکی یوز هشتاددا
واریدی شامیده بیر سیّد پاک و والا
سیّد ابراهیم آدی نسل شریف زهرا
محترم شخصیدی بیر پیر نود ساله یدی
غصه دن قلب شریفی ائله بیل لاله یدی
.
.
.
اوچ قیزی واریدی اوغلی یوخیدی دنیاده
او سببدن بئله اولموشدی پری افتاده
آرزو کشتیسی غرق اولموشودی دریاده
دولاناردی باشینا قزلاری پروانه کیمی
هی باساردی اولاری باغرینا دردانه کیمی
.
.
.
بیر گونی صبح چاقی دوردی بویوک قیز یوخودان
توکدی گوزیاشینی گوزدن ائلدی آه و فغان
آغلیا آغلیا عرض ایلدی الان باباجان
یوخودا گوردوم حسین بن علینون قیزینی
شهر شامون او ایشیقلی آیینی اولدوزونی
.
.
.
منه امر ایلدی اول دختر پاک مولا
بو سؤزی دئ باباوا ایلمه هرگز پروا
قبریم ایچره سو دولوب جسمیمه ایلور ایذا
قبریمی نبش ائلیوب صدقیله تعمیر ائلسون
فاش اولونسون محنیم عالمه تأثیر ائلسون
.
.
.
دئدی سیّد یوخی حجّت دگی ای دختر ناز
بیر یوخیلان نجه مکشوف اولار عالمده بو راز
گئت قیزیم اللهیوا دلدن ائله راز و نیاز
دئمه بیر کیمسیه قوی پرده ده قالسون اسرار
باشدان آت ایندی بو فکری منه ائتمه اصرار
.
.
.
تا ایکیمجی قیز ایکیمجی گونی دوردی یوخودان
چوخ هراسان باخوب اطرافینه اول پاک روان
آتاسین گوردی او ساعتده اوخوردی قرآن
دئدی گلمیشدی رقیه بابا ایندی یوخوما
سنه قربان نچه لحظه داخی قرآن اوخوما
.
.
.
گنه ترتیب اثر وئرمدی سیّد سؤزونه
ائتدی تکرار اَوَلکی سؤزونی ئوز ئوزونه
گئتدی فکره الینی گتدی قویوبدی یوزونه
تا اوچومجی قیز اوچومجی گجه رؤیایه گئدوب
گوردی بیر منظره دلدن او بالا وحشت ائدوب
.
.
.
گوردی شهزاده رقیه گوزی گریان دولانور
اللرین باشه قویوب دردینه درمان دولانور
چاغیرور داده اباالفضلی پریشان دولانور
گل عمو قبریمه باخ اولما خجالت مندن
سو دولوب قبریمه دای ایستمورم سو سندن
.
.
.
هی دئیور الله آدامسیزلیق الیندن فریاد
منی دامه سالوب ایندی فلک بد بنیاد
خانم عمّم اگر اولسیدی ائدردی امداد
نه علی اکبره وار دسترسیم نه آناما
کاش بیر کس یتوریدی بو پیامی باباما
.
.
.
تا اوچومجی قیز اوچومجی گون اویاندی یوخودان
عرض ائدوبدی باباجان یوخدی بو اعضاده توان
چاره ایله بو چتین دردیمه ایندی باباجان
ائتمسن چاره صاقیندان گئچرم هی صولووا
یولارام زلفیمی ایندی توکرم من یولووا
.
.
تا گجه سیّد ئوزی عالم رویایه گئدوب
خانمی گوردی توکور گوزیاشینی محشر ائدوب
صبح وقتی یوخودان دوردی بیلورسوز نه ائدوب
یوخوسون والی شهره دئدی اول پاک ضمیر
شهرون اهلی بو بیوک واقعه دن اولدی خبیر
.
.
.
والی امر ایلدی جمع اولدی هامی اهل وفا
شیعه و سنّی یغیشدی علما و صلحا
غسل ائدوبلر اورک آیینه لری تاپدی صفا
دئدیلر آچسا بوگون کیم حرمین قفلین اگر
نبش قبر ائتماقی بو پاک حرمده او بیلر
.
.
.
هر کس آتدی الینی قفل حرم اولمادی باز
چوخلاری ایلدی درگاه حقه راز و نیاز
قفل باز اولمادی هر کس ائلدی سوز و گداز
سید ابراهیم الین وورجاق او در باز اولدی
صلواتیله دولوبدی حرم،اعجاز اولدی
.
.
.
والی امر ایلدی تا گتدیله بیر تازه کُلنگ
گنه هر کیمسه یره چالدی اولوب قافله لنگ
باتمادی تپراقا گویا که دگوب آهنه سنگ
سید ابراهیم اله آلدی کلنگی چکوب آه
دئدی لاحول و لا قوّه الّا بالله
.
.
.
تا کُلنگی یره ووردی اثر ائتدی خاکه
قبری ظاهر ائلدی ناله چیخوب افلاکه
هامی حیرتله باخوب قبریده جسم پاکه
قبریدن خارج ائدوب قویدی دیزی اوسته اودم
یوز وئروبدی هامی حضّاره غم و درد و الم
.
.
.
چکدی اوچ گون اولا تعمیر مزاری خانمون
سید ابراهیم اولوب تعزیه داری خانمون
سیلی دن نیلی اولوب گوردی عذاری خانمون
اوچ گونی نوحه دئدی آغلادی چوخ ئوز ئوزونه
نه یماق یاده دوشوب نه یوخی گلدی گوزونه
.
.
.
ایستدی بیرده قویا قبره او یورقون بدنی
دئدی بیر سؤز هامیا ائتدی اثر غم سخنی
کربلادن بونون ای کاش اولیدی گلنی
بالانی مندن آلوب کفن ائلییدی عباس
بو گوزل قبره قویوب دفن ائلییدی عباس
.
.
.
ایندی که یوخدی گلن دعوت ائدون مرثیه خوان
اوخشاسین بو بالانی باشه وُرا پیر و جوان
قلبیمون باشی یانور قالمادی جسمیمده توان
عمه سی زینبه خاطر هامی آچسون باشینی
اوخشاسون هم ئوزونی هم صودامر قارداشینی
.
.
.
زینبون بوشدی یری نوحه دیون سینه وراق
قبرینون اوسته گلون بیرده عزا بزمی قوراق
ننه سی فاطمیه خاطر ایاق اوسته دوراق
بو قیز اللرده ئولوب بیلسون هامی دنیاده
گئتمیوب قمچی یری ایندیده وار اعضاده
.
.
.
عرض ائدوب بار خدایا منه امداد ائله سن
بیر اوغول لطف ائلیوب قیزلاریمی شاد ائله سن
قوجالق وقتی اورک مُلکینی آباد ائله سن
اوچ قیزیم واردی که حسرتدیله قارداش یوزونه
ائتمه شرمنده منی باخ بو غریبون سؤزونه
.
.
.
مستجاب اولدی دعاسی ائلدی لطف خدا
کئچدی بیر ایل اونا الله بیر اوغول ائتدی عطا
مصطفی قویدی آدین حقه ائدوب حمد و ثنا
برکت وئردی اونون نسلینه خلّاق قدیر
سوره ی کوثری معنا ائلیوب خیر کثیر
.
.
.
امتیازی که او نسله وئروب عالمده خدا
الی یا آغزی مریضه دگه حتمیدی شفا
کیم اونون نسلیدی درد اهلینه خلق ائتدی دوا
اوچ یاشیندا بالانون قدرت اعجازینه باخ
زینبون لشکرینون خرداجا سربازینه باخ
.
.
.
ای«رسولی»باشا یتمز بو قیزون غصه لری
پنجم ماه صفر تازه لنر قصّه لری
معرفت اهلی خانمدان آلاجاق حصّه لری
پای وئرر غملی رقیه باش آچوب آغلیانا
هم شفاعت ائده جاق سینه سینی داغلیانا
.
.
#حضرت_رقیه_شهادت
#ای_اولان_عاشق_دربار_حسین_بن_علی
#رسولی_زنجانی
#ترکی #حضرت_رقیه
#زبدةالاشعار

متن پیشنهادی:  بھر ذرات بشر روز الست #حسینیه_بنائی_یزدی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی