یارب سن اوزون قیل منه یاری، گئجه یاری #راه_شام_کریم_نصیری

راه شام
.
زبدة الاشعار
.
?: @nohe_torki
.
کربلایی کریم نصیری
.
یارب سن اوزون قیل منه یاری، گئجه یاری
قورتار غم الیندن بو فکاری، گئجه یاری
.
.
من بُرج محبّتدن آخان اولدوزام الله
وحشتلی بیاباندا آدامسیز قیزام الله
سندن سورا یوخ دادرسیم، یالقوزام الله
رحمت نظرون سال منه ساری گئجه یاری
.
.
یوخ قافله موزدن اثر، آهیم اوجالوبدی
آرامیمی وحشت نئجه گور اَلدن آلوبدی
هئچ بولمویورم عمّه لریم هاردا قالوبدی
امدادیمه گلمور بیری باری گئجه یاری
.
.
احوالیمه قان آغلوری گؤیلرده آی اولدوز
داغلی اورگیمده اوجالور ناله ی جانسوز
شه زاده علی اکبره بیر ناز ائلیَن قیز
الآن دولانور تک بو دیاری گئجه یاری
.
.
بو بی کسین احوالینی ای کاش بوله عمّه م
یولدا گؤزومی قویمویا، داده گله عمّه م
گؤزلردن آخان یاشی ئوزومدن سیله عمّه م
بیرده گؤره بو پوزقون عذاری گئجه یاری
.
.
آرزوم بودی هجران داشینی بیر دم آتِیدوم
گؤز یاشلی گئدوب قافله ی عشقه چاتیدوم
بیر یولدا ربابون دیزینون اوسته یاتیدوم
سینَمده سؤنه غصّه شراری گئجه یاری
.
.
ذات حقه اولدی متوسّل او دل آگاه
اَل باشدا گؤزی یولدا، یانان قلبیده مین آه
دوشدی گؤزی بیر قدّی کمان عورته ناگاه
گؤردی تانیا بولمور او زاری گئجه یاری
.
.
گلدی دیله عرض ائتدی خانم ایلمه شیون
بو غملی بیاباندا هایاندان گلوسن سن؟
نه علّته باشدان ایاقا قاره گیوبسن؟
آگاه ائله بو درده دچاری، گئجه یاری
.
.
کیمسن بو یامان یرده منیم دادیمه گلدون؟
یاندی اورَگون ناله و فریادیمه گلدون
گؤردون که گلن یوخ منیم امدادیمه گلدون
دیندیر منی باری سنی تاری گئجه یاری
.
.
غم دفتریدور اوخشاماوین سطربه سطری
ئولموش کیمین آیا ائدیسن ناله بو قدری؟
اوتلی نفسیندن گلوری عمّه مون عطری
یاده سالور عطرون او نگاری گئجه یاری
.
.
باخدیقجا منیم حالیمه دیلدن یانیسان سن
دامانیوی اشک غمیله ایسلادیسان سن
سسلورسن آدیملا! منی هاردان تانیسان سن؟
ای من تک اولان غصّه شکاری گئجه یاری
.
.
سسلندی: قیزیم نار فراقه یانانام من
درگاهی شرارِ ستمه اوتلانانام من
سال قولّاریوی بوینوما زهرا آنانام من
دینجل بیر آز ای خسته قناری گئجه یاری
.
.
بیر قافله آهو سنه خاطر مَلَر ایندی
قیزلار یریوی بوش گؤروب اشکین اَلَر ایندی
صبر ایله داریخما خانم عمّه ن، گلر ایندی
ائتمه بو قَدَر گؤز یاشی جاری گئجه یاری
.
.
سن شامی قیزیم روضه ی رضوان ائده جاقسان
درمانده لرین دردینه درمان ائده جاقسان
بیر سُفره ده، مین حاتمی مهمان ائده جاقسان
روشن ائده جاقسان شب تاری گئجه یاری
.
.
#راه_شام
#یارب_سن_اوزون_قیل_منه_یاری_گئجه_یاری
#کریم_نصیری
#ترکی
.
#زبدةالاشعار
.
?: @nohe_torki