ولادت حضرت امام رضا (ع)
گریز به شهادت
.
.
.
.
مرحوم شعاع تبریزی
.
ایدن رشگ جنان بو گون جهانی بیر ضیا اولدی
شعاع حسن سلطان سریر ارتضا اولدی
.
.
اولان موسی ابن جعفردن نشانه حجت داور
قدم تا عالمه قویدی او وجه باقیه مظهر
تجلّای رخی ایتدی احاطه کونی سرتاسر
بو نورون طالعیندن منفعل شمس الضّحا اولدی
.
.
ایدر کسب شفق آی گون او خورشید دل آرادن
منوّردور او نوریله دل و دین طور سینادن
طلوعی هیکل کفری سالوب تاب و توانادن
اولان منکر ایکی دنیا اونا حقدن جدا اولدی
.
.
بو دنیایه قدم قویجاق او سبط احمد مختار
ترابه بوتراب اوغلی قویوب باش باشلادی اذکار
دوتوب سمت سمایه ال ایدیبدور وحدته اقرار
او نطقی واله و حیران گوروب اهل سما اولدی
.
.
تولّد تاپدی سلطان خراسان طیّب و طاهر
اولاندا مظهر نور خدادن نور حق ظاهر
او لوب مقهور او گوندن نور حقّه فاسق و فاجر
ایدنلر حقّینی کتمان دچار ابتلا اولدی
.
.
همینکه گون کیمی طالع رخ شمس الشّموس اولدی
بو عالم مایۀ رشگ سپهر آبنوس اولدی
بهشت عدندن برتر شرفده ارض طوس اولدی
او یر چون کعبۀ راز دل اهل ولا اولدی
.
.
اولوب یمن قدومیندن ملکلر خرم و خندان
مقام و شأنه سیر ایله اولوم من شأنینه قربان
ویریلدی جنّته زینت به امر خالق سبحان
کیمه خلّاقدن بیر بیله لطف آیا عطا اولدی ؟
.
.
ایدوب اسم رضا ایله مسمّا اوُل شهی خلّاق
رضا حق اوسته چون اولدى قضایه آدمه مصداق
اونون والهدی صبرینده سراسر انفس و آفاق
اودور کیم تربتی درد اهلینه خاک شفا اولدی
.
.
رضا آدلاندی عالمده او شاه دین بو معنایه
دیمیشدی صدقیله بسکه بلی اوّل بلایایه
دوزوب بیر عمر صبر ایتدی دایاندی جور و ایذایه
ایچوب جام بلا سرمست صهبای بلا اولدی
.
.
امان مأمون الیندن حقّی ناحق ایلدی تکفیر
جفاده قویمادی نقصان او کان حیله و تزویر
بو فکره دوشدی ئولدورسون امام عصری بی تقصیر
ایدوب نفسه اطاعت طالب جور و جفا اولدی
.
.
ویروب زهر جفا سالدی ایا قدان سبط طاهانی
پوزولدی حالتی پوزدی غمی جنّتده زهرانی
اسوب غم صرصری ایتدی بهار عمرونی فانی
حیاتیندن داخی محروم او شاه مقتدا اولدی
.
.
شرار نار ظلمیله دوتوب اود قلبی اودلاندی
دوداقلار پارچالاندى قان آخوب اکبادی دوغراندی
او رأفتله دولی بیر دل ایله یاندى الولاندى
گوزونده روز روشن برملا ظلمت سرا اولدی
.
.
غریبلر ضامنی پوزقون پریشانحال و دلخسته
یانا یانه آچوب قویدی اورک باشین تراب اوسته
یوزی یرده گوزی یولدا دیردی هر دم آهسته
باجی معصومه گل یاندیم ایشیم آه و نوا اولدی
.
.
دیردی هارداسان گاهی گوزوم نوری جوادیم گل
اوغول سال یاده غربتده بو رنجوری جوادیم گل
اله دشمنلرین گل گلدی منظوری جوادیم گل
داخی بو گوشۀ غربتده دردیم بی دوا اولدی
.
.
نجه جدّیم حسینون چاره سین اهل جفاکسدی
ترحّم ایتمیوب باشین سوسوز شمر دغا کسدی
منیمده چاره می مأمون بی شرم و حیا کسدی
یوبانما هارداسان تیز گل اوغول وقت عزا اولدی
.
.
#رضویه #شعاع_تبریزی
#رضویه_میلادیه
#ایدن_رشگ_جنان_بو_گون_جهانی_بیر_ضیا_اولدی
#ترکی
#زبدةالاشعار
نظر دهید