یازورام جامعه نون وضع محن باریندن #غارت_خیام_آسال_اردبیلی

#غارت_خیام
با مقدمه اجتماعی
.
زبدة الاشعار
.
: @nohe_torki
.
#آسال_اردبیلی
.
یازورام جامعه نون وضع محن باریندن
اوخیون دل سوزونی شاعرون اشعاریندن
.
چوخی اللهی آتوب تابع اولوب شیطانه
باشیده گیتسه حمایت ایده جک یاریندن
.
ولی ابلیس دنی دار فناده گورونور
کارگر مثلی چکور ایش بلی انصاریندن
.
هاردا ابلیس ویروب پول ربا یاری ویرور
هانسی کس سبقت آلوب مفتی سالاریندن
.
کیم یسه پول ربا حقیله پیکاره چیخور
خبری یوخدی خداوندیله پیکاریندن
.
ییوسن پول ربانی گیدوسن بیت حقه
کعبه صحرایه قاچور سن کیمی زواریندن
.
چوخی شیطانه ویرور داش ولی شیطاندی اوزی
کیم ییوب داش ده گوروم دهریده همکاریندن
.
مخفیانه باری یه گر ییوسن پول ربا
چک کناره بو ایشون ملتون انظاریندن
.
ویرمورم طول سوزه چون بیلورم لاشبهه
باخبردور هامی ایران وطن اخباریندن
.
ایستورم خارج ایدوب بعضی سوزی ثبت ایلیم
شاعر فاطمه نون باشداکی انباریندن
.
گر ظهور ایلیه الآن گل زهرای بتول
بعضی صحرایه قاچار وحشت دیداریندن
.
اوقدر ظلم ایلیوبلر چون اولار مخلوقه
وحشتی وار آقامون تیغ شررباریندن
.
هانسی آلامی یازوم هانسی محندن دانیشوم
غملری درک ایلیون ملتون ابصاریندن
.
ولی بیر غم ایلیوب فاطمه نون قلبینی قان
بو غم عظمادی اونا هر غم دشواریندن
.
داخی مخلوق آرا بی معنی اولوب حرف حجاب
غیرتون یوخدی خبر قوه لی اشجاریندن
.
بیر خانم سالسا اگر معجر زهرا باشینا
طعن و هزیان اشیدر محرم اسراریندن
.
بی کلاسی تانینور کیم ایلسه حفظ حجاب
ملک حیرتده قالوبدور بشرون کاریندن
.
اونقابی کی سالور اهل حیا سیمایه
باشدی اول پرده یقین کعبه نون استاریندن
.
بی حجابلار دولانور شهریده آسوده ولی
باحجابلار آسیلور حجب و حیا داریندن
.
ای اوکی گورسدوسن زلفووی خلق اللهه
کسب ایله درس حیا فاطمه رفتاریندن
.
یاکی بیر یول گوزون آچ عشقیله سرمکتبه باخ
کربلا نهضتینی زنده ایدن زینبه باخ
.
ویردی غارتده خانم دشمنه زیب و زرینی
آند اولا فاطمیه ویرمدی اوز معجرینی
.
دیدی زهرا قیزی لازمدی ایده حفظ حیا
چون حیائیله قالار زنده یقین دین خدا
.
زینبم ام ابیها و علی دختریم
اسرا لشکرینون شامه کیمین رهبریم
.
قویمارام لطمه یته عصمتیمون دامنینه
ویرمرم فرصت توهین شرف دشمنینه
.
آند اولا شیرخدانون ابدی عزتینه
آند اولا فاطمه نون عصمتینه عفتینه
.
آند اولا حضرت احمد گتیرن قرآنه
آند اولا کرب وبلاده یخیلان سلطانه
.
آند اولا قیزلاریمون دیده ده اشک ترینه
آند اولا لشکریمون باشدا قرا معجرینه
.
تا قیامت منی محبسده اگر ساخلیاسوز
قولومی بند اسارتله اگر باغلیاسوز
.
بی جهاز اشتره گر قیزلاریمی میندیره سوز
تازیانیله آدامسیزلاریمی دیندیره سوز
.
غیرت آئینه سینی کبریله گر سیندیراسوز
فاطمه قلبی کیمین پیکریمی یاندیراسوز
.
.
جسمیمی نیزه و شمشیریله گر یوخلیاسوز
قلب شاه شهدا تک سینمی اوخلیاسوز
.
عود یاندیرماقا من مجمریمی ساخلیارام
مین حسینی ویررم معجریمی ساخلیارام
.
ولی اعراب کثیف بدوی نعره زنان
قمچیلر الده اولوبلار خیم شاه روان
.
گوردی زینب کی ویروب مرکبینه خصمی جلو
قیودوب خیمه گهه چاتمامیش اخیامه عدو
.
امر ایدوبدور چیخادون قیزلارا زیب و زروزی
بلکه بو نوعیله حفظ ایلیه سوز پیکروزی
.
سورادن آلدی نچه معجر زرداری خانم
بلکه اشباع ایلیه دیدۀ اشراری خانم
.
بولدی هر معجری نچه یره دریای وفا
هر بلوک معجر آرا قویدی خانم قطعه طلا
.
دیمه عاشور خانم زینبه محشردی بوگون
معجری کیسه مثالی ایلیوب ویردی دوگون
.
تلین اوسته یتیشوب تا سپه ابن زیاد
سسلدی زینب ایا لشکر کین قوم عناد
.
بیلورم سیز نیه خاطر ایدوسوز قصد خیم
نقدر واردی طلا خیمه ده جمع ایلمیشم
.
آتدی اعدایه طرف جمله خانم کیسه لری
تا کی راضی ایلیه قوم زحق بی خبری
.
هرز علوفه یین اعراب کثیف بدوی
ایلسه خیمۀ بی صاحبه گر پیشروی
.
فکر ایله قطعه طلائیله مگر راضی اولار
اوندا شیطان رجیم ایشلرینه قاضی اولار
.
ابن ذی الجوشن دون امر ایله دی بی پروا
توکولون خیمه لره ای سپه شوم و دغا
.
او خیامی کی حسین قیزلارینا مسکنیدی
وقت غارت خیمون یکسره سی دشمنیدی
.
یوم گوزون ایله تصور او چولون منظره سین
ایشیدرسن خانیموم زینبون ای وای سسین
.
بیری غارت ایلیور ترمه اعلا و حریر
گیدور اما بیری آغوشه آلوب رخت کثیر
.
بیری اندامه گیوب شاه ولا جامه سینی
بیری اما آپاری اکبرون عمامه سینی
.
کف دستینده دوتوبدور بیری گوشواره گیدور
بیری غارت ایلیوب خیرداجا گهواره گیدور
.
بالا قیزلار توکولوب چوللره آهو مثلی
یوز قویوب سمت بیابانه حسینون گوزلی
.
درک ایدوب واردی کمینینده اونون اعدادن
ایسته دی اوندا مدد فاطمۀ زهرادن
.
سسلدی داده یتیش آی ننه یاندی اورگیم
اورگیم مثلی یانور نار جفاده اتگیم
.
آغلیور گور نجه گلشنده گل یاس منه
بویور ای بضعۀ طاها بوگل یاسمنه
.
بیرقیزعالمده اولاشیرخدانون نوه سی
اولااولاد رسول الله اونون خویش وکسی
.
بیرقیزعالمده اولا اکبرواصغرباجیسی
قاره معجرله اولاکعبه عشقین حاجیسی
.
مست ایدن لعل شکرخاسی بوتون قدوسی
دائمابوسه گه زینب اولان مه روسی
.
بیرقیزعالمده گزه گلشن وباغ وچمنی
مات ایدن فیض کمالی بوتون اهل وطنی
.
بیرقیزعالمده اگرطیب الانفاس اولسا
بیرقیزین نازچکنی حضرت عباس اولسا
.
بیربیله قیز آناجان من قالان احواله قالار
قوریوب دل دوداقی سوزعطشدن سارالار
.
بیربیله قیز غم اوخون سینه عشاقه ساچار
پا برهنه الی باشدا تیکان اوستونده قاچار
.
ناگهان چاتدی بو اوچ یاشدا قیزا بیر جانی
معجری باشدان دوگون باغلی بیله دامانی
.
صورتیندن رخ ابلیس نمایان گورونور
دوزدی انساندی ولی باطنی حیوان گورونور
.
تا او نادان عربی گوردی او قیز گلدی دله
دیدی صبر ایله بیراز تا چاتا مقصودون اله
.
او قیزون سوزلرینه باخمادی اول پست و دنی
ایتدی بیر ظلمی کی یاندیردی دل فاطمه نی
.
دیدی ای خرداجا قیز بسدی تمام ایت سوزووی
گوشوارونده گوزوم واردی ایتیرمه اوزووی
.
دیدی اول خردا بالا سالما بلایه باشیمی
ئولدوروبسوز سوسوز اللرده جوان قارداشیمی
.
هیچ بیلورسن کی بو گوشواره نه گوهردی منه
یادگار گل لیلا علی اکبردی منه
.
دیمرم یابن الحسن نیلدی اول بی ایمان
او قیزون لبلری تک تیتردی ارکان جهان
.
دوتدی بیر نوعیله اول خصم علی زیوردن
قولاقین قانی آخوب دامنینه معجردن
.
دوزدی ظاهرده رقیه قولاقین پاره لدی
باطنا فاطمه نون سینه سینی یاره لدی
.
.
#پندیات
#یازورام_جامعه_نون_وضع_محن_باریندن
#ترکی
.
#زبدةالاشعار
.
: @nohe_torki