بیر اربعیندی اولوبدور یزیده اسیر سلسله زینب #اربعین_بیخود_سرابی

اربعین
..
..
مرحوم بیخود سرابی
..
..
بیر اربعیندی اولوبدور یزیده اسیر سلسله زینب
خلاص اولوبدی گلوب قبروه ایدر گله زینب
..
گرک نقدری ساغام آغلیام سنه گیجه گوندوز
نجه روا اولى سندن صورا دیوب گُله زینب
..
ایدوبله تیشۀ ظلمیله پاره پاره حسینجان
او نخل لر که یتورموشدی تازه حاصله زینب
..
عبث اسیر اولوب شامه گیتمدوم قولی باغلو
اولوبدی بسته جدا أؤسته زلف و کاکله زینب
..
گلنده تخت روانیله کربلایه گلوبدور
گیدنده شامه مینوب بیر شکسته محمله زینب
..
بیور حسین یارالی جسموی مزاره قویوب کیم
قویوب جنازه وی عریان گیدوب بله ، بله زینب
..
دولانمشام باشویله دیار کوفه و شامی
گیدوبدی قوللاری باغلو نجه محافله زینب
..
گوروب حسین ایکی مجلسدہ خیزران دوداقندا
بیرینی کوفه بیرین شامده نه حالیله زینب
..
دمشقه کیمی علی ، مشق ایدوب گیده گیده لیلا
ایدردی ورد حسین شامدن گله گله زینب
..
گیدوب گلینجه غمونده غذاسی خون دل اولدی
گوتورممشدی اخا اوزگه زاد و راحله زینب
..
اولوبدی بحر مصیبتده غرق ، زورق صبری
محال امریدی چخسون ئولنجه ساحله زینب
..
نه باک رونق دنیا یوخوندی غم یمه «بیخود»
ویرور برات شفاعت جزا گونی صله زینب
..
..
#اربعین #بیخود_سرابی #ترکی #زبدةالاشعار