یا رب اولوب بو غملی دله دلبر اصغریم #اصغریه_حضرتی_ناعمی

میلادیه حضرت علی اصغر علیه السلام
.
.
.
علیرضا حضرتی(ناعمی)
.
یا رب اولوب بو غملی دله دلبر اصغریم
یعنی وئروبدی زندگیمه زیور اصغریم
.
بیر نازدانه درّیدی دریای عشقیده
گنج شرفده سئوملی بیر گوهر اصغریم
.
گهواریه سالوب چالارام لایلای اونا
دنیا بویی آناسینا ناز ایلر اصغریم
.
زهرا باغیندا بیرجه گولون باغبانی‌ام
اولموش ربابه عالم آرا مفخر اصغریم
.
بلبل‌لری بو نازلی گولوم ایلیوبدی مست
چون کی رقیّه باجی‌سینه بنزر اصغریم
.
اخم ایلینده باشیمه دنیا بوتون اوچار
دؤزمم کی بیر دقیقه اولا مضطر اصغریم
.
پروانه‌لر کیمین باشینا پر ویرار رباب
یاخشی ائدوب آناسینی سوداگر اصغریم
.
شهلا گؤزونده موج ویرور عشق و شور و نور
هر بیر باخیشدا خلق ایلیور محشر اصغریم
.
گولدن لطیفدور بالامین جسم اطیبی
دگجاق نسیم گول تک اولور احمر اصغریم
.
قاره تئلیندن عطر جِنان روحیمه گلور
یورقون وجوده جاندی بو جان‌پرور اصغریم
.
مین یول اؤپوب دوداقلارینی، دویمورام ولی
عاشق دلینده بس کی عطش بسلر اصغریم
.
چوخ آرزیلار واریمدی بو زیبا ستاره‌مه
اکبر مثالی بیر گون اولار اکبر اصغریم
.
اول گون جهانه فخر ائدرم کی آناسیام
قالماز غمیم، اولار آنیا یاور اصغریم
.
آدی علیدی، غیرتین اول شهدن ارث آلار
چون خلق اولوبدی مرتضوی‌جوهر اصغریم
.
قدّی رشید اولار، بالامین هاشمیدی چون
فکر ایلیلله حمزه‌دی یا جعفر اصغریم
.
شیرخدا ائوینده یقین شیر بسلنر
یعنی جوانلیقیندا اولار حیدر اصغریم
.
عبّاس آدیندا وار عموسی، نامداریدور
عبّاسه چکسه گر اولی سرلشکر اصغریم
.
الله! هاچان بالام مینه‌جاق زین مرکبه
عنقا تک عرصه‌ده آچاجاق شهپر اصغریم
.
زهرا بالاسی وئردی دونن تازه بیر خبر
گویا بیلوبدی مطلبی آچموش پر اصغریم
.
امر ایلیوبدی بار سفر باغلاسین هامی
حتّی وطنده قالمیاجاق نوبر اصغریم
.
عزم منای عشق واریم اهل‌بیتیلن
همراه اولا گرک منه سوداگر اصغریم
.
من بیلمورم کی کرب‌وبلا دشتی هاردادی
امّا آدی گلنده چالور هی پر اصغریم
.
اوغلوم گولور، منیم اورگیم چیرپینور ولی
نه سرّی وار؟ بئله سئونور آخر اصغریم
.
گویلوم چوخ ایستیور اؤپم الآن بوغازینی
بوسه ویراندا بلکه گؤرم نیلر اصغریم؟
.
نازک بوغازی واردی گؤرن خوشلیور اؤپه
هر کیم اؤپنده خنده ائدور یکسر اصغریم
.
.
#اصغریه_میلادیه
#یارب_اولوب_بو_غملی_دله_دلبر_اصغریم
#حضرتی_ناعمی
#ترکی #اصغریه
#زبدةالاشعار