یا فاطمه سلام اولا بی یار حسینوه #حسینیه_سیفی_اردبیلی

عرضحال به حضرت زهرا (س) در شهادت سید الشهدا (ع)
حالات قتلگاه و زبانحال حضرت زینب (س)
.
.
سیفی اردبیلی
.
.
یا فاطمه سلام اولا بی یار حسینوه
میدان خون و عشقیده سردار حسینوه
.
یا فاطمه سلام اولا جانباز راه دین
قان لجه سینده صورتی گلنار حسینوه
.
سن باغبان، حسین چمن خلقتون گلی
مرهونیدور طراوت گلزار حسینوه
.
اوّل عزا حسینه دوتوب ذات كبریا
نوحه دیوبدی خالق دادار حسینوه
.
آدم توسل ائتدی اونا تاپدی جنتی
نوح ایلیوبدی نوحه سزاوار حسینوه
.
فطرس ملک که یدّی یوز ایل قالدی چاره سیز
اولدی دخیل سید ابرار حسینوه
.
وحی آور رُسل او جلالتده جبرئیل
ترپتدی دایه مثلیده گهوار حسینوه
.
بیر عمریدور بیزیمده حسیندور شعاریمیز
هر انجمنده اولّوق عزادار حسینوه
.
عزّتدی اگنیمیزده قراسی حسینوون
شایسته دور قرا گیه اخیار حسینوه
.
داشدور او دل که عشق حسین اوندا اولمیا
عاشقدی جمله عارف و احرار حسینوه
.
هر قطره اشکی اهل دیلون عشق پاکیدور
سوزان دیلیله ایلیور اقرار حسینوه
.
چخسون او گوز که آغلامیوبدور عزاسینه
سینسون او ال که اولمیا غمخوار حسینوه
.
تنها نه من گدایم اونون آستاننه
دل کیمده وار دیلَنچیدی دلدار حسینوه
.
مردم منی حسینوه شاعر تانور ولی
من سائلم نه شاعر دربار حسینوه
.
عمروم نقدری وار قاپوسیندان ال ئوزمرم
شمع شبانه تک گوزوم آغلار حسینوه
.
جهد ایلرم که راه وفانی ایترمییَم
ننگ اولمیا جهالت پندار حسینوه
.
داش ورسالاردا بو قاپیدان باش گوتورمرم
من نقد جانی ایلرم ایثار حسینوه
.
جانا آییر منیّتی بیر من قالوم بیر عشق
بی ریب ائدوم اورک سوزین اظهار حسینوه
.
سالما بیزی نظردن اگرچه خطالیوک
نوکر آدیلا نسبتیمیز وار حسینوه
.
ایله دعا خانم سُونه تا آیریلیق اودی
قاره گینلرون اولا زوّار حسینوه
.
بیز ساتماروق حسینی خانم کوفیان کیمی
بیز یازماروق یالان یره طومار حسینوه
.
سینسون الى او كوفه لینون یازدى دعوتی
گتدی قوناق سو وئرمدی سالار حسینوه
.
تنگه سالوب ئوزین حرمین پست مایه لر
صبح حیاتی ایلدیلر تار حسینوه
.
چکدی امامه اسلحه مستان سیم و زر
رُجحان تاپوبدی درهم و دینار حسینوه
.
مابین ظهر و عصریدی آتدان دوشوب یره
الدن دوتان تاپولمادی بی یار حسینوه
.
جان دوشدی پیچ و تابه تاپوب جرأت اشقیا
گرم اولدی یاره وورماقا بازار حسینوه
.
هر یاره ده اوخون نچه سی ئوپدی بیربیرین
زوبین و نیزه ووردیلا بسیار حسینوه
.
اوخ نیزه تاپمیان قوشولوب داش ورانلارا
نیسان مثالی یاغدیروب احجار حسینوه
.
اثبات اولوبدی چون فَسَدالعالمون سوزی
قالدی نه اکبر و نه علمدار حسینوه
.
سندیردی آلنی پینه لیلر حقون آیناسین
غملی نفس اورکده اولوب نار حسینوه
.
کرب و بلا چولونده نمازه دوران شیوخ
نه پیرهن قویوبدی نه دستار حسینوه
.
آغزیم سنِیدی آغزینا یازمیدیم اوخ دگوب
ائتدی نفسده چکمگی دشوار حسینوه
.
بیر اوخدا یاردی قلبنی فوّاره ائتدی قان
راه وصالی ایلدی هموار حسینوه
.
چکدی کورکدن آتدی، اورکدن دگن اوخی
گور ظلم و جور اولوبدی نه مقدار حسینوه
.
مولا یخلجاقین قالوب آواره ذوالجناح
شیحه وروب باخاردی گرفتار حسینوه
.
خون امامیلن بویادی یال و کاکلین
ائتدی اشاره ایله چوخ اصرار حسینوه
.
یعنی ایاقه دور آپاروم زینبه سنی
گل اول دیوم سن ایندی پرستار حسینوه
.
گوردی قیامه یوخدی توانا او شاهیده
جان قویمیوبدی لشگر غدّار حسینوه
.
هی باشنه دولاندی ئوپوب قانلی تربتین
قیلدی وفا طریقینی اظهار حسینوه
.
قانلی لجامینی گتوروب قویدی اُوجینا
آندیردی دل سوزین او وفادار حسینوه
.
ائتدی امام اشاره اونا دورما ذوالجناح
اولدون بو چولده یاخچی مددکار حسینوه
.
گئت خیمه گاهه زینبه بیلدیر بو مطلبی
سال قاره اولدی مرحله دشوار حسینوه
.
فریاد الظّلیمه وروب گلدی ذوالجناح
آندیردی زینبه که خطر وار حسینوه
.
زینب قاچوب یتوردی ئوزین فوری مقتله
مردانه وار چخدی هوادار حسینوه
.
قاتل ایاق قویاندا همان اوخ دگن یره
یاره سزلدیوب وئروب آزار حسینوه
.
وئردى الین قباقه الوندن دوتان قیزون
همّتله اولدی یاور او سردار حسینوه
.
گولدن لطیف ال اولدی ایتی خنجره نشان
چاره ائدنمدی گینه ناچار حسینوه
.
.
.
.
یارب دئدی گئدوبدی قواسی حسینمون
سنسن فقط بو چولده رجاسی حسینمون
.
باخ گور نه مشعرونده چالخلور یانا یانا
قان بستری اولوبدی مناسی حسینمون
.
شیرازه دن چخوب ئوزی قرآن مثالیده
قرآنی ساخلیوبدی دماسی حسینمون
.
آئینه تک سینوبدی نمادن دوشوب ولی
گویچک لنوبدی کرب و بلاسی حسینمون
.
قارداشیمی قوناق چاغروب توکدیلر قانین
اشرار ایچنده سیندی بهاسی حسینمون
.
آلنندا یاره واردی قویوب صاق یوزین یره
تجلیل رحمتوندی ثناسی حسینمون
.
یارب دینده جاری اولور آغزینون قانی
قاندور محاسننده حناسی حسینمون
.
اوچ شعبه اوخ یازوب آدوی داغلی قلبیلن
سنسن نوای دیلده صلاسی حسینمون
.
تشنه دوداقی پارچالانان لعله بنزیور
لخته به لخته قاندی رداسی حسینمون
.
من سسلورم حسینی حسین سسلیور سنی
یوخ سندن ئوزگه باشدا هواسی حسینمون
.
هر کیم دوزون یمیشدی بو گون داش وران اولوب
تغییر ائدوب داش آلتدا نماسی حسینمون
.
زاهدلرون ریاسیدی باعث گئدوب بو گون
اکبر کیمی الیندن عصاسی حسینمون
.
استار کعبه دن چوخ ئوپن خرقه پوش لر
جهد ایلیور پوزولسون اساسی حسینمون
.
دین مُدّعی لری بو محاسن درازلر
اولموش بو چولده دزد لباسی حسینمون
.
یوخدور دیَن بو قشری مسلمان نمالره
واردور مگر نه جُرم و خطاسی حسینمون
.
آز اینجیدون عطشدی نه جان وار نه ده نفس
زهرا باخور باشندا قراسی حسینمون
.
قاتل قویوب ایاقینی جدّیم ئوپن یره
دؤزسون نجه بو درده آناسی حسینمون
.
عشقون نه دلنشین ایمش ای مالک الرّقاب
اولدی بو چولده عُقده گشاسی حسینمون
.
باخ بنده وه کورکدن آخور قلبنون قانی
یوخ ذرّه باشدا فکر دواسی حسینمون
.
گوزلر دولوبدی قانیله سؤزدن دولانمیوب
زیبا آدوندی دیلده دعاسی حسینمون
.
هر یاره دگدوگیجه دیور فوری یار یار
هئچ کیمده یوخدی مهر و وفاسی حسینمون
.
یارب کمکسیزم ئوزون ایله کمک منه
شاید اولام انیس بلاسی حسینمون
.
قانین گرکدی بو آغاران زلفیمه یاخام
قیمت تاپا جهاندا عزاسی حسینمون
.
ئولدورسه قمچیلرده منی قویمارام یاتا
اشرار الینده قانلی لواسی حسینمون
.
من «سیفی»ام قاپوزدا سیزون نوکرم خانم
واردور باشیمدا عشق و هواسی حسینمون
.
سوز دیلیله نوحه یازوب ایلرم دعا
اولسون الیمده فیض بکاسی حسینمون
.
.
#حسینیه #سیفی_اردبیلی #حسینیه_شهادت #قتلگاه #ترکی #زبدةالاشعار