سالاندا یاده غم اهلبیت اطهاری #فاطمیه_صحاف_تبریزی

در شهادت حضرت زهرا سلام الله علیها
.
.
.
مرحوم محمدحسین جنتی مقام
.
.
سالاندا یاده غم اهلبیت اطهاری
یوزه گوزوم یاشی بی اختیار اولور جاری
.
خصوص آلاندا بتولین مصیبتین نظره
تصور ایلدیقیم حال اود سالور جگره
.
ایدور او نوعی منی غرق بحر درد و ملال
آخار عذاریمه بی اختیار اشک زلال
.
او گونکه قویدی جهانه قدم او کان حیا
اولوب انیسی بلا همدمی فغان و نوا
.
تمام عمرینی اون سکز ایل ایدوبله رقم
چکوب آز عمریله عالمده چوخ مصیبت و غم
.
توکولدی اوستنه بیر نوع محنت و آلام
گونوزلره توکولیدی اولوردی لیل ظلام
.
باشی آیلمادی بیر لحظه شور غوغادن
شهیده گیتدی گیدن وقت دار دنیادن
.
گلوب عمواوغلی سی جان تاپشوران زماننده
گوزینی آچدی گوروب مرتضانی یاننده
.
اوجالدی ناله سی دلدن سپهر مینایه
وصیت ایتدی نچه سوز علی اعلایه
.
دیدی عم اوغلی گیجه وقتی غسل ویرمنه سن
جنازم اوستنه قویما قدم قویا دشمن
.
عمل وصیتنه ایلدی او شاه زمن
گوتوردیلر گیجه وقتی جنازه نی یردن
.
گیجه زمانی قرانلوق علی ده باخ صبره
یتوردی حضرت زهرا جنازه سین قبره
.
همینکه فاطمه دفنیندن اولدی فارغبال
او آز جماعتی قیتردی شاه عرش جلال
.
زبس قرارینی آلمیشدی فرقت زهرا
کنار قبرده اگلشدی دلده آه و نوا
.
چکوبدی جان کیمی زهرا مزارین آغوشه
او قدری دل دیدی دلدن دوشوب گیدوب هوشه
.
آپاردی هوش او شهی غصه دن سسی باتدی
خیال فاطمه نی سانما باشدان آتدی
.
همان او حالده رویاده گوردی زهرانی
سپهره اوج ایلیوب آه و داد و افغانی
.
کمال حسرتیله مرتضایه بیر باخدی
شرار آه دلی کونی یاندوروب یاخدی
.
دیدی عم اوغلی بو نه خواب استراحتدور
یتیم اوشاقلاریما ایندی مین قیامتدور
.
عذاره سیل سرشگون عم اوغلی باغلاما چوخ
اوزون هلاک ایلیوب قبریم اوسته آغلاما چوخ
.
اوزون بو مطلبه عالم سن ای امام زمن
هنوز دویمامیشام اوز بالالاریمدان من
.
فلک آرایه عجب سنگ تفرقه سالدی
گیدوب سوراق ایله گور هاردا زینبیم قالدی
.
دایانما سرعتله دودمانه قیل رجعت
اگر چه یا علی زحمتدی قوی منه منت
.
حسینیم ایندی اولوب خواب نازدن بیدار
آناسین آختاروری ای شهنشه ابرار
.
حسینیم آغلاسا افلاکه شیونیم دایانور
همیشه روحیم عم اوغلی حسینلن دولانور
.
بیله خیال ایلمه کسمشم علاقه می من
حسینی چوخ سورم یا علی اوزون بلوسن
.
آنا دیور دولانور گوزیاشی آخور یوزینه
فدادی روحیم حسینون او آغلیان گوزینه
.
اماندی قویما ویره چوخ اجازه گوزیاشینا
منیم یریمه محبتله چک الون باشنا
.
گوزون گوتورمه داخی نورهردو عینمدن
خصوص زینب و کلثومیله حسینمدن
.
اولاردان اوتری قبول ایتدیم هر مصیبتی من
مباد غملنه دلدن حسینمیله حسن
.
بیر آن اولمادی خدمتلرینده منده قصور
اولاردان اوتری من اولدوم یهودیه مزدور
.
دیدیم نقدر چکم غصه جانه منتدور
حسین خدمتی سرمایه شرافتدور
.
هامی بلالرینی خسته جانمه آلدیم
اولاردان اوتری من اوچ گونلریله آج قالدیم
.
او قدر غصه چکوب غنچه گل کیمی سولدیم
قاپوم یاناندا قولوم سندی غصه مرگ اولدیم
.
دوزوب مشقته عزت لباسنی سویدوم
جوانلیقیمدا عم اوغلی حیاتدن دویدیم
.
بالالاریم ییری وار روز شب گله داده
ئولنجه آغلیالار بیر بو قلبی ناشاده
.
ایدوب نوا دیه لر درد و غم چکن آنا وای
زمانه ده یوزی هر لحظه گلمین آنا وای
.
اله گتورمدی بو روزگار مطلبمی
یریمده نایبه قویدوم بلالی زینبمی
.
اودا منیم کیمی عالمده چوخ بلایه دوشر
حسینمیله یولی دشت کربلایه دوشر
.
او چولده رنگ ملال و مصیبته بویانور
یاناندا خیمه لری آهی گویلره دایانور
.
حسین یتیمه لرین بیر به بیر یقار باشنا
ویرر اجازه او صحراده قانلی گوز یاشنا
.
آلولّا معجرینی ساچلارین سالور یوزینه
سپاه کوفه و شام ایتمز اعتنا سوزینه
.
الهی لطفویله بو شب وفات بتول
بو جزئی خدمتی اوزون گل ایله قبول
.
حسین قبرینه ایسته «صحاف» بی یاری
بو نوحه خوانیله اولسون او قبر زواری
.
.
#فاطمیه_شهادت
#سالاندا_یاده_غم_اهلبیت_اطهاری
#صحاف_تبریزی
#ترکی
.
✍️ #زبدةالاشعار ✍️
.
🆔: @nohe_torki