صبح عاشورا که غم عالمه گسترده ایدی #شب_عاشورا_سیفی_اردبیلی

منظره شب عاشورا
گریز به وداع امام حسین (ع)
.
✍️ #زبدةالاشعار ✍️
.
🆔: @nohe_torki
.
سیفی اردبیلی
.
صبح عاشورا که غم عالمه گسترده ایدی
گللرون رنگی سولوب سو سوزی دیللرده ایدی
.
گون شاخوردی یره گرماسینی طاقت فرسا
دامن کرب و بلا پنجۀ آذرده ایدی
.
قوملارون چهره سی اولموشدی حرارتدن عوض
داشلارون حالتی اوددان چخان اخگرده ایدی
.
ایکی اردو واریدی صحنۀ محنت زاده
باختر سمتی بیر اردو، بیری خاورده ایدی
.
بیریسی ظلمت جهلیدی بیری نور ولا
حقّیلن باطل او ساعتده برابر ده ایدی
.
بیری دنیایه گوره دیننه قدّاره چکوب
روح مستی بیرینون عالم دیگرده ایدی
.
بیر طرفدن اوجالاردی سسی یوزمین قوشونون
فکر و اندیشه لری سیم و یا زرده ایدی
.
ایکی مستی گورونوردی ایکی لشگرده اوگون
بیریسی غرقه به شهوت بیری باورده ایدی
.
بیر قوشوندا صُلحا خالقه جانبازیدی
بیر قوشون زادۀ هندون زرینه برده ایدی
.
تلسردی بیری کرکس کیمی غارت گَریَه
بیری پروانه کیمی عشق اودی شهپرده ایدی
.
بیریسی مست شرابیدی بیری مست صواب
بیری گوز کیسۀ زرده بیری دلبرده ایدی
.
بیریسی مست جنایت بیریسی مست جهاد
بیری زالو، بیری ذکر هُوالاکبرده ایدی
.
بیری قرآنی ایاقلوردی مقام اوستونده
بیریسی قاعدۀ دین پیمبرده ایدی
.
بیر طرف زادۀ سعدیدی که ری مستیدی
جاهلان عربه جبهه ده سرکرده ایدی
.
بیر طرف حقّه دل آچمشدی حسین ابن علی
گوئیا ختم پیمبر ئوزی منبرده ایدی
.
ایستورم جبهۀ حقّون گوتورم پرده سینی
گورہ سن اوردا نجه منظره منظرده ایدی
.
نچه خیمه دولوسی تشنه آی اولدوز واریدی
چوخلاری مرتضوی فاطمه پرورده ایدی
.
اوجالوردی گوگه بیر خیمه ده خوش زمزمه لر
شهدا ذکر کلام حق داورده ایدی
.
بیری گوز یاشلی دیوردی کرم ائت یا قدّوس
بیرینون جهدی فقط صیقل خنجرده ایدی
.
کفن آماده ایدوردی بیری جانبازلره
بیری مشغول صف آرایی لشگرده ایدی
.
ابداً فکر سر و جان ایلمزدی بیر کس
هامینون دل گوزی تنها قوجا رهبرده ایدی
.
نُه فلک مات باخاردی او اوجا پرچمه که
پنجۀ قدرت عبّاس توانگرده ایدی
.
ننه لر اشکین الردی باجیلار پر هیجان
چشم لیلاده فقط قامت اکبرده ایدی
.
هی دیردی یری قوى قدّیوه حسرتله باخوم
سنون اون سگّز ایل عشقون دل مادرده ایدی
.
نجه تاب ایلیوم اوغلوم اوزوله سندن الیم
سنده که حُسن و جلا هانسی صنوبرده ایدی
.
دم غنیمتدی گل اگلش باشووا بیر دولانیم
لیلینون خوش گونی یثربده که گونلرده ایدی
.
خیمه لر هامّوسی بیر پارچا غم و محنتیدی
ابتلا باده سی اللرده که ساغرده ایدی
.
خار و خس سیریدی سیراب یاناردی گللر
گوزلری تشنه لرون بیر اوزون اللرده ایدی
.
غملی بیر خیمه ده ده غملی ربابون یاخاسی
دست لرزان و تمنّاگر اصغرده ایدی
.
دلی آغزیندا یاناردی صود امرده ننه ده
نه سو الده ایدی نه ده صود قوری دوشلرده ایدی
.
بالا قوش تک چوبالاردى ننه اوخشاردی بویون
هی دیردی بیله غم حکمت داورده ایدی
.
وورما درناق دؤشومه قانّاما بارماقلاروی
نیلمک قسمتیمز یانماقا چوللرده ایدی
.
بیله گئتسه گونوموز آخشاما قالمازسان على
بالام ئولدی دیرم سو اودی لبلرده ایدی
.
وای منه سویلرم ایستکلی گلوم آز یاشادی
عمریمون نازی منیم بو گل پرپرده ایدی
.
هوسیم اصغریدی هم نفسیم اصغریدی
خوشلقیم بیر بو گوزل جیرانا بنذرده ایدی
.
نفسین ایگلدوگیجه آچیلاردی اورگیم
هم اوغول همده منه حکم برادرده ایدی
.
الغرض باشلانوب ایثاره اوگون جنگ و ستیز
بویانوب قانه اولار که آدی دفترده ایدی
.
#گریز #وداع
.
یتشوب عصر غم انگیزه سحرگاه بلا
چاتدی نوبت اونا که قسمت آخرده ایدی
.
فاطمه اوغلی حسین جنگه اولوب آماده
فکر اعداده همان پیر دلاورده ایدی
.
عرصه ده منتظریدی اونا تیز اسلحه لر
چون یزیدون نظرى قتل او سرورده ایدی
.
آز قالوردی باتا گون عالم اولا تیره و تار
گللرون غنچه لرونده الى زلفلرده ایدی
.
زینبون دوره سین آلمیشدی پریشان بالالار
چشم امّید حرم اول قره معجرده ایدی
.
کربلا نوحی ده سرمستیدی طوفانی گوره
حالتی حالت کشتی شناورده ایدی
.
تلسوردی اوره گی جلوۂ جانانی تاپا
فکری هم یاریده هم الده ئولنلرده ایدی
.
باغبانیدی گورردی چمن افسرده لنور
اوره گی وصلت دلبر گوزی گل لرده ایدی
.
بیر چمن ناز گلون سولماقینا ویردی رضا
چونکه جان لذّتی خُرسندیِ داورده ایدی
.
.
.
زینبین سسلدى ئوز حُجّتینی قیلدی تمام
هی وروب مرکبینه مقتله یول سالدی امام
.
.
.
پیر واحد تلسور کام آلا پیمانیندن
وصل جانانیده دور فکری دویوب جانیندن
.
امر مشکلدی گوره حشره کیمی پیر فلک
بو حسینون نه ئوزیندن نده یارانیندن
.
درس ایثاری گرک تیشه بدست عاشقلر
آلالار قوللاری باغلى قوزی قربانیندن
.
نه کلیم و نه مسیحاده حسین قدرتی وار
گورمیوب یوسف اونون گوردیگی بحرانیندن
.
کهنه سرمستیدی میقاتینه مستانه گیدور
زندگیدن چکوب ال چخمیوب ایمانیندن
.
ویرمیوب بیعت الین حاکم ارذل روشه
دونمیوب خالقینون ویردیگی فرمانیندن
.
شیر خیبر شکن اوغلى آلجی شیر کیمی
قصد ایدوب لرزه سالا عرصیه جولانیندن
.
ذوالجناح اوسته کأنّه اوتوروب کوه وقار
شعشع شمس اوجالور چهرۀ تابانیندن

ترک ایدوب پیر خرابات حریم و حرمین
اوجالور ذکر هوالحق لب عطشانیندن
.
عشق دیدار نگاریله تاپوب خلصۀ روح
الفت دهری سیلوب توز کیمی دامانیندن
.
نه باخور صاق صولا بیر لحظه نه پشت سرینه
نشئت وصلی گزور دیلده که ایمانیندن
.
ناگهان گوردی دیور زینبی صبر ایله حسین
باجوون باخبر اول غصّۀ پنهانیندن
.
کوی خلوتده دایان قوی باشوا من دولانیم
درد هجرون منه اعطا ایله درمانیندن
.
بیله که سن گیدوسن یوخدی امیدیم گله سن
بحر ظلمون چخاسان ساحله طوفانیندن
.
عاشقم من گوز آچاندان او قرا گوزلروه
حُسنوون دویمامشام فیض فراوانیندن
.
اوره گیم چوخ چوبالور بیر الیوی سینمه قوى
بلکه بیمار آلا آرامشی لقمانیندن
.
گر چه زحمتدی حسین کوینگیون آچ یاخاسین
قوی آلوم یوسفیمون عطری گریبانیندن
.
اذن ویر خنجر ئوپن حنجره بیر بوسه ویروم
ننمون یاد ائلیوم گورملی دورانیندن
.
یوخدی سو گوز یاشی آردونجا سپوم یوللاروا
باغبانیم دیوم آیریلدی گلستانیندن
.
سن ئولوم جاده سی گیت من دیوم افسوس افسوس
دویمیوبدور بو اوغولسوز گل ریحانیندن
.
نجه آیریلدی سوزوم یوخدی باجی قارداشدان
آچمورام چوخ سوزی بو محنتون عنوانیندن
.
نینوانون او چوخور مقتلینون تُپراقی
رنگ زر تاپدی حسینون سوزولن قانیندن
.
.
#شب_عاشورا_سیفی_اردبیلی
#وداع_حسینیه_وداع
#صبح_عاشورا_که_غم_عالمه_گسترده_ایدی
#ترکی

.
✍️ #زبدةالاشعار ✍️
.
🆔: @nohe_torki