حضرت زهرا سلام الله علیها
.
.
نریمان حسین زاده
.
.
گل عم اوغلی باشیم اوسته اوخی قرآن ئولورم
آغلیان گوزلریوه فاطمه قربان ئولورم
.
.
.
دئمیرم غصّهسی چوخ قدّی کمان آیریلیرام
بخت ائویمدن یئمهدیم بهره جوان آیریلیرام
بالالاریمدان عم اوغلی نگران آیریلیرام
بیلیسن غم یئتیشیب بختیمین اولدوزلارینا
حرمت ائت فاطمهنین بو آناسیز قیزلارینا
.
.
.
سنه زحمتدی اگرچه ولی منّتدی منه
بیلیسن چوخدی علاقم بو حسین و حسنه
گوزدن آتما بولاری فاطمه قرباندی سنه
چکمیشم دهریده زحمتلرینی غم یئمیشم
سسلییبلر ننه هر وقتیده من جان دئمیشم
.
.
.
دیللره دوشسه جماعت دیجک بیربیرینه
هئچ کیمین غملری چاتماز او حزینین غمینه
نه گلین گَتدی نه گوندردی قیزین بخت ائوینه
گلشنِ عمرینه آفت یئتیشیب تئز سولدی
آرزیسی قالدی یانان دلده جوان مرگ اولدی
.
.
.
بیرده آی مظلوم عم اوغلی ائدیم آگاه سنی
اولسا امکانی اگر شاد ائله بو فاطمه نی
قویدون ئوز اللریویلن، ائله که قبره منی
هامی ترک ائتسَدَه سن قبریمی ترک ائتمیسن
قالاسان قبریمین اوسته گئجهنی گئتمیسن
.
.
.
الغرض ائتدی وصیتلرینی دختِ نبی
آیری بیر حاله سالیبدیر شهِ والا نسبی
گون دولاندی یئتیشیبدیر گئجهنین نصفِ شبی
فاطمه قیزلارینین گلدی او مشکول گئجه سی
ثبت اولوندی او گئجه حیدره نسگیل گئجه سی
.
.
.
ای قلم یاز او گئجه، اوّل هجران گئجه سی
زینبین غملرینین یعنی فراوان گئجه سی
ننه یاسینده اولان سینه سی سوزان گئجه سی
او گئجه خوش گونونه زینبین آخر گئجه سی
دای او گوندن ائله بیل غم یازیلیب هر گئجه سی
.
.
.
اَلییر ختمِ رسل اشکین عذاره او گئجه
فاطمه آیری دوشور قلبیده یاره او گئجه
قویور ئوز همسری گیزلینجه مزاره او گئجه
او گئجیدی، ننه سیز قیزلارینین غم گئجه سی
باشلانیر فاطمه نین دهریده ماتم گئجه سی
.
.
.
بیلمیرم من، شهِ محشر او گئجه چکدی نَلَر
غسل ائدیب فاطمه نین جسمینی با دیدۀ تر
اولدی تشییعینه آماده فقط یددی نفر
حمل ائدیبلر گئجه نین عالمی وای دنیایه
گتیریب یتدیله تا دفن اولونان مأوایه
.
.
.
ئوزی بیر قبر قازیب فاطمیه شیرِ خدا
بو یانان قلبلر اولسون او یانان قلبه فدا
دوتدی تصمیم ئوزی ئوز همسرینی قبره قویا
گوردی بیر ایش او زمان لرزیه آفاقی سالیب
نعشین آغلار گوزیله اللرینین اوسته آلیب
.
.
.
ایسته دی یارینی قبره قویا سلطانِ جهان
گوئیا کی ایکی ال اولدی نمایان او زمان
گلدی سس فاطمه نی وئر منه اولما نگران
آغلییب گوز یاشینی خونِ دله قاتما علی
بو قدر آغلییب، عالملری آغلاتما علی
.
.
.
ای عم اوغلی سنه تاپشیردیم امانت بالامی
ترک قیلدیم من او صاف و سلامت بالامی
قیتریبسن ندیر علّت کی بو حالت بالامی؟
غم و آلامِ زمان سرو کیمی قدّین اگیب
سینهسی صدمه گوروبدور، یوزونه سیلی دگیب
.
.
.
تا ائشیتدی بو صدانی، او شهِ دلخسته
ئورهگی درده گلیب آغلادی هی آهسته
بالالار ائوده پریشاندی، علی قبر اوسته
او قدر سویله دی غم سوزلرینی ئوز ئوزونه
غالب اولدی یوخو تا اینکه او مولا گوزینه
.
.
.
عالم خوابیده گوردی او شهِ کون و مکان
دامنیندن یاپیشیب فاطمه با آه و فغان
ائدیر اظهار عم اوغلی نگرانم نگران
ایسته سون فاطمه نین دونمیه گوز یاشی سئله
دور ایاق اوسته عم اوغلی ائوه تئز رجعت ائله
.
.
.
فاطمه سوزلرینی درک ائلهدی شاهِ زمن
دوروب آیریلدی ائوه ساری گلیر دیلده محن
ائوده یول گوزلور حسین زینب و کلثوم و حسن
نئجه گلسین او گئجه ام ابیهاسیز ائوه
نئجه گلسین ائوه، هانسی ائوه زهراسیز ائوه
.
.
#فاطمیه #ترکی #نریمان_حسین_زاده #فاطمیه_شهادت
گل عم اوغلی باشیم اوسته اوخی قرآن ئولورم #فاطمیه_نریمان_حسین_زاده
نظر دهید