گچدی حدن یزید طغیانی #مجلس_یزید_تائب_تبریزی

مجلس یزید ملعون
.
.
مرحوم تائب تبریزی
.
گچدی حددن یزید طغیانی
شهرت کفری دوتدی دنیانی
.
یولون آزدی هوای نفسیله
رد ایدوب وحیی داندی قرآنی
.
قوردی بیربزم باشینه یغدی
سفرای فرنگ و ترسانی
.
سسلوب اشیاخ بدری مجلسده
باشلادی شعر خوانلیق عنوانی
.
گوردی زهرا عزیزه سی زینب
حدّ دن چیخدی اول جفاکانی
.
گلدی گفتاره شیرحقّ کیمی
غیظیله مرتضی سخندانی
.
دیدی ای زادزادۀ طلقا
بو نه عالمدی نه غزلخوانی
.
مست اولوبسان سنی شراب آپاروب
دیوسن هر کلام بیجانی
.
هم امام ئولدوروب همی ویروسن
بیحیا افتخار اعلانی
.
فكرایدورسن که اولموسان فاتح
تنگ ایدوبسن بیزه بو دنیانی
.
نه دگل بیله اشتباه ایدوسن
بلکه بالعکس بول بومعنانی
.
هندزاده دایان اؤزون آزما
یادیوه سال بیان قرآنی
.
سانما که خیریوه تمام اولاجاق
مهلتی که اولوبدی ارزانی
.
بلکه مهلتله آرتاجاقدی سنون
گُنه و جُرمین ای خطاکانی
.
واردی بیر وعدۀ عذاب مهین
گوره جاقسان عذاب نیرانی
.
چگنون اویناتما سینه وه وورما
کبریله چوخ یدِ تعدّانی
.
فَشَمَخنَ بِاَنفِکَ مغرور
صاق صولا باخما بیله ای جانی
.
چکمزاول قدر بوغرور سنار
دوشه سن ضعفه ای جفاکانی
.
.
.
ظلمیله سلطنت باشاگتمز
هیچ جفاجو مرامینه یتمز
.
.
.
بولوسن توکموسن نجه قانلار
ئولدوروبسن نه کامل انسانلار
.
ایلیوبسن نه گللری پرپر
سولدوروبسان نجه گلستانلار
.
بوییوبسن قانا جوانلاریمی
نه جوانلار نه جوهرجانلار
.
كفر طینت سنون الونله ئولوب
پاک سیرت گوزل مسلمانلار
.
باتدی ظلمونله ظهر وقتی گونوم
آخدیلار اختران رخشانلار
.
ظلمت ظلمین عالمی دوتدی
دوشدیلر خسفه ماه تابانلار
.
خرداجا قزلاری یتیم ایلدون
آتاسیز قالدی دیده گریانلار
.
سن چراغ وفانی سوندوردون
قالدی ظلمتده اهل ایمانلار
.
قویموسان چوخ باجینی قارداشسیز
روز و شب آغلوری او نالانلار
.
بیزی بی خانمان سن ایتدون سن
مسكن اولدی بیزه بیابانلار
.
کربلاده او قدر قان توكدون
دولدی قانیله صحن میدانلار
.
یرده قالماز او قانلار ای ظالم
سنی آخر دوتار همین قانلار
.
.
.
آتش غم منى آلشدیردی
اودی دیلّندیروب دانشدیردی
.
.
.
بو منیم روز و روزگاریمدور
بو منیم حال انکساریمدور
.
رغبتیله دانشمارام سنیله
دیلَّدَن درد بیشماریمدور
.
دانشوم گوش هوش ویر درک ایت
سوزلریم مایۀ عیاریمدور
.
دیورم زینبی بیانیمیله
حق دانشماق منیم شعاریمدور
.
جدّ پاکیمدی احمد مختار
آدی عالمده اعتباریمدور
.
عصمتیم فاطمه نشانه سیدور
عفّتیم یوزده پرده داریمدور
.
همّتیم ارث دور حسینیمدن
ایدن ارشاد او باوقاریمدور
.
زینبم فاطمه آنامدی منیم
مرتضا باب تاجداریمدور
.
زینبم زین اَب دیللَّه منه
پایۀ شأن و افتخاریمدور
.
منده واردور بیان مرتضوی
بو بیان الده ذوالفقاریمدور
.
او بیانیله خصمی شقّه لرم
بو سوزوم رمز اقتداریمدور
.
یاریلوبدور حسین یولوندا باشیم
یاراسی تاج افتخاریمدور
.
وورارام قوم جهله تودهنی
مشت دانشله رمز کاریمدور
.
شیر حقدور آتام أؤزوم شیرم
قوم روبه منیم شکاریمدور
.
دیمه عاجز اسیرم ای ظالم
بلکه حرّیّت اشتهاریمدور
.
گلمیشم ایلیم سنی رسوا
بو منیم حُسن ابتکاریمدور
.
گلمیشم قصریوی ایدم ویران
بو مرام دل فگاریمدور
.
.
.
دوتدی بزمی ابهّت زینب
خلقی جلب ایتدی صحبت زینب
.
.
.
گوردولر بیله بیر قضایانی
حیرته دوشدی عالی و دانی
.
مجلسین اهلی دگدی بیربیرینه
باشلادی بیر بیریله نجوانی
.
دیدیلر کیمدی بو جسور خانم
که یاراتدی بو شوروغوغانی
.
روح فرهنگدور وروب یخدی
منطقیله یزید نادانی
.
نه دیورحق دیور عیان واردی
سوزلرینده حقیقت اعلانی
.
اولدی بسکه یزید ناراحت
غور ایدوب دلده کین پنهانی
.
غیظیله دوندی ایستدی جلّاد
ئولدوره یادگار زهرانی
.
سنمادی فاطمه قزی امّا
دوتدی وحشت بنات طاهانی
.
خرداقزلار قاریشدی بیربیرینه
توکدیلر اشگ چشم گریانی
.
قاچدی یوزدن گل اوزلیلر رنگی
سولدوروب گل صفت صبایانی
.
شوریله آغلادی آدامسیزلار
ایتدیلر نوحه و نواخوانی
.
داد آدامسیزلیقین الیندن امان
یارادار دستگیره حرمانی
.
اولمادی زینبه حمایت ایدن
سندیران ایله قانلو فرمانی
.
جلوه لندی اودم حسین باشی
گون تک ایتدی او بزمی نورانی
.
دُؤزمدی زینبی قالا یالقیز
یتدی امدادینه همان آنی
.
غنچه وش لبلری شکفته لنوب
ایتدی مجلسده عنبرافشانی
.
اوردا قرآن دانانلارین یوزینه
اوخودی آیه آیه قرآنی
.
جلب ایدوب خلقی صوت قرآنی
قالدی حیرتده عالی و دانی
دیدیلر صاحبی یقین بو باشین
بیر پیمبردی یوخدی کتمانی
.
یا که بیر نائب پیمبردور
گوسترور معجزات یحیانی
.
آیری باشدا بیله صفا اولماز
واردی بوندا صفای سبحانی
.
ذبح اولوبدورگنه اوخور قرآن
وار عجب بوندا روح روحانی
.
بیربیره دگدی خلق اولوب غوغا
گوردی هنداوغلی بوقضایانی
.
خطر احساس ایدوب بوفکره دوشوب
ایده خاموش او شوروغوغانی
.
آلدی بیرچوب خیزران الینه
باغریقان ایتدی آل عمرانی
.
شرمسیزویردی خیزران دمینه
لب لعل عزیز زهرانی
.
دیدی که بیعت ایتمدون منه سن
باشه سالدون هوای سلطانی
.
من دیدیم گل منه ایله بیعت
سن قبول ایتمدون بوعنوانی
.
دیدون اُولا منم که شأنیمده
نازل اولموش کتاب ربّانی
.
ایمدی گورحق منم و یا سنسن
سالمیشام من اله بو امکانی
.
بو یارالی باشوندی طشت ایچره
بومنم باشئون ایلخانی
.
اوینورام گه حریفیله شطرنج
تاپورام حال بهجت افزانی
.
اوخوسان یاحسین گنه قرآن
چکه سن انقلابه دنیانی
.
سنی ئولدوردوم اولماسون قرآن
ایدوسن زنده بیرده قرآنی
.
گوردی زهراقیزی بو منظره نی
ایتدی بی صبر اول شکیبانی
.
دیدی ال ساخلا خیزرانیله
ویرما ظالم او لعل و دندانی
.
وبرما درّ خوشابی سندیرما
بویاما قانه لعل رمّانی
.
او دوداقدان اؤپردی پیغمبر
قیل حیا ای ستمگر جانی
.
سن کیمی بیر گدا صفت آری
نه بیلر قیمت برلیانی
.
دوشسه بیر درّ اگر گدا الینه
سندیرار سنگیله همین آنی
.
تائبا یازمادی دایاندی قلم
یازما بو شرح محنت افزانی
.
.
.
#مجلس_یزید #تائب_تبریزی #ترکی #زبدةالاشعار