ای قانه غلطان گل بدن سن نور عینیم سن منیم #کوچ_کربلا_خوندل_تبریزی

کوچ از کربلا
زبانحال حضرت زینب (س)
..
..
مرحوم خوندل تبریزی
..
..
ای قانه غلطان گل بدن سن نور عینیم سن منیم؟
دیلّن دیلون قربانی من آیا حسینیم سن منیم؟
..
..
اطرافیمی دشمن آلوب آخر اوزوم وحشتدییَم
یوخ دادخواهیم بیر نفر چوخ چوخ بو گون زحمتدییَم
لطفا تانیتدیر سن اؤزون قارداش بو گون حیرتدییَم
دیلّن دیلون قربانی من آیا حسینیم سن منیم؟
..
..
گر من بلالی زینبم سن کربلا سلطانی سن
باشه یتوردون باشیله باشونده کی پیمانی سن
ایله تواضع بیر دانیش دیندیر من نالانی سن
دیلّن دیلون قربانی من آیا حسینیم سن منیم؟
..
..
قارداش یارالی پیکرون بنزور پوزولموش گلشنه
قاندان آچوب گل یاره لر باخدوقجا گللم شیونه
آغوش زهرانون گلی سنسن باجون قربان سنه
دیلّن دیلون قربانی من آیا حسینیم سن منیم؟
..
..
..
یوز ویردی هر درد و بلا دؤزدوم دایاندیم من حسین
هر رنگ درد و محنته یاندیم بویاندیم من حسین
سندن اؤتور میدانی چوخ گزدیم دولاندیم من حسین
دیلّن دیلون قربانی من آیا حسینیم سن منیم؟
..
..
قلبیم یانور دل داغلیام آهیمده وار بی حد اثر
برگ خزان تک غصّه دن قانه دونن گوگلوم اسر
قارداش بو غمکش باجیدان اؤز لطفوی کسدون مگر
دیلّن دیلون قربانی من آیا حسینیم سن منیم؟
..
..
ای قوملار اوسته جان ویرن آرام جان بوتراب
قربان بو عطشان لبلره سس ویرمنه اولدوم کباب
آخر اسیر اولسا باجی قارداش مگر ویرمز جواب
دیلّن دیلون قربانی من آیا حسینیم سن منیم؟
..
..
سنسیز ایله ساز اولمادی آل اللهه دور زمان
اولدی بهار عیشمیز بو عرصه ده قارداش خزان
لیلا گیدیر شامه هانی اکبر گلوب ویرسون اذان
دیلّن دیلون قربانی من آیا حسینیم سن منیم؟
..
..
کوی وفاده جان ویروب سن که یتیشدون ایمنه
محتاج لطفم لطفوی بیر شامل ایت قارداش منه
گور حالیمی آل گوگلومی آخر اسیرم دشمنه
دیلّن دیلون قربانی من آیا حسینیم سن منیم؟
..
..
«خوندل» مخالف نغمه سین اهل جفا ساز ایلیوب
شایسته سن چوخ ایتمه غم هر نیلسه آز ایلیوب
سن آغلا یاز بو مصرعی واقعده اعجاز ایلیوب
دیلّن دیلون قربانی من آیا حسینیم سن منیم؟
..
..
#کوچ_کربلا #خوندل_تبریزی #ترکی #زبدةالاشعار