اولدی اون سگیز یاشندا دینه قربان فاطمه #فاطمیه_رجایی_تبریزی

حالات حضرت زهرا(س)
.
.
مرحوم رجایی تبریزی
.
.
اولدی اون سگّیز یاشندا دینه قربان فاطمه
غسلی مخفی دفنی گیزلین قبری پنهان فاطمه
.
.
غصب ایدوبلر حقّ مشروعین گروه مشرکین
مهربانی بیر علیدی ایتدیلر خانه نشین
آز زماندا دردله دولدی او قلب نازنین
آختاروردی دردینه هر لحظه درمان فاطمه
.
.
گوردی ظلم اشقیا دوندردی شامه گوندوزون
چاره سیز قالدی گیدوب خلقه تانودورسون اوزون
بولدی وقته اقتضا وار دور یتوردی حق سوزون
چکسون اول باطل مرامه خطِّ بطلان فاطمه
.
.
مقصدی هرگز دگلودی باطناً مُلک فدک
نیلوری دنیانی اول مخدومۀ حور و ملک
گوردی موضوع فدک منظورینه ایلر کمک
باشلادی غصب فدکدن ایتدی عنوان فاطمه
.
.
حیِّ داور نامنه بیر خطبه ایراد ایلدی
اوز آتاسی حضرت پیغمبری یاد ایلدی
منحرف خلقی صراط حقّه ارشاد ایلدی
پیروان دینه ویردی درس قرآن فاطمه
.
.
دین اسلامون شئوناتین ایدوب خلقه بیان
حق سوزیله اهل ظلمون قلبینه ویردی تکان
تحت تأثیره گلوب بیر عدّه ای پیر و نوجوان
ایتدی مظلومیَّتین دنیایه اعلان فاطمه
.
.
چوخ شجاعتله خانم توبیخ ایدردی دشمنی
ذکر ایدوب قرآن دن نِچّه مناسب آیه نی
سویلدی آیا سیزه تاپشورمادی جدّیم منی؟
ای جماعت چوخ تِز اولدی چخدی یاددان فاطمه
.
.
قورتاران جهل و جهالتدن پیمبر دور سیزی
اهل اسلامه هدایت ایلدی هر دین سیزی
وار نه علّت قویموسوز، ایوده قالاق راحت بیزی؟
نیلیوب آیا سیزه بو دیده گریان فاطمه؟
.
.
عترتین یوخسا بیله تاپشوردی ختم الانبیا
بولموسوز ای بی وفالر بو دگول رسم وفا!
قویمادوز پیغمبرون باری عزاسی ختم اولا
نیلسوز گورسَه اولوب بیله پریشان فاطمه؟
.
.
هر قَدَر ظالملرون ظلمون دیوب ایتدی گله
اولمادی هرگز مؤثّر اهل شرک و باطله
بیر اَسَفلی حالیله دوردی قِیِتدی منزله
چولقیوب رخسارینه آثار حِرمان فاطمه
.
.
حقّینه ظاهرده گرچه چوخلار اقرار ایلدی
ویرمیوبلر خوش نتیجه هر نه اصرار ایلدی
گَتدی اوز درد دلین انصاره اظهار ایلدی
حقّینه ایتدی اقامه نِچّه برهان فاطمه
.
.
حق سوزون تأثیری وار تأثیر ایدوب دور دشمنه
حقّنه فرمان آلوب چخدی یتیشدی ایمنه
آلدی ای کاش آلمیِیدی وای منه ای وای منه
یوز قویوب دور منزله دلشاد و خندان فاطمه
.
.
یولدا اولدی بیر ستمگر ظالمیله روبرو
دست خطّین باره سنده باشلیوبلر گفت و گو
ایستدی آلسون خانمدان مدرکین اول کینه جو
امتناع ایتدی دایاندی سینه سوزان فاطمه
.
.
بولمورم نه ظلم ایدوب ای حجّت ارض و سما؟
حامله بیر عورته بو ظلمی گورمزلر روا؟
ظلمه باخ یابن الحسن زهرا هارا سیلی هارا
اولدی ناگه صورتی قانیله الوان فاطمه
.
.
حجّت الله چوخ جفالر ایتدی زهرایه عدو
اوز آتاسندان صورا چوخ غمله اولدی روبرو
باخمیوب لار «بضعةٌ منّی» دِیَن زهرادی بو
بَسلَنوب دور سینۀ طاهاده هر آن فاطمه
.
.
سیل تک اشکین توکوب اوج ایتدی عرشه شیونی
سجدیه باشین قویان دمده او عصمت معدنی
عرض ایدردی بارالها لطف ایله قورتار منی
تِز اولار راحت نقدری تِز ویره جان فاطمه
.
.
مستجاب ایتدی دعاسین خالق کون و مکان
گون به گون اولدی وجودی چوخ علیل و ناتوان
وقت اولوب جان تاپشورا جانانینه جان جهان
صبرله باشه یتوردی عهد و پیمان فاطمه
.
.
عرض ایدردی گل عم اوغلی فاطمه قربان سنه
وقت هجرانیم یتیشدی گلمه داد و شیونه
گل باشیم اوستونده اگلش بیر اوخی قرآن منه!
سن بولورسن کیم چوخ سُوَردی صوت قرآن فاطمه
.
.
جان ویروب قورتولدی محنتدن او بانوی جهان
خاندان مصطفانی دولدوروب داد و فغان
ایستدی غسلون ویره اول شهریار انس و جان
تازیانه یِرلرین ایتموشدی کتمان فاطمه
.
.
نه گوروب! وار قولّاریندا تازیانه یاره سی
جوش ایدوب داشدی علینون صبرینون پیمانه سی
نقل ایدر راوی اوجالدی مرتضانین ناله سی
حقّی وار جان تاپشوروب مجروح و نالان فاطمه
.
.
ویردی رخصت گلدی تودیعه حسینیله حسن
زینب و کلثوم آچدی باشنی بیر سمتدن
بیر نمونه ئیدی او ساعت روز رستاخیزدن
انبیا و اوصیانی قویدی حیران فاطمه
.
.
ساکنان خلد رضوان شرکت ایتدی ماتمه
حیِّ داوردن گلوب فرمان امیر عالمه
یا علی! قویما حسینیله حسن باتسون غمه
بو مقدّر دور اولا جنّتده مهمان فاطمه
.
.
مدّت عمرونده اولدی هر بلایه مبتلا
اود ووروب درگاهنی یاندوردی قوم اشقیا
بیر «رجائیله» دایاندی دوزدی تا روز جزا
بو گنهکار امّتی قورتارسون اوتدان فاطمه
.
.
#فاطمیه #رجایی_تبریزی #فاطمیه_شهادت #ترکی #زبدةالاشعار