سن بو خرابه منزله خوش گلمیسن بابا #حضرت_رقیه_حزین_خسروشاهی

زبانحال حضرت رقیه (س) با پدر
..
..
مرحوم حاج حیدر خسروشاهی (حزین)
..
..
سن بو خرابه منزله خوش گلمیسن بابا
تسکیندی گلماقون دله خوش گلمیسن بابا
..
..
پیشوازیوه خیال ائلمه گلمدیم سنون
عفو ائت منی که گلماقیوی بولمدیم سنون
مژگانیمیله خاک رهون سیلمدیم سنون
قوی گوزیاشیم یوووب سیله خوش گلمیسن بابا
..
..
گلدون قیزون قورا سنیله بیرده بزم راز
ائتدی بو گلماقون منی عمرومجه سرفراز
باش چکماقا حرملریوه ای شه حجاز
لطف ایلیوب بو محفله خوش گلمیس بابا
..
..
اودلانمیشام شرارۀ هجرانیوه بابا
جاندان اوسانمیشام قسم اوز جانیوه بابا
یا گیتمه یا آپار منیده یانیوه بابا
وصلون چتین دوشر اله خوش گلمیسن بابا
..
..
علت ندور که عترتیوی گوزدن آتمیسان
کیم باشوی کسوب بئله آلقانه باتمیسان
کول باشیمه مگر که کول اوستونده یاتمیسان
گُل عارضون باتوب کوله خوش گلمیسن بابا
..
..
بیرده گورم سنی چوخودی دلده حسرتیم
حمد ایلرم خدایه روا اولدی حاجتیم
چک باشیمه محبّت الون اولموشام یتیم
تا خاطریم اله گله خوش گلمیسن بابا
..
..
لب تشنه ویرموسن بولورم کربلاده جان
لعل لبونده واردی ولی اؤزگه بیر نشان
هانسی شل اولموش ال باشوا ووردی خیزران
ایکاش بو قیزون ئوله خوش گلمیسن بابا
..
..
فرمایش ائت بابا نولوب آزاده قارداشیم
گلمور ندن سراغیمه شهزاده قارداشیم
چوخ چوخ منی سُوردی بودنیاده قارداشیم
قویمازدی منتظر بئله خوش گلمیسن بابا
..
..
بیرده بویور گوروم نجه دی اصغر ای بابا
سیراب اولوب او غنچه گل احمر ای بابا
یا تشنه دی هنوز او ملک منظر ای بابا
یا سو ویروبدی حرمله خوش گلمیسن بابا
..
..
گرچه اسیرلیق آلوب الدن قراریمی
پوزمام ولیک تا به ابد اؤز وقاریمی
ویرّم باشا وقاریله اؤز روزگاریمی
سینمام بو قوم باطله خوش گلمیسن بابا
..
..
عشرت لباسینی بابا تندن قیزون سویوب
سن سیز جهانی ایستموری جانِدن دویوب
آز سنّیله جهاندا منى کیم یتیم قویوب
آغلار «حزین» بو نسگله خوش گلمیسن بابا
..
..
..
#حضرت_رقیه #حزین_خسروشاهی #حضرت_رقیه_شهادت #ترکی #زبدةالاشعار