حالات خرابۀ شام
..
..
مرحوم یحیوی
..
..
او حالیله دولانوب شام اولدی شامی تمام
در خرابه نی دوتدی غروب وقتی مقام
..
خرابه چون او گئجه منزل اولدی عترتینه
کشیک چکردی اوزی اهل بیت عصمتینه
..
او باش که عترتینه سرپرستیدی هر دم
ولیک اوز باشینا قویمادی سپاه ستم
..
ووروب جدایه یره نصب ائدوب سپاه عنود
چکوب معاینه عیسانی داره قوم یهود
..
همان او قوم یهودون بیری روایت ائدر
کشیک چکردوک او باشه او یرده الّی نفر
..
کشیکچیلر هاموسی دور و برده یاتمیشدی
هواس و هوشی تمامی باشندان آتموشیدی
..
گئجه زمانی که ائتمشدی ظلمت عالمی تار
هامی یاتوب منیدیم بیر او حالده بیدار
..
نه گوردوم اوندا که بیر قز ولیک چوخ حیران
خرابه نون قاپوسین قصد ائدوب گلور نگران
..
یواش یواش یریور اضطراب و وحشتیله
باخور کشیک چی لره احتیاط و دقتیله
..
اوزیمی منده یاتانلار تک ایلدوم ناچار
که تا یتیمه باخوب گورمسون منی بیدار
..
آیق گوزیله باخاردیم بو فکریله که خدا
گوروم خیالی ندور یا هارا گئدور بو بالا
..
نه گوردوم اوندا او پروردۀ حریم ادب
گلور او باشه طرف گوزده اشک دلده تعب
..
یاخونلاشوب او باشا تا دایاندی آهسته
ادبله اللرینی قویدی سینه سی اوسته
..
سلامین ائتدی ادا چکدی سینه دن بیر آه
جدا باشیندان اگیلدی او قانلو باش ناگاه
..
او طفل او باشی دوتوب الده دستۀ گل تک
بیر اوپدی ایگلدی فریاد گلدی بلبل تک
..
قوروب او یرده دل شبده بزم راز و نیاز
دل آچدی درد دلون شرحینه او مایۀ ناز
..
توکوب سرشگینی رخساره ائتدی شور و فغان
دئدی بابا غم هجرون ائدوبدو باغریمی قان
..
او وقتدن که اسیر ایلیوب سنی دشمن
یوزیم بو مدتی بیر گولمیوب مصیبتدن
..
بو قانلو گوزلره بو خشک لبلریوه قسم
گورونمیوب گوزیمون یاشی خشک اولا بیر دم
..
بابا دینده سنه غیظ ائدردی شمر شریر
ووراردی باشیمه قمچی دییه ردی دینمه اسیر
..
گلنده شیون و فریاده آغلیاندا سنه
گهی گولوب او شقی گه آجقلانوردی منه
..
شکسته گوگلومی از بسکه رعب آلوبدو منیم
هنوز رعشه ده دور تیترور ایندیده بدنیم
..
عراقدن باباجان قوم بیمروّتیله
دمشقه گلمشوک الله بیلور نه زحمتیله
..
سفر اوزاق یولی بیراهه ناقه بدرفتار
گئجه گونوز یول ائدن گور اولور نه حاله دچار
..
سوروردیلر او قدر تند و تیز ناقه میزی
که اگلشنمزیدوک ناقه لر یخاردی بیزی
..
یره یخلماقمون دردی ساربان هولی
سوروندوروب منی چوخ یول پیاده جان هولی
..
زبسکه آت دوشونه سالدی لشگر اعدا
ایاق یالین چولی قاچماقدان اولدوم آبله پا
..
او قدری خار و مغیلان باتوب ایاقیمه
که زحمتى یتوروب جانیمی دوداقیمه
..
بیزیم مصیبتی میز باشه چاتماییب چاتماز
بیزه بلا یازیلیب دور بلا بیزی آتماز
..
همیشه یحیوی یاد ائیله آل طاهانی
خرابه یئرده خصوصاً او طفل نالانی
..
یقین دی محشره زهرا گلنده سینه سی چاک
اونون شفاعتی ائیلر سنون حسابون پاک
..
..
#خرابه_شام #یحیوی_اردبیلی #ترکی #زبدةالاشعار
نظر دهید