قارداش حسین بقیع منیم کربلا سنون #حسنیه_کریمی_مراغه_ای

شهادت امام حسن مجتبی (ع)
..
..
..
..
مرحوم کریمی مراغه ای
..
..
..
..
قارداش حسین بقیع منیم کربلا سنون
زهرا آنام جواری منیم نینوا سنون
..
قبریم منیم قالار گون ایوینده ذلیل و خوار
ایوان نقره کار و منار طلا سنون
..
بیرسو که حاصل اولدی منه جان بهاسنه
واضحدی باشوه گتورر مین بلا سنون
..
سن تشنه جان ویر ایچمه سو ئولدوردی سومنی
قوی باغلاسین سویی یوزیوه اشقیا سنون
..
زهریله ئولماقى منه یازمشدی روزگار
اما یازیلمیش آدیوه تیغ جفا سنون
..
صغرانی قوی مدینه ده ایوای دیسون منه
اما رقیّه آدلی شیرین دیل بالا سنون
..
چک نازین اکبرون کیمی هر لحظه قاسمین
قالدی امیدیوه حرم مجتبی سنون
..
قویما یتیملوق توزی قونسون جمالینه
اولسون حمایتون اونا صبح و مسا سنون
..
بایرام اولاندا تازه لباس آل نوازش ایت
ساخلا بو طفلی شاید الوندن دوتا سنون
..
دنیای پست بیر حسنی ساخلیانمادی
امرونده گورنه حکم ایده جاقدور قضا سنون
..
گیت جدّیمون حضورینه ایله دعامنی
ردایلمز دعاوی چوخ ایستر خداسنون
..
قلبیم آلشدى قوى الیوى اودلی سینمه
اولموب هله الون بیلگوندن جدا سنون
..
عیسا ویرردی قالب بی روحه روح اگر
سن سن که تربتونده قویولمش شفا سنون
..
حالیم نشان ویرور داخی ئوللم بو زهریله
قارداش غمینده ذکرون اولار وا اخا سنون
..
بیرده محبّتون بولورم چوخدی زینبه
اولسون عنایتون بو قزا مطلقا سنون
..
نه وار آناسی نه آتاسی دل شکسته دور
راه بلاده هم سفروندور اخا سنون
..
قانون سنون آراده گیدر زینب اولماسا
زینبدی خونبهاوی ایدن ادعا سنون
..
ئوللم منه ولیک گوارادی بو ئولوم
باشیم دیزونده ای شه گلگون قبا سنون
..
ساخلارسان اهل بیتمی بوللم اوزوم کیمی
قلبون رئوفدور اولارا بر ملا سنون
..
سن جان ویرنده کیم گله جاقدور سراقیوه
باشون دیز اوسته کیم آلار ای مهلقا سنون
..
نه بیر نفر گلر گوزیوی باغلاماخلقا
نه یول تاپار عیادتوه آشنا سنون
..
باشون یارا بدن یارا آغزوندا لخته قان
محبوس اولار سوسوز بوغازوندا صدا سنون
..
قاتل قویاندا حنجریوه قانلی خنجرین
آغلار او غملی حالوه ارض و سما سنون
..
سن آغلاما حسین منه، آغلا اوز حایلوه
آغلار همیشه حالیوه خیرالنسا سنون
..
قان بسترینده شمر چخان وقته سینه وه
زینب گلر سراقیوه الده قرا سنون
..
جدّیم آتام آنام دوتاروخ کربلا یولون
مشتاق اولار زیارتیوه انبیا سنون
..
زینب ایدنده شمریله مقتلده کشمکش
باشون آلار دیز اوسته بابام مصطفی سنون
..
سن آغلاما منه من اوزوم آغلارام سنه
قربان او آغلیان گوزیوه مجتبی سنون
..
شرمنده سن اگر عملوندن «کریمیا»
غم ایلمه شفاعت اونوندور خطا سنون
..

#حسنیه #کریمی_مراغه_ای #حسنیه_شهادت #ترکی #زبدةالاشعار