پندیات – عبرتنامه
گریز به #قتلگاه
..
..
..
..
مرحوم کریمی مراغه ای
..
..
..
..
ای دل نه محبّتله دوتوبسان بو جهانی
آلّانما بونون جلوه سینه فانیدی فانی
..
بوغربته بیل باغلاما یادایله وطندن
بیر ذرّه صفا گورمدی بیرکس بو چمندن
..
تکیه ایلمه سنّیوه هشتاد اولا دوخسان
بیر ساعتین عرضینده گورللر داخی یوخسان
..
جبراً بؤ جلال حشمی گوزدن آتارسان
توپراقلارین آلتندا ملالیله یاتارسان
..
یاران قیدر کیمسَه یانوندا قالان اولماز
عزّتله سنه بستر پرقو سالان اولماز
..
تنها عملوندی سنه قبرونده مصاحب
وای حالیوه گر شرّون اولا خیروه غالب
..
یاد ایله او گوندن که جواب ایلر اطبّا
مأیوس اولی حسرتله حیاتوندن احبّا
..
مصرف ایلدون عمریوی تجدید بناده
هیچ قبر ایوینی سالمادون آخر نیه یاده
..
ای مجلس ترحیمه گلنلر اولون آگاه
بیر بیله گونون مثلده وار سیزلره ناگاه
..
قربان سیزه تا فرصتویز واردی الوزده
تجدید نظر ایلیون هر آن عملوزده
..
گر مُفلس دوران اولا یا صاحب ملیان
بو منزلی ترک ایتمه لیدی حالی پریشان
..
دنیایه گلنده نجه افغانیله گلدون
گولدی هامی سن دیدۀ گریانله گلدون
..
جهد ایله گیدنده گیده سن شاد و خرامان
بیر عمر دالونجا قویاسان گوزلری گریان
..
فخر ایلمه بال پریوه خویش و تباره
آخر بونی بیل تک گیده سن کُنج مزاره
..
گر رستم زاله اولاسان رزمده بارز
گردان جهانه اولاسان عمده مبارز
..
نکرِین گلن وقتده نیرو ایشه گلمز
قبر ایچره داخی قوّت بازو ایشه گلمز
..
هر حالده قر آنله اولسون سر کارون
ایسترسن اولا نوریله معمور مزارون
..
قرآن اوخی احکامینه بیربیر عمل ایله
هر خیر عملی توشۀ یوم اجل ایله
..
سعی ایلمه عالی مودا قیمتلی لباسه
صرف ایتمه عزیز عمریوی تجهیز اساسه
..
قبره قویاجاقلار سنی بیر آغ کفنیله
اوردا یاتاجاقسان بیر اوجوز پیرهنیله
..
شایسته دی قرآنه ووراخ چنگ توسل
هر حالده بیز ایلیاخ اللهه توکل
..
قرآنی کیچیک سایما که حکم ازلیدور
قرآنه طرفدار حسین ابن علیدور
..
قرآنی حسین ابن علی جان کیمی ساخلار
اوخ گلسه آتار اصغری قرآنی قوجاخلار
..
باخمازدی سوسوز جان ویرور اصغر قوجاقندا
قرآنی اوخوردی گنه صفلر قاباقندا
..
دگدوخجا او گل جسمنه اوخ نیزه و شمشیر
هر یاریه سسلردی حسین بیر اوجا تکبیر
..
سسلردی خدا جسم سنون یاره سنوندی
بو قلب که تیریله اولوب پاره سنوندی
..
من چاره سیزم امر مشیّت قباقندا
بنده اوزیوین درد سنون چاره سنوندی
..
دوتموش بالا وای ناله سی صحرانی ربابین
اوخلی قوزی قربانیله گهواره سنوندی
..
هر یاره دگور جسمیمه بیر منصبیم آرتور
هر قان که یارامدان ایده فوّاره سنوندی
..
عشقوندی حسینی گتورن کرب بلایه
بو خویش و ائلیندن دوشن آواره سنوندی
..
لیلانین اوغول وای سسینه دشمنیم آغلار
اکبرده سنون قاسم مه پاره سنوندی
..
مرگیمده باجیم زینبه سن صبر ویر الله
زینب که سالوبدور باشنا قاره سنوندی
..
وحشتله قاچور چوللره ایستکلی رقیم
شیرین دیلیله یالواران اشراره سنوندی
..
سیلی اثریندن بالامون رنگی قرالدی
بو قانلی قولاقلاردا کی گوشواره سنوندی
..
بیر باشدی بو پیکرده قالان سندن امانت
داش وورسا عدو چکسه اگر داره سنوندی
..
من بیر زادا مالک دگولم بنده یم الله
هر زاد منه منسوب اولا یکباره سنوندی
..
ناموس الهیدى او مخیمده کی قزلار
دشمن باش آچوخ چکسه له بازاره سنوندی
..
عاصیدی «کریمی» الی بوشدور یوزی قاره
عفو ایلیه سن، یاندیراسان ناره سنوندی
..
..
#پندیات #کریمی_مراغه_ای #حسینیه_کریمی_مراغه_ای #حسینیه #حسینیه_شهادت #ترکی #زبدةالاشعار
نظر دهید