خطاب به حضرت امام زمان عج الله تعالی فرجه الشریف
حالات سبط اکبر ، معصوم چهاردهم امام حسن مجتبی علیه السلام
گریز به شهادت
.
✍️زبدةالاشعار✍️
.
🆔: @nohe_torki
.
مرحوم انور اردبیلی
.
نقدری یابن الحسن شیعه لر بلا گوره جک
نقدر ظلمه دوزوب رنج و ابتلا گوره جک
.
.
هاچان عدوّلرون قدرتی مهار اولاجاق
لوای ظلم یاتوب عدل برقرار اولاجاق
هاچان او حُسن رخون پرده دن کنار اولاجاق
هاچان محب لرون دردینه دوا گوره جک
.
.
نه وقتیده گوره سن یا بقیة الاخیار
غلافدن چخاجاق ذوالفقار آتشبار
نظام دین تاپاجاق روح نظم و استقرار
جهان یوزونی جهان اهلی جانفزا گوره جک
.
.
دولوبدی فسق و فسادیله عالم امکان
بشره غالب اولوب ضعف مذهب و ایمان
غریب عصریدی واغربتا دیور قرآن
هاچان کتاب خدا حکمنی رسا گوره جک
.
.
نه اهل ذکر و دعادن یتور قبول دعا
نه صبر وار فقراده نه اغنیاده عطا
نه مهرباندی بیوک لر نه وار کیچیک ده حیا
نقدر خلق ئوزونی جهله مبتلا گوره جک
.
.
وئروب تدیّن و تطهیره لطمه انسانلار
خموش اولوبدی تعدّیله شمع وجدانلار
فرنگ صورت اولوب صورتاً مسلمانلار
یوبانسون عالم ئوزون مرکز جفا گوره جک
.
.
ال آت قلنجووا ای دست انتقام خدا
چاغور او اوچ یوز اون اوچ شخصی داده یا مولا
سن انقلاب کبیر ائتمسون اگر بر پا
مگر سفینۀ دین ساحل نجا گوره جک
.
.
روا دگول ایله گوز یاشلی منتظر قالاسان
گرک گلوب بو جهان ملکینه صدا سالاسان
بنی امیه صفتلردن انتقام آلاسان
سنون قدوموویله عالم اعتلا گوره جک
.
.
بنی امیه آدین یازدی غفلتاً خامه
دولاندیروب سوزومون طرزین ائتدی غمنامه
سزای لعنت حق اول گروه ظلامه
جهیم عذابی اولار واردی تا خدا گوره جک
.
.
نه ائتمیشیدی او ظالملره آنان زهرا
شهیده یوللادیلار قبره ای امام هدا
فقط ئوزون بیلوسن هاردا دفن اولوب زهرا
نقدر ظلم و ستم خیرة النسا گوره جک
.
.
یقین بو محنته صبح و مساده آغلورسان
بقیعده گهی بیت خداده آغلورسان
گهی نجفده گهی کربلاده آغلورسان
فلک سنی نقدر عاشق عزا گوره جک
.
.
عزالی سان سنه خوشدور عزا سوزون دانشاق
بقیعدن دانشاق کربلا سوزون دانشاق؟
حسین قالوبدی هله مجتبی سوزون دانشاق
مگر زمانه ایله غملی پیشوا گوره جک
.
.
او مجتبی که پیمبر آلاردی آغوشه
بودرو دیردی گل عمریمه گوزل خوشه
عزیزدور منه دلبندیدور جگر گوشه
بونون وجودی ایله باغ دین صفا گوره جک
.
.
منیم بو اوغلوم حسن کنز حق گوهردور
بهشت جوانلارینون سیدی مطهردور
سلیم نفسدی صلح و صفایه مظهردور
اگر چه دهریده چوخ غملی ماجرا گوره جک
.
.
او قدری عاشقدی مجتبایه شیر خدا
دیردی بو سوزی حق حسنده اول مولا
حسنله نفس علی بیدری فرق یوخ اصلا
علی نه عالمی سیر ائتسه مجتبی گوره جک
.
.
حسن حبیب پیمبردی صاق گوزومدی منیم
لسانی عین لسانیم سوزی سوزیمدی منیم
حسن خلیق عربدی حسن ئوزومدی منیم
اونون محبی ئوزون حقه آشنا گوره جک
.
.
چهل و یکم هجرتده زادۀ زهرا
معوییله ائدوب صلح نامه نی امضاء
گوزونی یومدی خلافتدن اول امام هدا
بو فکریله که صفا سلک اتقیا گوره جک
.
.
او صلح نامه نی ائتمیشدیله بیله تدوین
معاویه اولا حق سوز دینلره خوشبین
ولیّ عهد ئوزونه بیرده ائتمیه تعیین
نه ایش که مملکته گورسه بی ریا گوره جک
.
.
یتوب مرامه او پیر مزوّر و مکار
اوتانمادی حسنه ائتدی بو سوزی اظهار
حسین عم اوغلومادا بیعته ائله وادار
نه وقته جک منی دشمن او مقتدا گوره جک
.
.
بویوردی قیل ئورگوندن بو آرزونی کنار
کنار ایدنمیوسن ساخلا دلده قبره آپار
حسین سنه ایلمز بیعت ای خبیث تبار
حسین ئوزون سنه بی مهرو اعتنا گوره جک
.
.
حسین سنیله ویره ال اله دگول مقدور
محالیدور ئوزوه نسلووه اولا مقهور
حسنی صلحه رضای خدا ایدوب مأمور
حسینون آیری ایشی واردی کربلا گوره جک
.
.
او صلح نامه که باغلاندی خیر اسلامه
معاویه عملاً چکدی متنینه خامه
محوّل ایتدی اموراتی قوم ظلامه
علی دیین دئدی اعمال ناروا گوره جک
.
.
ئوزونه تنگ گوروب کوفه نی امام حسن
گُتوردی پیر و جوانین ائدوبدی عزم وطن
بویوردی آیریلور ای کوفه مجتبا سندن
مزار شیر خدادن ئوزون جدا گوره جک
.
.
سنه علاقه واریم ایلیم همیشه مکان
نجیب قونشولاری من چخارتمارام یاددان
اولار ولی حسنه ویرمیور علاقه نشان
همیشه هجر غمین آل مصطفی گوره جک
.
.
حسن گیدور غم هجراندن رقم ساخلا
صباحلر افقونده سن ابر غم ساخلا
حسین قوناقون اولان وقته محترم ساخلا
قوناق گلوب سنی بیرده او باوفا گوره جک
.
.
ائدوبدی حسرتیله ترک کوفه نین خاکین
گلوب مدینه سینه مجتبی اولوب ساکن
معاویه اونی آسوده قویمادی لاکن
دئدی گئنه حسنی خلق رهنما گوره جک
.
.
نقدری واردی حسن استراحتیم اولماز
نفسی گلسه منیم استقامتیم اولماز
حجازون اهلینه محکم ریاستیم اولماز
او نقشه لر که واریم دلده پشت پا گوره جک
.
.
اودور مدینیه گوندردی زهر قتالی
مرام و فکرینه مروانی ایلدی حالی
یتوردی جعدیه زهری او بیحیا والی
بو ایشی بیلدی او ملعونه جابجا گوره جک
.
.
آلوبدی شیشۀ زهری اله او قتاله
شرارۀ ستمی سالدی قصر اجلاله
قاریشدی زهر سویا کوزه ایلدی ناله
او سوئی نوش ایلین بیرده گور شفا گوره جک
.
.
اجل اویاتدی غرض خواب نازدن حسنی
گوروب سوسوزدی سوایستور وجودینون چمنی
ایدوبدی نوش او سودان دوشدی لرزیه بدنی
بیلوب جگرلری اول زهریدن یارا گوره جک
.
.
بفوری سوده الماس قانه جذب اولدی
ئورک پیاله سی مسموم قانیله دولدی
جگرلری آلیشوب رنگی گل کیمی سولدی
دیدی بو حالی نجه خویش واقربا گوره جک
.
.
گیجه زمانی کیمی داده سسلیوم یارب
حسین دوام ایلمز کشف اولونسا بو مطلب
سزلتمی ایشیدوب ایندی دیسگینر زینب
نقدری معجرینی زینبیم قرا گوره جک
.
.
بوسوزی بیر نفر عالم بویوردی منبرده
یازوب اونون دیدیگین چکمورم سوزه پرده
گوروب آلولانور اکبادی چوخ گلور درده
فلک او خانه آبادی غم سرا گوره جک
.
.
حسیندن ایستدی بیر طشت ایهاالاحباب
حسنه باخدی شه کربلا اولوب بی تاب
چخارتدی زینبی دهلیز خانیه اوجناب
بیلوردی قالسا خفا دردی برملا گوره جک
.
.
اطاقدن ایلدی مظهر بتولی کنار
امام قی ایلدی طشته یا اولوالابصار
جگرلری متلاشی اولوبدی گیتدی قرار
مسلم اولدی حسن عمرینی فنا گوره جک
.
.
اوجالدی ناله سسی گتدی زینبی درده
دوزنمدی اطاقا یوز قویوب دل افسرده
حسین عباسینی طشت اوستنه ایدوب پرده
جهان مگر او محبتده بیر اخا گوره جک
.
.
حسین الینده الی جان ویروب امام حسن
غریب کرب وبلا غسل وئردی ائتدی کفن
سمایه اوج ایلدی آه و ناله و شیون
اینانما دهر ایله بیر مجلس بکا گوره جک
.
.
جنازه نی گتوروبلر غم وملالیله
حریم احمده یوز قویدیلار جلالیله
چخوبدی عایشه پیشوازه آیری حالیله
دیدی مگر هر ایشی آل مرتضی گوره جک
.
.
ایویمده دفن ایده سوز مجتبانی یوخ امکان
دگل پیمبر رحمت جواری قبرستان
جنازه نی دالی قیترمه سوز همین الان
مدینۀ نبوی شورش خطا گوره جک
.
.
محمد حنفیه قیلوب اونا اظهار
جمل عسکره اولدون اوگون ستمله سوار
بوگونده استرون اوسته ویرورسن آیری شعار
نقدری سندن علی عترتی جفا گوره جک
.
.
خطر جنگی گورن وقته سیدالشهدا
خطاب قیلدی بنی هاشمه اومیر هدا
قلنج چکمگوزه قارداشیم دگلدی رضا
قویون نه ایش گوروری گورسون اشقیا گوره جک
.
.
طلیق زاده لره ایندی که کمکدی فلک
بقیع سمتنه تابوتی قیترون نیلک
جنازیه توخانان اوخلاری کنار ایلیک
قوناقدی فاطمیه اوغلونی آنا گوره جک
.
.
اگر چه جنگ و جداله یوخوزدی دلده هراس
گرک توکولمیه قان بیز دوتاق بقیعده یاس
قویوب غلافینه شمشیرین آغلادی عباس
دیدی بو قوللار هاچان بس ئوزون رها گوره جک
.
.
امامون امرینی اجرایه قویدی هاشمیان
جنازه نی یتوروبله بقیعه ناله کنان
نماز قیلدی حسین قبره قویدی ایتدی بیان
بوقبری هر کیم اوپه نور کبریا گوره جک
.
.
غمونله قارداش حسن قلبیم اولدی مالامال
سنه نوا ایدرم گوزیاشیم اولا سیّال
محالیدور ایلیم بیرده عطر استعمال
گوزوم بو عالمی بی وقروبی بها گوره جک
.
.
داخی لباس نشاطی وجودیدن سویدوم
زمانه لذتنه پشت پا ووروب دویدوم
سنون باشووی قرا تپراق اوستنه قویدوم
تصور ایتمه حسین نرم متّکا گوره جک
.
.
حجاز تپراقی هر قدر لاله زار اولسا
صبا یلی نقدر گلستانه یار اولسا
کبوتران هوا یا که اشکبار اولسا
حسین ئوزون اوقدر عاشق نوا گوره جک
.
.
زیان گورن اودگل ای همای صلح وصفا
اثاث منزلی یا خیمه سی اولا یغما
زیان گورن اودی که قارداشین مزاره قویا
یقین ایشقلی گونون لیلةُ الدُّجا گوره جک
.
.
یوزووی گورسه حسین خوابیده تسلادور
یوخوما گل دانشاق خواهش و تمنادور
ئولنلرون بیلورم وعده گاهی رویادور
گوزوم سنی یوخودا گورسه مطلقا گوره جک
.
.
#حسنیه_مدح
#حسنیه_شهادت
#نقدری_یابن_الحسن_شیعه_لر_بلا_گوره_جک
#انور_اردبیلی
#یادگار_انور
#ترکی
.
✍️ #زبدةالاشعار✍️
.
🆔: @nohe_torki
نظر دهید