حمد اولا بیر خالقه لطفین یتوردی کامله #حسینیه_ذاکر_مراغه_ای

در فضیلت عزاداری امام حسین (ع)
#گریز به حضرت ابوالفضل (ع)
..
..
..
..
مرحوم ذاکر مراغه ای
..
..
..
..
حمد اولا بیر خالقه لطفین یتوردی کامله
ویردی زینت عالمینه چارده معصومیله
..
ایلیوبدور عزّت اسلامی روزی بیزلره
ریشۀ ایمانی اکدوخ تا یتیشدی حاصله
..
شکر لله اولموشوخ ایمدی عزادار حسین
عالمه فخر ایلروخ بو منصب عظمائیله
..
بو حسین نوکرلری لازمدی ایتسون افتخار
ساکنان عرش اعلایه بو فخر تامیله
..
اسم نوکرلوق کیمه اطلاق اولا بو باره ده
وار یری ایتسون تفوّق عالم بالائیله
..
ای خوش اول شخصه که آدی ثبت اولا بو دفتره
دفتر عصیانینه حقّا چکلّه باطله
..
بزم غمده اگلشوبسن فکر بازار ایلمه
دین حق دنیائیله دوتماز چتیندور مسئله
..
وای او شخصه بیر بئله مجلسدن اعراض ایلیه
یاگله بو مجلسه بعضی خیال خامیله
..
مین خلاف شرعیدن چیخ ایتمه خالقدن حیا
ایتماقا قرآن تلاوت بنده لردن شرم ایله
..
سن تلاوت ایلمه قرآنی چون بیگانه سن
شامده رأس حسین قرآن اوخور آوازیله
..
سینه وه وورما وورار محملده زینب سینیه
باشیوى یارما یارار زینب ووراندا محمله
..
هر نقدری اولسا عمرون آغلاسان صبح و مسا
بیل یقین اولماز عوض اکبر باشیندا بیر تله
..
شانوی بیل قدریوی آنلا مقامون درک ایله
عمریوی فوت ایلمه دوشمز بیله فرصت اله
..
حشر اولونجا آغلاسا آزدور حسین دیوانه سی
ناله دن دویماز حسین عاشقلری ایتمز گله
..
باخ او اشخاصه چیخوبدور اللری بو فیضدن
توپراق آلتیندا یاتوبلار سینۀ صد چاکیله
..
پیکرون سالم یرون راحت قباقدا خادمون
بش دقیقه طول اولا مجلس گلورسن تئز دله
..
سینه ده دورد مین یارا ایستی قوم اوستی شاه دین
امتی یاددان چیخاتمازدی او پوزقون حالیله
..
دوت حسینین دامنیندن توک ئولونجه گوزیاشون
چنگ وور بو زورقه چیخ بحر غمدن ساحله
..
گوزیاشون بیر درّیدور صرافی خلّاق جلیل
ساخلا بازار جزایه ساتما هر ناقابله
..
کلمۀ سن من بو تشکیلاتده اولماز قبول
من کیمم سن کیمسن ای جاهل ندور بو غائله
..
گر حسینی سن حسین بیردور ندور بو اختلاف
سنده منده بیر چمنده نغمه خوانوخ بیر گله
..
سن بیزیم هیئتده سن گیتمه او بیرسی هیئته
مانع اول قویما گیدن اشخاصی تبلیغاتیله
..
بلکه سن منع ایتدیقون هیئت حقیقت حقّیدی
اوندا دشمن اولماسان سن عترت طاهائیله؟
..
نوحه خوانسان بعضی مجلسده ندن گلمور سسون
لال اولورسان بعضی مجلسده سالورسان ولوله
..
شانوی بیل انبیا ایلر مقامون آرزو
رتبه وی سیندیرما اعلادن یتورمه أسفله
..
گوردی رؤیاده حبیبی بیر نفر نیکو صفات
عرض ایدوب ای سو ویرن گلزار عشقه قانیله
..
سویله قالدی قلبده بیر حسرتون آیا سنون
هر زمان مقصوده یتدون حق ایدن الطافیله
..
اوّل عمرونده درک ایتدون پیمبر محضرین
عاقبت اولدون شهید کربلا اکرامیله
..
ایتدی فرمایش بویوک بیر حسرتیم قالدی منیم
کاش اولیدیم بیرده دنیاده دل سوزانیله
..
آغلییدیم بیر دویونجا کربلا مظلومینه
بزم ماتمده آچیدیم باشیمی افغانیله
..
گور قویوبسان بیر نجه عالی مقامه سن قدم
آرزو ایلور مقامون انبیاء اوتادیله
..
سن بئله فکر ایلمه یوخدور حسینه آغلیان
هاجر و حوّا ویروبلر سس سسه زهرائیله
..
روضه خوان الله، مجلس عرش، خادم جبرئیل
آغلیان جن و ملایک شرح عاشورائیله
..
مریم و سارا بهشتی ایلیوب بیت الحَزَن
آدم و نوح و خلیل و عیسی و موسائیله
..
ایمدی ده زینب باسوبدور باغرینا پیراهنین
وای حسینیم وای دیوب آغلار فغان و آهیله
..
سن یوزه گوز یاشی توکمه گوزلرون کم نور اولار
قوی تنور ایچره حسینون عارضی باتسون کوله
..
سن حسینون خاطرینه بذل و احسان ایلمه
باشینی ویرسین حسین قوی سندن اوتری قاتله
..
وای او اشخاصه بو تشکیلاته ایلر مسخره
وای او بد ذاته بو تشریفاته سویلر مهمله
..
وای او اعماله که اسکیلده امامین قدرینی
قویمیا فرق علت ایجاده موجوداتیله
..
وای او بی دینه امامی فرض ایدر عادی بشر
بیر بیله شخصین ندور فرقی بو حیواناتیله
..
جلوۀ خورشیدی درک ایتمز او گوز که کوریدور
فرق ویرمز دیدۀ خفّاش نوره ناریله
..
جاهل محضه حدیث عشق رستمنامه دور
کشف اسرار ایلمه هر بیر سر و سامانیله
..
جان نثار شاه مظلومان حبیب اولسون گرک
ایلسونلر سینه سین شانشان دم پیکانیله
..
بش دقیقه روضه طول اولسا اولورسان تنگدل
هی باخارسان روضه خوانه دیدۀ اکراهیله
..
مکتب عشقه بُریر ایستر که ویرسون امتحان
دمبدم تکبیری ذکر ایتسون لب عطشانیله
..
چون یارا دگدوقجا آرتیردی اورکده عشق یار
نیزه و خنجر قباقینده ایدردی هروله
..
گیت دبیرستان عشقه کربلا صحراسینه
گور دبیر عشقی معلومات عشقى سال اله
..
شوقله دوتموش الینده دفتر تصدیقینی
منتظردور تا ایده تیریله امضاء حرمله
..
عرشدن تحصیلینه سسلور ملکلر آفرین
فرشدن اوج ایلدوقجا عرشه شور و ولوله
..
تنگ اولاندا مجلسون فوراً اولورسان تنگدل
اگلشنمیرسن اولورسان دل غمین بی حوصله
..
خردا قزلارین اوچون دوردین جفائیله ولی
شمر لامذهب سوار ائتمیش سنیق بیر محمله
..
رشتۀ بیماریدن سال بوینووا محکم کمند
عشقده اول سیّد سجّادیله هم سلسله
..
هر نه ایسترسن آل آند اولسون حسینون جانینه
بو قاپی باب کرمدور لا دیمزله سائله
..
بارگاه کبریایه قیل حسینی واسطه
اشگ چشموندن گوتور عقبایه زار راحله
..
بارالها بیزلره توفیقوی ایله رفیق
آند ویرّم سو کنارینده دوشن بیر جوت اله
..
هانسی اللردور او اللر آه یا صاحب زمان
وار یری شیعه قاتا گوز یاشینی خون دله
..
ای ابوالفضل ای اولان امّتلره مشگل گشا
بو حسینیلر سنی سسلر دوشنده مشگله
..
بوندان آرتوخ آتش هجرانه یاندیرما بیزی
ایسته قبر پاکیوه زوّار اولاخ حضّاریله
..
آه او ساعتدن سنه ال تاپدی قوم بی حیا
داد او ساعتدن عقاب اوستن یخیلدون مقتله
..
خیمه گاهه یوز دوتوب سسلندون ادرکنی اَخا
گل اجل باشه یتوب دیدار قالدی آجله
..
آدیمی سقّا قویوبسان یوخ سویوم شرمنده یم
گل ولیکن اولما راضی حالیمی قزلار بوله
..
گل حسین اون یدّی جلادین الینده قالمیشام
باشیم اوسته گور نجه قاتللر ایلور هلهله
..
گوزلریمه قان دولوب گورمور گوزوم یوخدور الیم
بیر کسیم یوخ رحم ایدوب تا گوزلریم قانین سیله
..
«ذاکرا» اولسا حضور شهده اشعارون قبول
بیتوه بیر بیت محشرده ویرر زهرا صله
..
ناامید ایتمز «کریمینی» شفاعتدن یقین
بیر حسینی که ایدوبدور بذل خاتم بجدله
..