اعلان عزا،گریز به استمدادحضرت ابوالفضل علیه السلام
..
..
سعید حضرتی (هاتف)
..
..
بایِ بِسمِ اللَّـهِ عشقیله الیمده خامه
فکری وار شرح بلانی یئتوره انجامه
..
باخیرام هر طرفه نصبیدی پرچمله قرا
جمع عشاق حسین ائیلوری اعلان عزا
..
عشقی تفسیره چکم یوخدی لیاقت منده
یارادیب لطف ولا ایندی جسارت منده
..
ایستیرم شرح قضایایه بو نوعی دیل آچام
تیر اندوهی چکیب قلب فلک اوسته ساچام
..
آز قالور بَرهم اولا فاطمه نین اجلالی
آز قالور گوللّری اولسون سِتمین پامالی
..
آز قالور شعله مِحنتده یانا پروانه
آز قالور کی بویانا زینبین الّلر قانه
..
آز قالور دیلده مَلالیه بالام وای سسینه
بیر آنا اَل آتا حسرتله یانان سینه سینه
..
آز قالور فاطمه چولّلرده اولا آواره
اوخشادا سینهٔ سیناده اوخی میسماره
..
آز قالور اَلّلرین عالم چالا محنت باشینا
آغلییا بیر باجی الّلرده ئولن قارداشینا
..
آز قالیر قارداشی قارداشدان اوتاندیرسین عدو
آزقالیر کی اود اولوب یاندیرا عالملری سو
..
سو نه سو،آتش حسرت یاز آدین دیوانه
سو نه سو،وار یئری عالم بویی دونسون قانه
..
آز قالیر،بیر اوجا بوی سروی جفا سیندیرسین
قدینی خم ائلیوب ظلمیله بَرگین قیرسین
..
آز قالیر آرخام ائلیم سیندی بئلیم وای سوزونه
آه او دَمدن کی جفا تیری یول آچدی گوزونه
..
ییخیلان حالیله سسلندی کی یاندیم قارداش
گل اوزون گور نئجه اصغردن اوتاندیم قارداش
..
ذکر یاحیدر و یافاطمه یا زینبیله
نحری آلدیم اود الان دیلده کی تاب و تَبیله
..
مشکی دولدوروم،اورک چاتدی اودَم آماله
سووا باخدیقجا چکیب گوزلره اشکیم هاله
..
اووجیمی آب فراتیله کی لبریز اِئلدیم
گوزومون یاشینی حسرتله عذاره اَئله دیم
..
بیر سووا باخدیم حسین،بیرده آخان اشک تَره
قویمادیم نفسیمی بیر آن دوشه دست خطره
..
نوکرین تن ده ازل عقلی اولار اولاسی
سو ندور کی گرک ئولسون دئسه ئول،مولاسی
..
سویی آتدیم،دئدیم ئولسمده سوسوز ئولمه لیه م
گوزلریمنن گرک اشکین یئرینه قان اَلیه م
..
دگسه سو لبلریمه اوف اولا عالم سسلر
نئجه کی من سو ایچَیم یانسین عطشدن اصغر؟
..
ایچمه دیم،غیظیله آتدیم سویی یاندیردیم اونی
اهل بیته بو اولان عشقیمه آندیردیم اونی
..
سسله نیب عالم معنا منه احسن احسن
نه تک عالم،دئدی زهرا منه احسن احسن
..
الغرض مشکی سالیب چیگنیمه دوردوم ایاقا
ذکر یا زینبی امیّدیله گئتدیم دوداقا
..
بیر باخیب مشکیمه بیرده او گلن یوللاریما
مشکی تاپشیردیم امیدیله اوزون قوللاریما
..
خیمه یه چاتماقا سالدیم یولی نخلستانه
بلکه مشکی یئتیرم خیمه ده تئز طفلانه
..
نه بیلییدیم کی کمین اوسته کسیبلر یولومی
چیخدی نامرد شَقی سالدی ازل صاغ قولومی
..
قویمادیم مشکیمی دوشسون خطره ائتدیم عوض
سول الیم ائتدی حمایت منی بحران دا غرض
..
فکره دوشمه بو سوزولمه سنه قربان من اولوم
سو یولوندا نئجه صاغ گئتدی ائله گئتدی سولوم
..
دونده ریبلر گوزومون یاشینی گوزده قانه
مشکی مین زحمتلیه آلدیم حسین دندانه
..
ناگهان مشکینی تئز اوخلا سسی گلدی حسین
مشکیمی باغریما تای تیر بلا دَلدی حسین
..
طول وئرماخ سوزه غم عالمی آرتار مُحنی
گل اوزون گور کی سالیبلار نئجه احواله منی
..
ییغیشیب مور کیمی اهل شقاوت باشیما
وئریر اون یئتدی شقی گور نئچه قیمت باشیما
..
کسمه میش باشیمی حراجّه قویوب بیر اوباش
کم ساتیر گل،گل اوزون قیمتینه آل قارداش…
..
..
#ورود_محرم
#عباسیه_شهادت
#بای_بسم_الله_عشقیله_الیمده_خامه
#حضرتی_هاتف
#ترکی
#زبدةالاشعار
نظر دهید