ایدوبدی کلک مصیبت رقم بو عنوانی #کوفه_غفاری_زنجانی

خطبۀ حضرت زینب سلام الله علیها در کوفه
..
..
..
..
..
حاج اکبر غفاری زنجانی
..
..
..
..
..
ایدوبدی کلک مصیبت رقم بو عنوانی
حسین مصیبتنون یوخدی حدّ و پایانی
..
..
..
..
..
او گون که حشر بلا زینبه قیام ایتدی
حسین فاطمیه نوبت وداع یتدی
لوای نهضتی تاپشوردی زینبه گیتدی
ایدوبدی بدرقه زینب او تشنه قربانی
..
..
..
..
..
ذبیح اعظمی قربانگهه یولا سالدی
دالیجا قارداشینون باخدی دیده تر قالدی
باشینا چادر همت او قهرمان سالدی
یغوبدی باشینه بیر عدۀ ی یتیمانی
..
..
..
..
..
نقاب غم یوزونه چکدی شمس عاشورا
یتیشدی شام غریبان سیّدالشهدا
حرملر ایتدی یانان نصفی خیمده سکنی
فغان و ناله سسی دولدوروب بیابانی
..
..
..
..
..
سحر که باشلادولار کوفیه سفر بیر باش
کجاوه اوسته باجی نوک نیزه ده قارداش
باخوبدی قارداشا باجی توکوبدی گوزدن یاش
سر جداده چخوب سیره کوفه مهمانی
..
..
..
..
..
مینوبدی ناقۀ عریانه عترت اطهار
ایدنده رم دوه لر آز قالور دوشه قیزلار
امام عابدین احوالی عالمی داغلار
اسیر اهرمن ایتموش فلک سلیمانی
..
..
..
..
..
ویروبدی حکم زیاد اوغلی اول فرومایه
چیخوبدولار هامولار مرد و زن تماشایه
صدای غلغله اوج ایلور عرش اعلایه
قویوبلا گور نجه اجرایه امر شیطانی
..
..
..
..
..
یول اوسته کوفه نون اهلی دوروب صف اندر صف
زنان هرزه روان رقص ایدوب چالالار دف
سنق کجاوه ده اولاد صاحب رفرف
توکوله یوزلره گوزلردن اشک چشمانی
..
..
..
..
..
دوتوبدی نیزیه یوز زینب دل افسرده
دیدی اخا گتوروب قلبمی بو غم درده
اسیر ایدوب بیزی دنیا بو قوم نامرده
بو کوفه اهلی بیله اینجدور اسیرانی
..
..
..
..
..
یارالی باشیوه قربان حسین عنایت ایله
بو کوفه اهلی ضلالتده دور هدایت ایله
کلام حقی ئوزون بولّارا تلاوت ایله
حجازی لحنوه قربان بو زینبون جانی
..
..
..
..
..
سوسوز دوداقلاریوین پندینه سوزوم قربان
او قان دولان گوزووه یا حسین گوزوم قربان
محاسنیندن آخان قانیوه ئوزوم قربان
نه گلدی باشیوه قارداش گنه آخور قانی
..
..
..
..
..
یارالی باشیوه قارداش عجوزه داش ویردی
او بی حیا نیه مرآت حقی سیندیردی
اورکده رشتۀ امیدیمی او داش قیردی
بروزه گلدی او قلبنده بغض پنهانی
..
..
..
..
..
قیام ایدوب منه قارداش قیامت کوفه
نیه چخوبدی ئوزوندن جماعت کوفه
نه بی حیادی حسینیم بو ملت کوفه
ییوبدی نان و نمک سیندیرور نمک دانی
..
..
..
..
..
آتولّا داش بیزه بولار گهی چالولّار ال
قالوب نه حاله گورورسن بو عترت مرسل
فراز نیزه‌دن ای مهربان هرایمه گل
بو غربت اورکده ترک ایلمه بو نالانی
..
..
..
..
..
صورا دوتوب یوزونی کوفه بی وفالرینه
او ال چالان ایلین رقص بی حیالرینه
باخوبدی بعضلرین ناله و نوالرینه
مخاطب ایتدی دوباره او قوم نادانی
..
..
..
..
..
ایا جماعت کوفه ای آدلاری بد نام
توکون سرشک یوزه آغلیون جهاندا مدام
تجاهله ئوزوزی ویرموسوز نه دور بو مرام
کیم ئولدوب دیورم تشنه لب شهیدانی
..
..
..
..
..
بیر عدّه آغلوری ایندی تو کور گوزوندن یاش
کیشی لروز توکوری قان یره کسولّر باش
نولیدی تز اویانیدوز بو خوابدن ای کاش
دگر نه درده بو گون گریۀ پشیمانی
..
..
..
..
..
شباهتوز بو عملدن واروز او پیرزنه
وار او رشته سینه تاب آچار او تابی گنه
نقدر آغلاساز آزدور بو درده بو محنه
بیلون که پاره لدوز تار و پود ایمانی
..
..
..
..
..
باتوردوز هیکل ایمانی قانه ئولدوردوز
پیمبر اوغلونی سیز بی بهانه ئولدوردوز
سو ویر مدوز داخی پیر و جوانه ئولدوردوز
سو ویرمیوله مگر ئولدرلّه مهمانی
..
..
..
..
..
قویوبسوز آدوزی مسلم، پیمبره امت
مگر بو خرداجا قیزلار دگول اونا عترت
بو قدر اینجدسوز قیزلارین ندور علت
سالار بو حاله مسلمان مگر مسلمانی
..
..
..
..
..
یازوب حسینمه سیز نامه ایلدوز دعوت
عراقه گل آقا جان ، ایلیاخ سنه بیعت
قدوم رنجه بویور قوی حسین بیزه منت
گتوردی جانه بیزی ظلم حاکم جانی
..
..
..
..
..
مشرّف ایله بیزی کسب اعتبار ایلیاخ
وجودنیله سنون دائم افتخار ایلیاخ
گلن قدملریوه جسم و جان نثار ایلیاخ
اماندی دردیموزون سنده واردی درمانی
..
..
..
..
..
یالانلاروز هاموزی اعتباریدن سالدی
ئوزونه نفرت دنیانی کوفیان آلدی
آدوز یازولدی تواریخه بی وفا قالدی
کیم اهل کوفه کیمی ئولدوروبدی مهمانی
..
..
..
..
..
کمینگهوزده دی ای قوم خالق قهار
نتیجۀ عملوز حشریده اولار سیزه نار
قیامتین گونی حاشا تاپا مجال فرار
کمند محنته سالدوز بنات زهرانی
..
..
..
..
..
داش آتمیون اوتانون قوخوشور بالا قیزلار
بوقدر چالمیون ال آغلاشور اوغولسوز لار
گزن مدار مصیبتده پوز قون اولدوزلار
عزالیدور هامونون وار اورکدن افغانی
..
..
..
..
..
آنالارین اوتانون گوزده اشک آلیندن
آخور سرشک محن قیزلارین جمالیندن
ربابیم آیری دوشوب صود امر غزالیندن
نواسی آغلادوری آهوان صحرانی
..
..
..
..
..
رقیه مون سارالوب رنگی گل سیاقنده
نوایه نی کیمی گلموش بابا فراقنده
یتیم ایدوب اونی ظلموز بو خردا چاقنده
اورکده وار بالا مون آه آتش افشانی
..
..
..
..
..
سن حقّه شکر ایله «غفاری» هر صباح و مسی
بو نعمتی سنه ارزانی ایلیوبدی خدا
اولوبدی مهلت اجلدن بو نچّه مدّتی تا
یازوب تمامه یتوردون اوچومجی دیوانی