سال یوز دوخسان بش هجرتده حی لامکان #جوادیه_انور_اردبیلی

شرح حال معصوم یازدهم حضرت امام جواد علیه السلام
.

.
مرحوم انور اردبیلی
.
سال یوز دوخسان بش هجرتده حی لامکان
حجت هشتم رضایه قیلدی لطف بیکران
.
بیر اوغول ایتدی عطا مسند نشین حق اولا
فیض رحمت کسب ایده اهل زمین و آسمان
.
ایلدی معطور او زیبا گل امامت گلشنین
نکهتندن بهرور اولدی مشام قدسیان
.
آدینی جدی رسول اللهیله همنام ایدوب
کنیه سین ایتدی اباجعفر او فخر انس و جان
.
اولدی القابی تقی و مرتضی و هم جواد
قانع و مختار مشهور اولدی اول پاکیزه جان
.
یدّی ایل حضرت کچرتمشدی بهار عمریدن
طوسیده باب کباری ایلدی ترک جهان
.
ظلم مامون الرشید آغلاتدی زیبا گوزلرین
تیر آلامه مبارک قلبینی ایتدی نشان
.
حلق مردمدن بلند اولدی صدای اعتراض
سالدی مامون جفاکاری فشاره شیعیان
.
خلقون احساساتنی فکر ایلیوب ائتسون خفه
حیلیه قیلدی توسل اول بداندیش زمان
.
اوز قزی ملعونه ام الفضلی چوخ تاکیدیله
حجت حقه ویروب قیلسون حصول آرمان
.
قالدی بیر مدت امام مقتدا بغدادیده
سیرت مامون ظالمدن اولوبدور باغریقان
.
موسم حجّیدی یوز قویدی طواف کعبیه
قورتاروب اعمال حجّی مفخر کرّوبیان
.
شهر یثربده اولوب ساکن عراقه گتمدی
جدینون گویا جوارینده قالوبدور میهمان
.
فیض عالمگیرینی خلقه افاضه ایلدی
دانش اخذ ایتدی وجودیندن ثقاة نکته دان
.
پیشبرد مکتب قرآنه قیلدی اهتمام
تار و پود هستی اسلامیانه ویردی جان
.
درک ایدوب مأمون بدکرداری صیّاد اجل
خاک ذلّت ذلّتیله پیکرین ایتدی نهان
.
آلدی آغوشه خلافت نوعروسین معتصم
ضد احکام الهی خلقه اولدی حکمران
.
نامه یازدی ایستدی بغداده عصرون حجتین
یا محمّد قالما یثربده من اولّام ناگران
.
هر نه امر ایتسون عم اوغلون خدمته آماده دور
عزّت و اجلالیله بغدادیده گل ایت مکان
.
زادگاهین ایستدی سبط نبی ترک ایلسون
اوغلونی قائم مقام ایلوبدی اول طیّب روان
.
کشف ایدوبدور رمزیله گتسم دوباره گلمرم
ایلدی چوخ پراسف حالیله ترک خانمان
.
ای طبیعت ای جهان مادی و ادنا نواز
مردم احراریله سن سازگار اولدون هاچان؟
.
دستگیر اولدی همیشه چکمدی راحت نفس
اهل استبداد الیندن زمرۀ آزادگان
.
نوبهار عدله اسدی صرصر جور و ستم
فاطمه اوغلانلارین بیربیر ایدوب گل تک خزان
.
گلدی بغداده یتیشدی موکب ابن الرضا
معتصم پیشوازینه چخدی به حال امتنان
.
فوق العاده حرمت ایتدی حضرته انظاریده
مقدمین دوتدی گرامی شخصاً اولدی میزبان
.
مقتضی موقعده امّ الفضلی ترغیب ایلدی
حجّة الهی یتورسون قتله سمّیله نهان
.
قتل فتواسین ویروبدور معتصم قتّالیه
ایله بیر قتلی که قلب عالمه ویردی تکان
.
مسلک شرم وفادن چخدی امّ الفضل دون
غصّه دن انسیّه حورا قدینی ایتدی کمان
.
دارالایمن دور امامت دودمانی عالمه
حیف امین روزگاره اولمادی دارالامان
.
یاندی قلب فاطمه اجحاف امّ الفضلیدن
جُعده نون ظلمی دوباره دهریده اولدی عیان
.
بی مروّت رازقی انگوری زهر آلود ایدوب
بلمورم بو مطلبین ایلوم نجه شرحین بیان
.
میل ایدوبدور زهردار انگوریدن مظلوم امام
سم مهلک جسم پاکین فوراً ایتدی ناتوان
.
بستر مرگه یخلدی پیچ و تاب ایتدی بدن
برگ تک اعضاسینی تترتدی زهر جان ستان
.
گه انوردی گه یاتوب بسترده چالدی ال ایاق
فرشی غمگین ایلیوبدور طایر عرش آشیان
.
رسمدور آفت یتیشسه هر قوشا صیّادیدن
طاقت و آرامی اولماز جان ویرر شهپر زنان
.
اودلانوبدور قلبی امّ الفضلدن سو ایستدی
ویرمدی سو دولدوروب سو جامینی ویردی نشان
.
گوردی جان اوسته کنیزین قلبی حضرته
اشک چشمین چشمه تک رخسارینه قیلدی روان
.
صاحب احسانه فکر ایتدی سو احسان ایلسون
گوردی ام الفضل آجقلاندی دیدی ساکت دایان
.
ویرمه سو قوی بستر مرگینده جان ویرسون سوسوز
ویرملی اولسیدی سو سیراب ایدردوم من سودان
.
حضرت زهرا چراغی ظلمیله خاموش اولوب
شعشعین کسدی بو عالمدن فروغ جاودان
.
نوبهار عمریده پرپر اولوبدور گل کیمی
یعنی شهزاده علی اکبر کیمی گتدی جوان
.
یومجاق امّا گوزلرین عزّتله قبره قویدولار
گون قباقینده وجوده قالمادی بی سایه بان
.
#گریز #کوچ_کربلا_اکبریه_شهادت
.
ای قلم دوندر سوزی اوضاع مقتلدن دانیش
سولمیوب دور کربلا گلزاری تک هیچ گلستان
.
قتلگهده اکبرین لیلا تاپوبدور بی کفن
دردینی ایستور دیسون قمچی وروردی ساربان
.
دور علی دور قاره گون لیلانی ایله بدرقه
غملی یردن ایستیور گیتسون بو غملو کاروان
.
قویمیور دشمن منی بو قانلو دامندن دوتام
ایله فکر ایتمه آنون لیلا گیدور دامن کشان
.
راضیم باشیم گیده باشون دیز اوستن ویرمیم
چونکه فرق ایتمر مقام عشقیده سود و زیان
.
گزمیشم چوللرده دیلدن دوشموشم دیندیر منی
ای مسیحا دم اگر دیندیرمسون ئولّم اینان
.
باخماسان عمّون آنون عطشان دوداقوندن اوپر
بیرده بو باشی آلام من سینیه یوخدور گمان
.
«انورا» لیلا غمی هاجرلری مجنون ایدر
چوخ چتین اولدی او بانویه مقام امتحان
.

#جوادیه_میلادیه
#جوادیه_شهادت
#سال_یوز_دوخسان_بش_هجرتده_حی_لامکان
#انور_اردبیلی
#مردان_جاوید_انور
#ترکی
.