استمداد حضرت ابوالفضل علیه السلام
.
✍️ زبدة الاشعار ✍️
?: @nohe_torki
مرحوم حاج حیدر خوندل
.
مکن تغافل از این بیشتر که می ترسم
گمان برند که این بنده بی خداوند است
.
حاشا سنه مندن اولا قارداش بو جسارت
یا خواهش اولا سسلماقیم یا اولا دعوت
سن هر نه اگر فرض ایله سن ایله اجابت
گل گلماقیوا جلب ایله بو دشمنی قارداش
بی صاحب اولان بولمه سین اعدا منی قارداش
.
شایسته دی قارداش منی اُلدورسه بو حسرت
ایستردیم آلام عطریوی روحوم اولا راحت
افسوس مشامیمده داخی یوخدی او قدرت
بیر وضع گلوب باشیمه نوفل یاراسیندان
باش یاره سی مشکلدی منه ال یاراسیندان
.
عشق اهلی بولر حقّه چاتان یول ندی قارداش
یا اهل وفا سالک اولان یول ندی قارداش
مین یول دولانوم باشیوه بیر یول ندی قارداش
گلسن گل رخساریوی گورّم گوزوم اولسا
قویّام قدم پاکیوه قارداش یوزوم اولسا
.
سن گلمه میسن فیض حضور اولمیوب اولماز
آلام غمیم وجد و سرور اولمیوب اولماز
عبّاسیده بیر ذرّه قصور اولمیوب اولماز
تاپدیم شرف عزّتی نان و نمکوندن
چخدی قزلیم بوته ده خالص محکوندن
.
بو ننگدی عبّاس اولا عالمده سلامت
گل تک سوسوزوندان سولا گلزار رسالت
بیر مشک سویا واردی بو چولده ایله قیمت
آلّام ایکی ال اولسا اگر بیر یارالی باش
فخریم بودی اوستونده ده بیر گوز اولا قارداش
.
مین جان اولا مین یول سنه قربان اولام ای کاش
بو معرکه ده خاکیله یکسان اولام ای کاش
یا گرد و غبار ره جانان اولام ای کاش
پاینده حیات آلماقا زیر قدموندن
عیسانی سالام حیرته بو گرم دموندن
.
چوخ شایقیدیم جسمیمه یوز مین دگه یاره
اوخ دگمیه سو مشکیمه، مشک اولمیه پاره
تا بلکه سلامت یتورم محضر یاره
ایوای او اوخدان که گلوب مشکیمه دگدی
نه اولدی، اولار عجز، دیسم قدّیمی اگدی
.
بیر جان ندی مین جان سنه قربان اولار اولماز
باشسیز بدنیم زینت میدان اولار اولماز
خاکِ ره اولام عشقیده میزان اولار اولماز
نه ال قالا نه باش قالا نه گوز نه وجودیم
اولماز گینه پابوسیوه شایسته وجودیم
.
اخلاصیله دلدن واریدیم وصلیوه شایق
ایثاریمی گورسن گلوب امکانیمه فایق
عبّاسیوه بو دهریده سنسیز نه علایق
نه عشقیله بو عمره وفادار اولوم ایمدی
هانسی یوزیله طالب دیدار اولوم ایمدی
.
سقّا آدی بو گون منه تا اولدی محوّل
سو ایستماقا امر ایلدون سن منی اوّل
آچدیم یولی آلدیم سویی حلّ اولدی او معضل
چوخ دلخوشیدیم امریوه اولموشدی اطاعت
فریاد او اوخدان که ایدوب مشکه اصابت
.
بیر شمع کیمی مشکیمه باخدوقجا یانوردوم
پروانه صفت باشنه گاهی دولانوردوم
خرگاهه ظرف گاه گیدوب گه دایانوردوم
“بو مشکه دگن اوخ منی مایوس ایلدی چوخ”
“ای کاش دگیدی گوزومه مشکه دگن اوخ”
.
دوتدی منی بیر حادثه طوفانی سو اوسته
یاغدورد عدو بارش پیکانی سو اوسته
اوز سینمه دوزدوم گل جانانی سو اوسته
جسمیم دیدیم اوخدان گل آچا یاره، گوزلدی
یاریم بدنیمده گوره چوخ یاره گوزلدی
.
من جهد ایلدیم فدیه ی جانان اولام اولدوم
عشق اهلینه ایثاریده میزان اولام اولدوم
زیر قدم یاریده قربان اولام اولدوم
بو راه محبّتدی ره همّته یول وار
بو یولدا نه باش فکری نه گوز فکری نه قول وار
.
فکریمده دی هنگام ولادتده کی مطلب
ویردون منه بیر جام می عشق لبالب
شاهددی بو پیمانیمه زهرا قیزی زینب
او عهد الستین هله پابستیم ایمدی
گلسن گوره جاقسان او مِیین مستیم ایمدی
.
بیر جان ندی مین جان سنه قربان اولا قارداش
عشق اوندادی جان فدیه ی جانان اولا قارداش
سندنده بو قربانیوی احسان اولا قارداش
گلسن ایله بیر عالمی مین عالمه ویرمم
بیر گرم دمون مینله مسیحا دمه ویرمم
.
ای کان وفا، بحر کرم، معدن رافت
احسان ایله بو خواهشیمی ایله اجابت
گل باشیمه سال بیرده منیم سایه ی رحمت
اشرار آراسیندا منه اعزاز ایله قارداش
بو عاشقیوی رتبه ده ممتاز ایله قارداش
.
قربان سنه آزرده دل اولما بو سوزومدن
من صرف نظر ایلمیشم دوزدی اوزومدن
گورّم یوزیوی سیلسن اگر قانی گوزومدن
حاشا که دیم منتظرم من سنه قارداش
مشکلدی ئولومدنده بو دعوت منه قارداش
.
بو عرض گلوب گورسن اولار اوندا محقّق
هر ذرّه وجودیم سنه مجذوبدی مطلق
اوز ایستدیقیم تک منی حق ایتدی موفّق
نه باش نه بدن قالدی نه گوز قالدی سلامت
نه ساخلاموشام ال اولا اسباب حمایت
.
من جهد ایلدیم ترک سر و جان ایدم ایتدیم
اوز جانیمی جانانیمه قربان ایدم ایتدیم
بو پیکری خاک ره جانان ایدم ایتدیم
گل معرکه ی عشقیده بیر قانیله یول وار
گر دامنیوه یتسه یول اوسته ایکی قول وار
.
تا سو واریدی شادیدیم ای منبع جودیم
صد شکر که ویرموشدی ثمر فیض سجودیم
پیکانیله عنقا کیمی پر آچدی وجودیم
بیر مشک سو اوستونده هامی زحمته دوزدوم
سو گیتدی، بیر اوخ گلدی حیاتیمدن ال اوزدوم
.
ای عشق سپهرینده کی خورشید موفّق
ذرّات وجودیم سنه مجذوبیدی الحق
بو امر گلوب گورسن اولار اوندا محقّق
دامانیوه اگلشسه یول اوستونده غباریم
ایثاریمی بولّم که قبول ایتدی نگاریم
.
آخِر شب عمرینده آتام شاه ولایت
تا ال اله تاپشوردی بیزی ایتدی وصیّت
سنسن منیم اوغلوم دیدی از راه اصالت
امّا بو حسین زاده ی زهرادی ابوالفضل
هر امری سنه لازم الاجرادی ابوالفضل
.
بیر گون گلر آفاقین اولار تیره فضاسی
بیر قورخولی چولده اوجالار عشق لواسی
یعنی بو حسینین اولار عاشور بلاسی
اخلاصیله سن اوندا فداکار اولاجاقسان
مین شوقیله خاک قدم یار اولاجاقسان
.
من لازمیدی ترک سر و جان ایلییدیم
جان خاک ره مقدم جانان ایلییدیم
ناچیز بو جانی سنه قربان ایلییدیم
ای کاش بو جانیم کیمی مین جان اولا قارداش
هر تک تکی مین یول سنه قربان اولا قارداش
.
هنگام ولادتده منه ایلدون اعزاز
باخدیم یوزیوه تا ایلیم عشقیمی ابراز
بو عشق منی هم آنامی ایتدی سرافراز
گوردون گوزومی اوّل آچاندا سنه باخدیم
آخِر باخیشیم غرقیدی قاندا، سنه باخدیم
.
من مایلدیم خاک ره یار اولام اولدوم
عاشقلره بو عشقیده معیار اولام اولدوم
گل خاطرینه خاره گرفتار اولام اولدوم
بو سهلدی باشدان باشا جسمیم دولی اوخدی
مشکل بودی عطشانلارا مشکیمده سو یوخدی
.
شاهددی اوزی شاهد میدان شهادت
هر قدر الیمدیدی الیم، جسمیده قدرت
اخلاصیله ایتدیم اونا بو عرصه ده خدمت
پروانه کیمی باشینه عشقیله دولاندیم
تا دوشدی الیم گیتدی سو، ناچار دایاندیم
.
#خوندل بو جسارت سنه اولمازدی سزاوار
شایسته دی ارباب قلمدن بیله آثار
#شانی یازا #ذهنی یازا #عابد یازا ناچار
سن ذرّه، اولار مهر درخشاندی مسلّم
هر تک تکی بیر #نیّر تاباندی مسلّم
.
#عباسیه_شهادت
#مکن_تغافل_از_این_بیشتر_که_میترسم
#حاشا_سنه_مندن_اولا_قارداش_بو_جسارت
#خوندل_تبریزی
#ترکی
✍️ #زبدةالاشعار ✍️
?: @nohe_torki
نظر دهید