احوالات حضرت علی اکبر (ع)
..
..
..
..
مرحوم شانی تبریزی
..
..
..
..
از بسکه عرصه نی منه بو چرخ تنگ ایدر
میدان فکره توسن اشعاری لنگ ایدر
..
درّ کلامی بحر عمیق خیال ده
دست جفای چرخ دچار نهنگ ایدر
..
امّا گینه بو حالیله آهنگ فکریمی
هر اهل دل باخوب گوره آهنگ هنگ ایدر
..
دشت بلانی گوزده مجسم ایدنده دل
بو روز روشنی گوزه بیر شام زنگ ایدر
..
بیر اکبر آدلی مظهر پیغمبر آتلانور
مین رفرف براق تماشای خنگ ایدر
..
گون غبطه قیلدی شمسۀ قربوس زینینی
فخر عالمینده قوس قزح رشک تنگ ایدر
..
شهزاده دور ادب یولونی کاملا بولور
شهدن مؤدبانه تمنّای جنگ ایدر
..
امر شهادت اکبره یا هاشمی لره
بیر امردور که آینه دن پاک زنگ ایدر
..
ایلردی جلوه ایله قلنج اوخ که گوئیا
جلوه نگار ماه رخ و شوخ و شنگ ایدر
..
شه یوز دوتوب گویه دیدی سن شاهد اول خدا
بو لشکر عرصه نی منه نه نوعی تنگ ایدر
..
بیر نوجوانکه جدّیمه اَشبهدی خلقیدن
اوز امتی نشانۀ تیر و خدنگ ایدر
..
ظلمی که ایتدی جدیمیزون امّتی بیزه
حاشا کتاب اهلینه روم و فرنگ ایدر
..
چوخ طول چکمدی که ایشیتدی اوغول سسین
دل سهلدور بو محنته گور تاب سنگ ایدر
..
ایستگلی شاهزاده ایله مهربان شهی
میداندا داده سسلیه هاردا درنگ ایدر
..
فوراً اوزون یتوردی گوروب ایتسه گر درنگ
سمّ فراق شربت مرگی شرنگ ایدر
..
آلدی باشین دیز اوسته یوزینه قویوب یوزون
قانیله آغ محاسنینی گور نه رنگ ایدر
..
سویلوب که راحت اولدون قالوبدور آتان وحید
روبه صفت سپاهی بو وحدت پلنگ ایدر
..
باشون سینوب منیمده اوغول سجده گاهیمی
بیر سنگدل نشانۀ سنگ سپنگ ایدر
..
سندن صورا اولا باشینا تپراق عالمون
گور چرخ گردشیندن اوزی عار و ننگ ایدر
..
تا آلدی ناله سین آل آتوب دوتدی دامنین
شه دامنینه گور نجه شهزاده چنگ ایدر
..
دلدن بو ناله گور آپارور صبر عاشقی
یا سلب تاب نالۀ طنبور و چنگ ایدر
..
..
شه گوردی شاهزاده ده یوخ نطق و اختیار
ایتدی خطاب اکبره گویا او شهریار
..
..
گوگلوم فصیح نطقوه مشتاقیدور اوغول
ناز ایتمه طاقتیم بولوسن طاقیدور اوغول
..
بو سهلدور تکلّمه قالموبدی قدرتون
آغزون تمام قانیله توپراقیدور اوغول
..
بو جسم دور مزیّن ایدوب کربلا چولین
یا بیر چمن دولی گل اوراقیدور اوغول
..
گون آرتوروبدی جلوه سینی مه جمالوین
یا خشک اولوبدی قان بیله برّاقیدور اوغول
..
بو ابتدای محنت لیلادی باشلانور
یا انتهای اوّل میثاقیدور اوغول
..
گورمور گوزوم مشامه گلور عطر آشنا
بیگانه بیله فرض ایدر اغراقیدور اوغول
..
نه باغریما باساندا باشون غصه اسکیلور
نه سوز دل سونور بو نه احراقیدور اوغول
..
..
شهزاده سمعنه یتیشن دمده بو خطاب
گویا مناسبیدی وئریدی بیله جواب
..
..
باخما وجودیم اوخلارا آماجیدور بابا
غم چکمه گلشنیم دیمه تاراجدور بابا
..
تشریفون هاردا اولسا اویرده صفا اولور
بو صاف سینه دن کَدَر اخراجیدور بابا
..
قوی تپراقا پیمبره بنزر جمالیمی
چون خاک مقدمون منه معراجیدور بابا
..
واردور باشیمدا احمد مرسل عمامه سی
تاج شرف بودور نه گوزل تاجیدور بابا
..
جدّیم الینده جام دوروب منتظر منه
باخما فرات چوللره موّاجیدور بابا
..
گر ممکن اولسا قویما بو یرده جنازه می
اطراف، خصمیله دولی افواجیدور بابا
..
شوق زیارت الدن آلوب اختیارینی
البته «شانی»، لُطفوه محتاجیدور بابا
..
..
..
پس یوز دوتوب جوانلارینا میرمحتشم
ایتدی بیله خطاب او سلطان غم حشم
..
..
..
بو نوجوان که جان و دل آرادی جان ویرور
حسن رسول اکرمه دارادی جان ویرور
..
یاسین تلاوت ایتماقا آیا دوتار دیلیم
یاسین باتوبدی یاسه بو طاهادی جان ویرور
..
هم خَلق وخُلقی منطقی هم حُسن و صورتی
هم طرز مشیی سیّد بطحادی جان ویرور
..
هم قلبیمون قراریدی بو ال ایاق چالور
هم نور هر دو دیدۀ بینادی جان ویرور
..
بو قوّۀ امامتیله صبریمی آلور
تنده توان اورکده شکیبادی جان ویرور
..
سیزجمع ایدون عبایه داغیلمیش جنازه سین
هر عضو پیکریمده بیر اعضادی جان ویرور
..
زیبادی چون جفا، ره جانانداعاشقه
زیبادی حُسن و صورتی زیبادی جان ویرور
..
..
..
القصّه حمل اولوندی جنازه عبائیله
شه زینبی چاغوردی بو لفظ ادائیله
..
..
..
گتدیم شبیه احمد مختاری گل باجی
آماده ایله دیدۀ خونباری گل باجی
..
یاسین شبیهدور باجیسن ساخلا یاسینی
تا آل یاسین اولسون عزاداری گل باجی
..
قان دولدوروب پیمبره بنزر گوزین اودور
گوزدن اولور سرشگیم اوزه جاری گل باجی
..
سنبل کیمی باتوبدی توزا توپراقا قانا
پامال اولوبدی زلف سمنباری گل باجی
..
گوستردی باشیله منه محراب کوفه نی
سالدیم خیاله حیدر کرّاری گل باجی
..
خط عذارینه سپولوب قطره قطره قان
گُل گُل اولوبدی عارض گلناری گل باجی
..
تالانه گیتسه طاقت لیلا عجب دگل
پوزقوندی تار طرّۀ طرّاری گل باجی
..
خندان اولوبدی گل کیمی سسله سکینه نی
پرشور و ناله ایله بو گلزاری گل باجی
..
گلسون رباب نالیه لیلا ترانیه
شور آرتراندی «شأننون» اشعاری گل باجی
..
..
..
تا قویدیلار عبانی یره خیمه گاهده
محشر اولوندی آل عبایه مشاهده
..
..
..
باش آچدی زلف سالدی خواتین محترم
هر خیمه دن یوگوردی عبایه طرف حرم
..
سنبل کیمی او گل بدن اوسته توکولدی ساچ
اولدی همان او منطقه بیر گلشن ارم
..
نه حاله قالدی اهل حرم بولمورم اونی
بیر بولدى شخص میرحرم بیرده ذوالکرم
..
قارداش جنازه سین گوره صد پاره گل کیمی
نیلر باجی، عیاندی نه لازم بیان ویرم
..
شبه رسول اکرمی هر کیم گوروب دیدی
ویر صبر آناسی لیلیه ای خالق کرم
..
چشم غزالی ایلر اشاره مکرّراً
صیّاد گور اولوبدی بیله بیر غزاله رم
..
دؤزموردی عمّه لر باجیلار بو مصیبته
امّا آناسی دؤزمدی یا دؤزدی بولمورم
..
سسلندی ای گل اوزلی جوانیم بوگون گرگ
آمال گلشنینده آچان گللری درم
..
شهزاده دامنینی دوتوب «شأنی» عرض ایدر
سن شه یانندا واسطه اول من مقصّرم
..
..
..
بیگانه لفظدن سئچیلور آشنا دیلی
خوشدوراوغول جنازه سی اوسته آنا دیلی
..
..
..
ای نونهال گلشنیم ایوای اوغول على
شام اولدی صبح روشنیم ایوای اوغول على
..
گورمور گوزوم بو گوزگوز اولان نعشوی گوروم
بیر شیونیله سسلنیم ایوای اوغول على
..
من سس اوجاتمارام ولی نیلوم که او جایدر
بی اختیار شیونیم ایوای اوغول على
..
مین زحمتیله عمّه لرون گتدیلر منی
گلموردی دیزلریم منیم ایوای اوغول على
..
آتدان سنی یخاندا یخیلدی منیم ایویم
اولدی خرابه مسکنیم ایوای اوغول على
..
طوی دوتمادیم اوغول سنه کامه یتیشمدون
کامه یتیشدی دشمنیم ایوای اوغول على
..
ای تشنه لب گوزوم یاشی قانون کیمی آخوب
ایسلاندی طرف دامنیم ایوای اوغول على
..
سن سیز حیاتی نیلرم ای کاش اجل گله
خوشدور یانوندا مدفنیم ایوای اوغول على
..
«شأنی» یازوبدی دفتره اما بولن بولر
بو سوز اونوندی یا منیم ای وای اوغول على
..
..
..
#اکبریه_شهادت #اکبریه
#از_بسکه_عرصه_نی_منه_بو_چرخ_تنگ_ایدر
#شانی_تبریزی
#ترکی
#زبدةالاشعار
نظر دهید