قتلگاه
زبانحال حضرت زینب (س)
.
✍️ #زبدةالاشعار ✍️
.
🆔: @nohe_torki
.
مرحوم شعاع تبریزی
.
ای زینت میدان اولونان پیکری قارداش
کیم کسدی کسیلسون الى بو اللری قارداش
.
.
نه باش بدنونده قالوب ای وای منه نه ال
ایکاش اولا بو اللریوه ال تاپان ال شل
بس اولمادی بیر اوزگه جفا ایلدى بجدل
یاندیردی غمونده دل پیغمبری قارداش
.
.
بیر ال که مدام اولدی دلیل ابن سبیله
درمان رسیدی دهرده هر زار و علیله
کسدی بو کریم اللری دشمن نه دلیله
بیر تازه غمه سالدی بو غم پروری قارداش
.
.
دنیاده گورونموب بو قدر ظلم و جنایات
احوالیوه آغلار اودی سُکّان سماوات
صد حیف کسیلدی بو ایکی دست کرامات
بی قدر ائلدی درّ و زر و گوهری قارداش
.
.
ایلردی هامی بیوه زنه نصرت او اللر
قویمازدی یاتا آج گئجه ایتام مکدّر
قان آغلاسا ایل لر بوئی بو اللره ائللر
آز آغلیوب ای قان اولان اشگ تری قارداش
.
.
دوشسیدی بیری مشگله بو دهرده هرگاه
اظهار ائله سیدی سنه گر دردینی ای شاه
ایلردی اونون مشگلینی حل یدالله
قویمازدی دوزه آنّینا خجلت ترى قارداش
.
.
ای زخم جبینیله یتن باشه سجودی
ای حاتمی حیرتده قویان بخشش و جودی
کیم قویدی بئله ظلمیله السیز بو وجودی
گلمز دیمه دی دهره داخی مظهری قارداش
.
.
ای جودیوه مینلرجه سلیمان اولا قربان
لایق دگی بیر اهرمنه بیر بئله احسان
هاردا ائلدی بیله کراماتی سلیمان
بذل ایلیه انگشتیله انگشتری قارداش
.
.
هر چند رکوعینده بابام ساقی کوثر
انگشترینی سائله وئرمیشدی او سرور
اما سنون احوالیوه حیراندی ملکلر
حیرتده قویوب دور کرمون حیدری قارداش
.
.
بو اللری ائتمیشدی هاچان سائلی مأیوس
بیچاره لری غمله اولا قویمادی مأنوس
مایوس ائلدی زینبی دشمن اولا افسوس
ظاهر ائلدی زینبیوه محشری قارداش
.
.
گلدیم بو امیدیله حضوره من نالان
تا ایلیه سن بیرده بو خونین دله احسان
بیرده قویاسان قلبیمه ال من سنه قربان
قوّت تاپا قلبیم چکه بو غملری قارداش
.
.
بو اللری که سن آتاسیز باشینه چکدون
گه باشینه گه یوزده کی گوز یاشینه چکدون
زرفام الون آخرده محک داشینه چکدون
چیخدی آنامون یاخشی محکدن زری قارداش
.
.
بو اللرین اوستینده سن ای شاه مدینه
قربان ائلدون بیر سودامر شرع مبینه
قانی بالامون وئردی صفا گلشن دینه
عنوان شفاعت ائلدون اصغری قارداش
.
.
بو جود و کرامت گورونوب کیمده براد
بو جودیوه والهدى خلیل الله و هاجر
اسماعیله لیلائیله سن تا دم محشر
بیر مایۀ فخر ائتدوز علی اکبری قارداش
.
.
باجادی باجون عارضه گوزدن توکه قانیاش
بو درد نهانی وئر اجازه ائلیوم فاش
بس کیم چکر ال قزلاروین باشینه قارداش
ای عترتینون باشدا اولان افسری قارداش
.
.
یخدی یارالی دین ائوینی آل امیّه
قالدی آتاسیز عاتکه صغرا و صفیّه
مشکل دوزه هجرونده سنون نازلی رقیّه
ایلوم نئجه آرام او ملک منظری قارداش
.
.
دوتموشدی شعاع کرمون کون و مکانی
ائتمیشدی خجالت نه که وار اهل سخانی
آزاد ائلدى قید محندن ضعفانی
سوندوردی اورکلرده اولان آذری قارداش
.
.
قربان اولا جانلار سنه ای کان کرامت
مشکلده قالیبدور بو «شعاع» ایله عنایت
قیل دردینه چاره قوی اخا زینبه منّت
شاد ایله بو لطفیله او غم پروری قارداش
.
.
.
#کوچ_کربلا #شعاع_تبریزی
#قتلگاه
#ای_زینت_میدان_اولونان_پیکری_قارداش
#ترکی
.
✍️ #زبدةالاشعار ✍️
.
🆔: @nohe_torki
نظر دهید