ای باتان کرب و بلاده تشنه لب آلقانه قارداش #زینبیه_محمد_هوشمند

زبانحال حضرت زینب سلام الله علیها در حال احتضار
..
..
..
..
محمد هوشمند (مدهوش)
..
..
..
..
ای باتان کرب و بلاده تشنه لب آلقانه قارداش
گل گوروم بیرده جمالین جان وئریم جانانه قارداش
هارداسان ای نورعینیم
باشیم اوسته گل حسینم
..
..
..
..
ای عزیز آل طاها وی امیر تاجداریم
غصه و غمدن یورولدوم قالمیب دیلده قراریم
بو چتین گون ده بیلیرسن واردی سندن انتظاریم
دردیله سینم دولوب دیر گل یئتیر درمانه قارداش
..
..
..
..
اولماسا قارداش یانیندا باجینین اولماز جلالی
گور نئجه سالدی زمانه زینبی ائلدن ارالی
سن کفن سیز من وطن سیز، سن یارالی من یارالی
عشقویله خوشدی وئرسم عمریمی پایانه قارداش
..
..
..
..
دینجلیر درد و بلادن زینبین قارداش بو ساعت
گل ائدیم بو سون نفسده ماه رخسارین زیارت
باشیم اوسته مرحمت قیل گل ائله قران تلاوت
سن بیلرسن که نقدری شایقم قرانه قارداش
..
..
..
..
نیسگلیم چوخدور اورکده موج ائدیر آتشفشان تک
قلبیمین قانی رواندور صورته آب روان تک
آخر عمری ائللریم دن آیریلیب قالدیم امان ، تک
نیلییم قسمت دی هرآن من دوشم بحرانه قارداش
..
..
..
..
هر نفس چکدوقجا دیلدن یاده سالام کربلانی
ایچمیشم عشقونده هرآن شوقیله جام بلانی
دیلده چوخ گیزلین یارام وار خوشلیرام خاک شفانی
گزمیشم راه وفانی عاشق و مردانه قارداش
..
..
..
..
یاده ساللام کربلانی قلبیمی اودلار مصیبت
یاره اوستن یاره ووردی جسمیوه قوم عداوت
سن شهید اولدون ستمله خیمه گاهیم اولدی غارت
آغلادیم یاندیم آلشیدیم اتش هجرانه قارداش
..
..
..
..
هر نقدری عمریم اولسا آغلارام یانام بو درده
اوچ گئجه گوندوز یارالی پیکرین قالمیشدی یئرده
جسمیوه توپراقلار اوسته قان آخیب چکمیشدی پرده
دفنیوه امکان یوخیدی زینب نالانه قارداش
..
..
..
..
دور گردون بو سیاقدا ایسته دی مندن باج آلسین
باعث اولدی قتلگاهین زینبین تا تئز قوجالسین
قلبیده آرزیم بو دور کی نهضتین هر گون اوجالسین
اهل عالم شایق اولسون سن کیمی سلطانی قارداش
..
..
..
..
گلمسنده گلمه قارداش، ائتمرم اصلا گلایه
سن شهید راه حق سن دوشموسن چوخ ابتلایه
چاره سیزلیقدان سنی من سسلیرم الان هرایه
سس وئرن یوخ دور بو یئرده هیچ من نالانه قارداش
..
..
..
..
چوخ چتین دور بو یامان گون بیر نفر یوخ دادخواهیم
هارداسان تئز گل هرایه ای منیم پشت و پناهیم
آدیوی ذکر ائیلدوقجا اوج ائدیر افلاکه آهیم
زینین قربان دی جانی سن کیمی قربانه قارداش
..
..
..
..
بیر آغیر ایلدن آرالی دوشموشم هیچ باوریم یوخ
جان چیخیر حسرتله اما باشیم اوسته ایللریم یوخ
گلمیری عباس داده قاسمیم یوخ اکبریم یوخ
کشتی عمریم دوشوب بیر سهملی طوفانه قارداش
..
..
..
..
#زینبیه #محمد_هوشمند #زینبیه_شهادت #ترکی #زبدةالاشعار