شهادت حضرت علی اکبر(ع)
✍️ زبدة الاشعار ✍️
?: @nohe_torki
مرحوم خادم عطار تبریزی
بلشوب قانیوه جسمین بو نه حالتدور اوغول
گوزون آچ خیمه ده گور بیر نه قیامتدور اوغول
گورجاق اوغلین آتالیق قانی گلوبدور جوشه
قان دولان گوزلرینی ئوپدی آلوب آغوشه
اشک چشمین یوزینه سپدی گتوردی هوشه
دیدی آچ گوزلریوی موسم فرقتدور اوغول
مه یوزینده ای اوغول زلف سیه هاله سالوب
گور او هاله آتاوی ایمدی نه احواله سالوب
هانسی بیرحم سنی سویله بیله حاله سالوب
اشقیاده بو نه انصاف و مروّتدور اوغول
سرو تک قامتیوی کیم بیله میدانه سالوب
ایلیوب لیلینی مجنون بیابانه سالوب
فرقتین عمّه لرین آتش هجرانه سالوب
گیتماقین زینب غمخواریه منتدور اوغول
سنه از بسکه جفا لشکر کفار ایلیوب
ای گون اوزلوم گیجه تک گوندوزیوی تار ایلیوب
سن منیم دسته گلوم سن سنی کیم خوار ایلیوب
کوفیان عادتی هر دمده شقاوتدور اوغول
اولما راضی علی بو حالیده نالانون اولوم
بیله وقتینده سنون دیده سی گریانون اولوم
نطقه گل بیرجه تکلم ایله قربانون اولوم
هرسوزون واردی منه وقت وصیتدور اوغول
چوخلی مشکلدی منه بو غم هجرانون علی
دوزولوب زلفیوه مرجان کیمی آلقانون اوغول
اولا کول باشینه سندنصورا دنیانون اوغول
خیمده لیلی سنون وصلیوه حسرتدور اوغول
نه روادور علی هجرینده او افغانه گله
دمبدم جوش ایلیوب غملری طوفانه گله
قورخورام دلده نوا جانب میدانه گله
که چکن بلبلی گلزاره محبتدوراوغول
الیوی ویر الیمه دور گیداق ای شبه رسول
انتظارین چکر اهل حرمیم زار و ملول
گوز تیکوبدور یولیوا عمه لرین گوزلوری یول
جمله سی پرده نشینان خدارتدور اوغول
سنی ئولدوردوله یالقوزلادی بو قوم منی
سرو تک سالدیلا یر اوستونه بو گل بدنی
پاره پاره ایلیوب قوم جفا پیشه سنی
یوخدی بیر بوسه یری جمله جراحتدور اوغول
ماتمینده هر او کس دیده سی خونبار اولسون
حالی پژمرده و مجنون و دل افکار اولسون
ایسته بو جمعیله تا قبریوه زوار اولسون
#خادم هم قبر طلا کاریوه حسرتدور اوغول
.
#سبک_یارالی_جان_یارالی (بیش از 4 سبک شامل سبکهای کربلا منتظر ماست … شهریاریمسن آقا …. )
.
#اکبریه_شهادت
#بلشوب_قانیوه_جسمین_بو_نه_حالتدور_اوغول
#خادم_عطار
#ترکی
✍️ #زبدةالاشعار ✍️
?: @nohe_torki
نظر دهید