مقبل و محتشم
.
زبدة الاشعار
?: @nohe_torki
.
مرحوم انور اردبیلی
.
حسینه هر او کسون قلبیده محبتی وار
ایکی جهاندا سرافرازدور جلالتی وار
.
خلوصیله اولوب هرکیم اونا پناهنده
نقدری واردی جهان ئولمیوب قالوب زنده
.
سعادته یتیشوب آیری بیر مقام آپاروب
یازوبلار آدینی تاریخلرده نام آپاروب
.
یادیمدادور اوخودی حاجی شیخ حسن مرحوم
همین بو بیر خبری عیناً ایلورم مرقوم
.
نجیکه شرح اولونوب نظملن گلور قلمه
وئرولّه نسبتینی مقبلیله محتشمه
.
خلاصه متن خبر مقبلون روایتیدور
جواهر آدلی کتابون الان عبارتیدور
.
دیور او شاعر عالی مقام خوش فطرت
حسین زیارتین ائتمیشدی حق منه قسمت
.
گجه لرون بیری بیر منزله گئدوب چاتدوم
ز بسکه خسته ایدم گئتمدوم قالوب یاتدوم
.
گجه نون عالمی درک ایلدوم بو رؤیانی
اولوبدی طی قوتارمیش او راه طولانی
.
عزیز فاطمه صحنیندیم قیامت وار
دولوبدی صحن حسین حدّسیز جماعت وار
.
قویوبلا بیر طرفه صحنیده اوجا منبر
واریدی منبرون اون پله سی چوخ عالی تر
.
ندور دلیلی ولی بیلمورم قرا چکیلوب
صاقینا هم صولونا پوشش عزا چکیلوب
.
دئدیم جماعته من بیلمورم بو احوالی
بو بزم غم ندی سیز ایلیون منی حالی
.
دئدیله با خبر اول دهۀ محرّمدور
بو بزم، بزم عزای عزیز خاتمدور
.
قباقدادور یته آز قالدی روز عاشورا
اودور که صحن حسینده بو بزم اولوب برپا
.
گله جک ایندی پیمبر حسینینون یاسینا
سوسوز باشی کسیلن نور عینینون یاسینا
.
بو سؤزی من ائشیدن وقته اشکبار اولدوم
دایاندوم اللری قوینیندا انتظار اولدوم
.
او قدری کچمدی گوردوم جناب پیغمبر
مزیّن ائتدی او بزمی رسول غم پرور
.
احاطه ائتمیشیدی دوره سینی بیر دسته
خمیده قامتیلن چیخدی منبرون اوسته
.
غم حسین اثر ائتدی او منجی نوحه
بویوردی محتشم هاردا گلوب دئسون نوحه
.
گلوبدی پلۀ اوّلده دوتدی استقرار
یوخاری پلّیه حضرت اونی ائدوب احضار
.
خلاصه پلّۀ نهّمده محتشم دوردی
دل پیمبره بو سوزلریله اود ویردی
.
زبانحالیدی ترکی دیلیجه عرض ائدورم
بو شعری محتشمون نوحه سینه فرض ائدورم
.
اشاره ائتدی حسینون مزار انورینه
سؤزون یتوردی رسول گرامی محضرینه
.
بو کشتۀ ره جانان سنون حسینوندور
بو دستمازی اولان قان سنون حسینوندور
.
بو شاه تشنه جگر که ئولن زمانینده
باخوب فراته وئروب جان سنون حسینوندور
.
بو نخل تر که اوگون آتش حرارتدن
اولوبدی دودی نمایان سنون حسینوندور
.
بو سرور شهدا که گوگون ستاره سی تک
کچوبدی یاره سی ساندان سنون حسینوندور
.
یتیشدی سوز بورا غش ائتدی حضرت طاها
بیر آز زمانی کچوب غشّیدن گلوبدور حالا
.
نظاره ایله او صاحب جلالت و حشمه
چیخارتدی خلعت عباسی وئردی محتشمه
.
دیور بو حالتی مقبل گورن زماندا گوزوم
دئدوم قبوله یتیشسیدی گر منیمده سوزوم
.
یازیلمیشیدی آدیم عزّ و جاهیله لوحه
دیوردوم ایندی یقین محتشم کیمین نوحه
.
دایاندوم اللری قوینیندا ایلدوم افسوس
گوزومده گوزیاشی شرمنده حالیلن مأیوس
.
بو فکره دوشدوم اولام خلق ایچینده من پنهان
اقلّی بیلمیه لر خدمتیمده وار نقصان
.
او دم یتوب بو خبر دوتدی قلبیم استقرار
دئدیلر حضرت زهرا سنی ائدوب احضار
.
خانم دیور بالامی اوخشاسون ائدوم افغان
طرف منبره اوز قویدوم اوندا ناله کنان
.
شروع قیلدوم حسینون همین زمانیندن
حضوره وئردوم عریضه چتین زمانیندن
.
چتین زمانی او ساعتدی سیدالشهدا
جهاد ائدردی سوسوز یاره لی ئوزی تنها
.
نه ذوالجناحیده طاقت واریدی یول گئتسون
خانم نه اوغلون حسینونده تا جهاد ائتسون
.
جمالی قان سینه سی اوخلارا مکانیدی
ئوزیده هم آتیدا لخته لخته قانیدی
.
قوشون تموّج ائدردی او چولده هر یاندا
بالوی یخدیلار آتدان او تند طوفاندا
.
رکابیدن ائله که شاه کربلا دوشدی
اگر غلط دئمسم عرش کبریا دوشدی
.
یتیشدی سؤز بورا زهرا آناسی غش ائلدی
اوجالدی عرشه حسین وای صداسی غش ائلدی
.
داخی بو بندیله ختم اولدی مجلس ماتم
دئدیم گورک منه نه جایزه ائدولله کرم
.
باخوردی هر طرفه فکر خلعتیله گوزوم
دئدیم منیمده گوروم لایق کرمدی سوزوم
.
نقدری صبر ائلدوم اولمادی خبر اما
نه وئردی جایزه زهرا نه حضرت طاها
.
دولاندی خاطریم اولدوم گینه دچار ملال
ئوز حالیمه ائلیوردوم او حالدا فکر و خیال
.
نه گوردون اوندا که صندوق سیدالشهدا
گلوب تلاطمه بیر لرزه ائتدی برق آسا
.
بو منظره دل حضّاری قورخودوب سیخدی
عزیز فاطمه باشسیز ضریحیدن چیخدی
.
اوتانورام دئمگه بو سؤزی آناسیندان
نه حالدا اللری یوخ قان آخور یاراسیندان
.
اورک داش اولسا یانار حال جانگدازیندن
منی مخاطب ائدوب سس گلور بوغازیندن
.
خیال خلعتیله ائتمه فکروی برهم
سنونده خلعتوی حشریده ئوزوم وئرّم
.
منیم قاپومدا مگر کیم اواوب سرافکنده
گلن قوناقین حسین ائتمیوبدی شرمنده
.
عنان شعری بو یرده دولاندیرور قلمیم
بیر آیری نکته دوشوب یادیمه ائدور ترقیم
.
همین او نکته دی صبریم قواسینی یخدی
حسین نه نوعی ائشیتدون ضریحیدن چیخدی
.
بونون نظیرینه مقتلده سیدالشهدا
عمل ائدوبدی گئدن وقته کوفیه اسرا
.
محبّتینی بالالارینا نشان وئردی
دایانوب اوخلارا نیم خیز اولوب اذان وئردی
.
نهاد پاکیله «انور» ائله رقم سؤزوی
حسینه خدمت ائله مقبله یتور ئوزوی
.
#ورود_محرم #کربلا
#حسینیه_شهادت
#کوچ_کربلا
#حسینه_هر_او_کسون_قلبیده_محبتی_وار
#مقبل #محتشم #انور_اردبیلی
#جلوه_عاشورا2
#ترکی
.
#زبدةالاشعار
?: @nohe_torki
: @nohe_torki . مرحوم شانی تبریزی . گل عشقی الفت ایدر عندلیب زاریله اودور فراقه دوزر فکر نو بهاریله . هزار محنت ایّامه بیر دل اولماسا توش نه نوعی همدل و همدرد اولوربیشتر
نظر دهید