دستور وئر سالسون باشا لیلا قرا معجر باجی #اکبریه_انور_اردبیلی

زبانحال امام (ع) به حضرت زینب (س)
در شهادت حضرت علی اکبر (ع)
.
.
✍️ #زبدةالاشعار ✍️
.
🆔: @nohe_torki
.
#سبک_ای_شاه_مظلومان_حسین … 5 سبک
مشابه
.
مرحوم انور اردبیلی
.
دستور وئر سالسون باشا لیلا قرا معجر باجی
تاج شهادت باشینه قویدی علی اکبر باجی
.
.
جان آفرین قارداشوه ائتمیشدی ارزان نعمتین
وئرمیشدی خوش سیرت اوغول یاخشی بیلوردوم قیمتین
من تربیت ویردوم اونا چکدی آناسی زحمتین
آلدوق نتیجه حمد اولا گیدی شهادت خلعتین
اولدی ذبیح اللهدن ایثاری بالاتر باجی
.
.
اون سگیز ایل زحمت چکوب گل بسلیه بیر باغبان
ناگه همان زیبا گلی اوراق ایده دست خزان
یاپراقلارین یردن یغوب گل صاحبى ایلر فغان
من باغبان خسته دل گیتدی خزانه گلستان
دوشدی صفادن گلشنیم اولدی گلوم پرپر باجی
.
.
اولسون مؤثر عالمه بو آتشین گفتارلر
دشت بلاده متّحد اولدی جنایتکارلر
یخدی حسینون یوسفین گرگان بدکردارلر
نازک وجودین دوغرادی شمشیریلن خونخوارلر
حالین سوروشسا قزلاریم پیراهنین گوستر باجی
.
.
صالح اوغولدان هر آتا مشکلدی چوخ الفت کسه
میدانیده دوتدوم عزا شخصاً ئوزوم بو نورسه
اوپدوم یوزون سیلدوم گوزون غم یتدی چرخ اطلسه
سنده یوباندون گلمدون ویردوم آناملا سس سسه
من آغلادیم گوز یاشیمی سیلدی او غم پرور باجی
.
.
آلدوم دیزاوسته باشینی بو خوش مقالیم دینمدی
چوخ مایلیدی صحبته صاحب کمالیم دینمدی
تیکدی گوزون رخساریمه آرتدی ملالیم دینمدی
صیادیلر یورموشدی چوخ زیبا غزالیم دینمدی
ناگه یومولدى قان دولان آهو باخش گوزلر باجی
.
.
حاشا جهاندا حشره تک دوشسون بیله بیر اتفاق
قیلسون نظاره بیر آتا چالسون جوانی ال ایاق
اهل کسا یاس دوتماقا گلمیشدیلر مندن قاباق
روحین اولار پیشواز ایدوب جسمین سیزه گتدوم قوناق
مهمانی پیشواز ایلسون اولاد پیغمبر باجی
.
.
پوزدی سپهرون گردشی اجلالیمی اجلاسمی
سالدی نفسدن کوفیان بو طیّب الانفاسمی
اکبر ئولوب عمامه سیز قویما دایانسون قاسمی
کلثومی سن آرام ائله من رام ایدوم عبّاسمی
شدّتله آغلور اکبره چون خاطرین ایستر باجی
.
.
سن بیر وفالی عمه سن چوخ مهربان چوخ باحیا
من داغدیده بیر آتا اشکیم روان قلبیم یارا
قارداشون أوغلی جان وئروب سن اوخشا من ایلوم نوا
سن اوخشاسون سر مشق اولار الهام آلار اهل عزا
یاددان چخاتماز دردیمی دنیا بوئى ایللر باجی
.
.
نخجیر گهده رسمدور ائتسه تبانی اوؤچولار
زیبا غزاله تنگ اولار اطرافیدن راه فرار
هر اوچی فرصت ایلسه فوراً اونا بیر اوخ ورار
معلومدور دیلدن دوشر بو نحویله اولسا شکار
بیلمز ئوزون آچماز گوزون آهوی خوش منظر باجی
.
.
#اکبریه_شهادت
#دستور_وئر_سالسون_باشا_لیلا_قرا_معجر_باجی
#یادگار_انور
#ترکی
.
✍️ #زبدةالاشعار ✍️
.
🆔: @nohe_torki