صلح نامۀ حضرت امام حسن مجتبی علیه السلام
.
✍️ زبدة الاشعار ✍️
.
🆔: @nohe_torki
.
حاج علیرضا امانی اردبیلی
.
وُردی چون ملجم اوغلی خفتدن
حیدری، شدّتِ عداوتدن
.
مجتبی امّته اولوب رهبر
تازه بیر بیعت آلدی امتدن
.
شامیده منتهی معاویه
نگران اولدی بو اطاعتدن
.
بصره و کوفیه ایکی جاسوس
یولّادی بازیِ سیاستدن
.
اولمیا بی خبر قضایادن
دوشمیه کُرسی خلافتدن
.
فاطمه اوغلی بیلدی جریانی
اوخودی خصم الین درایتدن
.
دستگیراولدی هرایکی جاسوس
چاتدیلار کِیفره، خیانتدن
.
یازدی بیر نامه ابنِ سفیانه
چکه تا بلکه ال خباثتدن
.
نامه نین پاسخین، معاویه
قیتروب، کینه و عداوتدن
.
چکمیوب یعنی ال حکومتدن
اُول شقی شدّتِ شقاوتدن
.
نچه یول نامه لرگلوب گئتدی
اوجالوب شعله لر شرارتدن
.
عاقبت هندین اوغلی لشگرلَن
نیّت جنگ ائدوب لجاجتدن
.
زر خرید ائتدی اهل دنیانی
اوزدولر امّت اَل سعادتدن
.
سیم و زر برقینه اویان ملت
دئدیلر بهره یوخ عبادتدن
.
درک ائدوب مجتبی بو ملتده
اقتدا عاریدور، اصالتدن
.
بیلدیکی دوره سی دگول یکرنگ
سوز گلور ظاهراً ارادتدن
.
باطناً گورمه دی ئورکلرده
ذرّه جک بیر اثر اطاعتدن
.
اوقَدَر مردم ائِتدی نامردی
حسنی سالدیلار، حمایتدن
.
مجتبی سجده ده زِرِه گیدی
درک ائله دردی بو عبارتدن
.
نچه یول سوء قصد ائدوب امت
حضرته شدّتِ جهالتدن
.
حقینه چاتمیوردی صاحب حق
کئچدیلر قاضیلر قضاوتدن
.
حجّتین ایسته دی اِئده کامل
عظم ائدوب جنگ ائده شهامتدن
.
«گوره لر کیملر اهل دنیادی»
«کیم گزور خنجر آلتدا آزادی»
.
ائله دی امر جنگ انصاره
بیر سپه حاضر ائتدی پیکاره
.
حَکَمی دورد مین اتفاقیله
ائِله دی راهی دارِ انباره
.
تا کسه راهِ لشگرِ شامی
دوشمیه شهرون اهلی آزاره
.
یوللادی پیک، زاده ی سفیان
حَکَمِ سست عهد بی عاره
.
نچه دیناره یعنی راضی سن؟
ائده سن پشت، میر احراره
.
شرفین نرخی اولدی بش یوزمین
قوشولوب لشگر جفاکاره
.
حسنین هنگی قالدی بی سرهنگ
مرتضا اوغلی قالدی آواره
.
لاجرم، بیر بنی مرادینی
جانشین ائتدی اول تبه کاره
.
اودا امّا آپاردی وجدانین
یولداشی مثلی آتدی بازاره
.
تا حسن، ئوز ستادینه گلدی
گوردی یوخ اعتماد، افکاره
.
هرگجه دوتدی لشگرآمارین
گلدی سِیرِ نزولی آماره
.
مجتبی سینه سین سئخوب غملر
ئورگی سئندی گلدی گفتاره
.
دئدی ای ظاهراً مسلمانلار
چکوسوز دینی هانسی معیاره
.
ثَقَلین ارث دور محمّدن
کشتیِ رستگاری احراره
.
لبلروز ذکری وِردِ قرآندی
ئورگوز دشمن آل اطهاره
.
آنلادوز دینیدن وَلَاالضّالّین
واقفم پشت پرده اسراره
.
مُتّقی اولماز هر ائدن سجده
اجری یوخ آلنوز اولسا گر یاره
.
گجه لر صبحه جک نماز ائتسوز
گئتمز ارزشده نیم دیناره
.
بیر باخون مسندِ خلافتده
حاکم غاصب ستمکاره
.
ایها النّاس صلب قدرتچون
وار منیم حاجتیم هواداره
.
«دشمن ظالمه قیام ائتدیم
ظلمه باش اَگمَگی حرام ائتدیم»
.
یا اگر جنگه اولموسوزمایل
صلحیدن سونرا یوخدی بیرچاره
.
ئوزوزی صاحب اختیار ائتدیم
آخرِ حجّتیمدی انصاره
.
ائشیدون ئوزامامیزون حکمون
ایلیون منله بیعت همواره
.
مجتبا سوزلره وئروب پایان
همهمه گلدی ناگه حضاره
.
دئدیلر مجتبی ائدور سازش
حمله ور اولدولار او ناچاره
.
خیمه سین یخدلار مسلمانلار
اولانی غارت اولدی یکباره
.
زِرِهی چاتدی بیر قوجا شیخه
سپری عابدِ شبّ تاره
.
قالمادی جانمازیده حتّی
جامه سی اولدی جسمیده پاره
.
عبدِ رحمان آدیندا بیر مؤمن
یتیشوب گئج بیرآز بو بازاره
.
یاپشوب حضرتین عباسینّن
حسنی سالدی بسکی اجباره
.
چخادوب اول عبانی اگنینّن
لعنت اولسون بئله مددکاره
.
آیری بیر متّقی آدی جرّاح
ابله و کج مرام و بیچاره
.
بیرعصا اَلده گلدی، خنجر دار
تیغی گورسنمیوردی انظاره
.
حسنی گوردی مرکب اوستونده
فاطمه قلبین ایله دی یاره
.
مرکبین اوسته وُردی بیرضربه
امتین ایچره شاه بی یاره
.
مجتبا اولدی سرنگون آتدان
اُول دلیم لال، گلمه گفتاره
.
گور حساب آچدی کیملرین اوسته
مرتضا اوغلی جنگ و پیکاره
.
نه یامان قومیدور عرب قومی
هم ستم پیشه، هم ستم کاره
.
لعنت اولسون او ملّته اولماز
معتقد،ننگه ، ذلّته ، عاره
.
لعنت اولسون گرک او مظلومه
تابع ظلم اولوبدی همواره
.
.
«اصله باخ فرعه باخ شریعته باخ»
«شاهه باخ ملکه باخ رعیته باخ»
.
قویدی تک امّتی او مولانی
یارانوب جَوِّ نابسامانی
.
حسنه یولّادی معاویه
بیر نچه نامه تلخ و طوفانی
.
مجتبی هانسین ایلدی رؤیت
یوزونه آخدی اشکِ چشمانی
.
درک اِئدوب افسران اردوسی
نامه لر یولّیوبلا پنهانی
.
اولالار دشمنه پناهنده
بیلدیکی یوخ جهادون امکانی
.
بویوروب ابن حارثه فرمان
تا یازا صلح نامه پیمانی
.
گرچه صلحه امام اولوب مجبور
جنگیدن کم دگولدی میزانی
.
اوّل عهده یازدی : بسم الله
ایندیکی بوشدی جنگ میدانی
.
من حَسن چاره سیز قبول ائِتدیم
دولتِ آلِ ابنِ سفیانی
.
وار ولی اونلا بیر نچه شرطیم
اِئتمیه نقض، عهد و پیمانی
.
اوّلاً بین امّت اسلام
اِیلیه جاری حکم قرآنی
.
ثانیاً عمداً ائتمیه ضایع
سنّت خاتم رسولانی
.
سالمیا زاده یِ ابو سفیان
امّت ایچره گرک پریشانی
.
دئمیه سجده و قنوتینده
حضرتِ مرتضایه هذیانی
.
ائتمیه جانشین، هئچ شخصی
ئوزونه واردی هر قَدَر جانی
.
بو سایاق باغلانوبدی بیر پیمان
صلح اولوب گیرو دار پایانی
.
ظاهراً قورتاروبدی مشگللر
دایانوب بغض وکینه طغیانی
.
باطناً پشت پرده هند اوغلی
طی اِئدوردی رهِ کماکانی
.
هدفی اولدی مجتبی قتلی
نقشه لرطرح اِئدوردی پنهانی
.
عاقبت نقشه لر ثمر وِئردی
جُعدیه آتدی جاه پیکانی
.
«بیلمه سه جهلینی اگر جاهل
همسره ، همسری اولار قاتل»
.
نجه غم یخمادی بو دنیانی
اوندا کی جعده ائتدی عصیانی
.
ائله دی زهری شیره آغشته
باشنا وُردی فکر شیطانی
.
الینه آلدی مجتبی جامی
ائلیوب بیر نگاه طولانی
.
آخ چکوب کاسه نین صودون ایچدی
نظره گَتدی اوغلونی آنی
.
دِئدی گل قاسمیم یتیم اولدون
گل بالا اِئت وداع، بابانی
.
اود دوتوب سینه سی دِئدی یاندوم
چاک ائدوب دردیدن گریبانی
.
گه گئدوب حالدان اِئتمه دی ناله
گه گلوب هوشه اِئتدی افغانی
.
یاندروب غصه فاطمه قلبین
نالیه گَتدی فخر نسوانی
.
ننه سی باخدی اوغلی چرپندی
او قَدَر اولدی وضع بحرانی
.
سیلیِ ثانی یاندران گوزلر
یوزونه توکدی اشکِ چشمانی
.
قوزانوب دردیلن، سنان بازو
چاغروب داده حَیِّ منّانی
.
قاتله وِئر دِئدی جزا، یارب
حشریده اِئت قصاص عدوانی
.
بئله کی چرپنور حسن هیهات
بالاما یوخدی چاره امکانی
.
گور نئجه قوش کیمین چالور شهپر؟
گور نئجه قان اولوبدی دامانی
.
گور نئجه غمله جان وئرور اوغلوم
گور نئجه دردیلن چخور جانی؟
.
حسنیم، قان آخور دوداقوندن
توکولور سینووَه ئورک قانی
.
ئوره گی دوغرانان بالام لایلای
بورئییب منزلون پریشانی
.
نه گناه اوسته اولموسان مسموم؟
نیه یاددان چئخوب مسلمانی؟
.
سالمیور دشمنون نیه یاده؟
حشریده دادگاه زهرانی؟
.
.
«دئدیلر اهل بیته قاره گئیون»
«تَلَسون مطلبی حسینه دئیون»
.
وِئردیلر تِئز حسینه اخباری
دئدیلر چوخ یوباتما دیداری
.
قارداشون زهریلن اولوب مسموم
سالدیلار درده آلِ کراری
.
اوحسین کی هامی اونی سسلر
فکر اِئدورسن اِئدوب نه رفتاری
.
دیزلری اسدی مطلبی بیلجک
غصه دن دوندی رنگ رخساری
.
گوزلرین یومدی اوجِ محنتدن
بیر آدی هی دیوردی تکراری
.
بویوروب سسلیون ابالفضلی
یتیرون تئِز منه علمداری
.
گوردولر غیضیلن گلور سقّا
تیتره دور غیرتی او سرداری
.
نه صاقا نه صولا باخور، یولدا
نه گورور ئوزگه نی ، نه انصاری
.
ایاقین تا آتور ایاق اوستن
چوخالور التهاب سرشاری
.
گوز یاشی چشمه تک آخور گوزدن
سوزولوب ایسلادوردی رخساری
.
سئخیلور سینه ، دینمیور امّا
قوریوب دیل دوداقدا گفتاری
.
بیلینور وار ئورکده بیر دردی
غملرین گورسَدوردی رفتاری
.
مجتبی قتلگاهینه ، گلدی
حسنه باخدی چشم خونباری
.
نه دینوب نه دانیشدی پرچمدار
مجلس غمده ، گزدی غمخواری
.
او قدر گزدی تاپی هم دردین
یاردیدن ، گئتدی ایسته سین ، یارین
.
دایانوب روبرو حسینیلن
آچدی اوّل کشیده قوللاری
.
قارداشین قارداش آلدی آغوشه
اوجادان آغلادی ، ائدوب زاری
.
اُول قَدَر کی اؤرکدن آغلاردی
تیتره دی پیکرینده هر تاری
.
هم او دلخسته هم بو دلخسته
قوردولار مجلس عزاداری
.
گوز یاشین بیر بیرین قوجاقینده
اودا جاری ائدور ، بودا جاری
.
بئله بیر صحنه روز عاشورا
گوزلیوردی سوسوز سپه داری
.
عشق ائدوب کربلاده هم آغوش
او گرفتاره ، بو گرفتاری
.
اوردا امّا قولون حسین آچدی
قولسوزیدی وزیرِ درباری
.
نظم عشقه «امانی» ناظِمدی
اللی ایلدی حسینه خادمدی
.
#حسنیه_شهادت
#وردی_چون_ملجم_اوغلی_خفتدن
#امانی_اردبیلی
#ترکی
.
✍️ #زبدةالاشعار ✍️
.
🆔: @nohe_torki
نظر دهید