گیت معینون حضرت پروردگار اولسون حسین #وداع_تائب_تبریزی

وداع حضرت سیّدالشهدا
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
گیت معینون حضرت پروردگار اولسون حسین (1)
وئر باشون دین اوسته قرآن پایدار اولسون حسین
.
.
ای وجود نازنینی شرح معنای شرف
وی شرافت اوسته باش فکرین آتان بیر جان بکف
سرفراز سرفرازان ، ای حقیقی با هدف
گیت مرامون زنده ، تا وار روزگار اولسون حسین
.
.
باجی قارداشوخ ، هامی عنوانیمیز بیردور بیزیم
عشقیمیز بیر ، جانیمیز بیر ، قانیمیز بیردور بیزیم
سیریمیز بیر ، عهدیمیز پیمانیمیز بیردور بیزیم
حاش لله ، عهدیمیزده انکسار اولسون حسین
.
.
سن نجه پابند سن ، عهد ازلده پایدار
هاکذا منده وارام ، ئوز عهدیم اوسته استوار
سن قزل قانیله قیل میدان عشقی لاله زار
منده ده ، سیر صفای لاله زار اولسون حسین
.
.
سن حسین شمع محبت ، من سنه پروانه ام
دختر فرزانۀ زهرا ، ئوزوم فرزانه ام
زینبم زین ابم ، مرد آفرین مردانه ام
دخت شیر حق ، گرکدور مرد کار اولسون حسین
.
.
سن بولورسن ، من نجه مهر و وفا داراسیم
ئوز آنام صدّیقه تک ، صدق و صفا دریاسیم
سن حسینِ کربلا ، من کربلا زهراسیم
منده لازمدور که زهرا تک وقار اولسون حسین
.
.
نه اولار عالمده بیر قارداش بلالی سن کیمی
نه گلر دنیایه بیر باجی وفالی ، من کیمی
هر اوخا سن ، سینه ن اوسته ، وئر مکان مخزن کیمی
تیر طعنیله باجوندا زخمدار اولسون حسین
.
.
شوق یاریله گیدورسن ، من دیمم ایله درنگ
دلده یا هو ، گیت اوتورسون سینه وه سانسیز خدنگ
پیکرونده یاره اگلشسین گل آچسون رنگ رنگ
سرخ جامه قسمتین دیدار یار اولسون حسین
.
.
گلشن اسلامده یورقون یارالی باغبان
دؤزموسن ، گلزار دینه یتسون آفات خزان
گیت قزلقانیله وئر بو گلشنه آب روان
سولمین گوللر وئروب دائم بهار اولسون حسین
.
.
قانه غلطان لیق سنون ، اشگه بویانماق زینبین
حسرت آیریلماق سنون ، هجرونده یانماق زینبین
بو یول اوسته باشیوه ، گریان دولانماق زینبین
گل بلاگردان سنه بو دلفگار اولسون حسین
.
.
باش وئروب معشوقدن عشق، اولموش اوّل آشکار
ایلیوب بیله سنی ، بیر عاشق کامل عیار
گیت او عشق اوسته ایله جانانوه جانون نثار
عشق اولا عشقی کی سندن آشکار اولسون حسین
.
.
سن مُرادیم سن ، مریدم سن گیدن یولدور یولوم
داشمارام سیل بلائیله دولا صاق و صولوم
لیک ایاق ساخلا گیدن یوللاریوا قربان اولوم
بیر دولانیم باشیوه ، دل کامکار اولسون حسین
.
.
قلبیمه قویدون الین ای شهریار ماسوا
زینبه صبر ایسته دون الله دن ائتدون دعا
مستجاب اولدی دعا تاپدی عجب قلبیم قوا
ایله قیلّام صبر ، حیران اصطبار اولسون حسین
.
.
هر حوادثده منم قارداش شریک اعظمون
پرچمین یاتسا داغیلسا احتشام مُعظمون
قؤزارام دیلده گوزل آدون یخیلمیش پرچمون
باشلارام نهضت، نهان حق، آشکار اولسون حسین
.
.
دین یولوندا سن فدا ایله یارالی جانوی
منده تعقیب ایلرم عیناً همین عنوانوی
قویمارام پامال اولا هرگز مقدّس قانوی
زنده بو قان واردی تا دور مدار اولسون حسین
.
.
ایمدی کی قرآن بو گونده سندن استمداد ایدر
ساکت اگلشسن اولار جدّون آتان سعیی هدر
وئرمه سن قرآنه سس قرآن و دین الدن گیدر
سن گیت امّا حکم قرآن برقرار اولسون حسین
.
.
جان بکف دور پیکر دین ، تازه بیر جان ایستوری
ضعفی وار مجروحدور تزریق ایچون قان ایستوری
خون سرخ اهدا ایدن بیر تشنه قربان ایستوری
خوشدی ثاراللّهدن ایثار ثار اولسون حسین
.
.
ظاهراً اولموش سنه گر باب حسرت افتتاح
یوخ رکابوندان دوتان ای خسرو فوز و فلاح
پوزما حالون ، من ئوزوم ایمدی گتورّم ذوالجناح
سن کیمی سلطان عالی فر، سوار اولسون حسین
.
.
نامۀ عهدینده ، بیر قان دستمازون وار سنون
صون نفس تک سجدہ ئیله بیر نمازون وار سنون
بو نمازیله بیوک بیر امتیازون وار سنون
گیت نمازون قیل نمازه اعتبار اولسون حسین
.
.
سن حسین مهر و محبت شمعی سن ، پروانه من
مقتله گلسم جنازه ن اوسته یانه یانه من
ئوز رکابیمده گتورّم قیزلارون میدانه من
منله هم ناله هامی خرد و کبار اولسون حسین
.
.
قتلگاهون ایلرم قارداش عزاخانه سنه
باشلارام روضه حسین وای دیلده گلّم شیونه
نوحه باشلار سس وئرر نازلی رقیّه مده منه
بو عزا مرسوم تا وار روزگار اولسون حسین
.
.
گاه ساکت اگلشوب گیزلینجه سینه داغلارام
شوره گلّم من هدف اوستونده گاهی آغلارام
آغلارام بو آغلاماقلا دین یاراسین باغلارام
پیکر اسلام قویمام تار مار اولسون حسین
.
.
باش وئررسن سن که دین احکامی کتمان اولماسین
من اسیر اولّام که دین جمعی پریشان اولماسین
ایله تبلیغ ایلرم اسلامی نقصان اولماسین
تحت تأثیریمده هر شهر دیار اولسون حسین
.
.
کوفه ده قرآن او خورسان منده تفسیر ایلرم
ئوز آتام تک حق سوزون محملده تقریر ایلرم
دلنشین نُطقیله من افکاری تسخیر ایلرم
تا جهان واردور او خطبه م یادگار اولسون حسین
.
.
شامیده گورسم که هند اوغلی اولوب مست و خراب
گر عتاب ائتسه بیزه منده اونا قیلّام عتاب
حدّدن چخسا سوزونده ، سنمارام وئرّم جواب
قویمارام اول بی حیا بی بند و بار اولسون حسین
.
.
نقص اولار عهدیمده مردانه قباقه چخماسام
قدرتیمله هندین اوغلون ، ئوز ائوینده سخماسام
ئوز جنایت خانه سین ئوز باشینه گر یخماسام
زادۀ سفیان گرکدور تار مار اولسون حسین
.
.
اولمادی امکان آتام شیر خدای داوره
شامده گیتسون یتورسون حق سوزون ناحق لره
ئوز بالام سجّادی مسجدده آپارّام منبره
شیر تک مدّاح شیر کردگار اولسون حسین
.
.
همّتیله ایلرم تسخیر شام مظلمی
قیلّام آگه من سنون حقّینده آگه عالمی
شامده ویرانیه وورّام حسینی پرچمی
تا حسین آدیله روشن ، شام تار اولسون حسین
.
.
گلشنون باندی سوسوزدان، گوللرون سولدی بو گون
ابر غم یاغدیردی قان ، چول قانیله دولدی بو گون
سرولر سیندی، دوشوب قان سئلده غرق اولدی بو گون
گلشن آیندۀ دین ، بو دیار اولسون حسین
.
.
اقتضا واردی مشیّتده که قارداشسیز قالوم
یوخ سوزوم ، اما دایان دور بوینوا بیر قول سالوم
آیریلیق هنگامی دور ، جانبخش اولان عطرون آلوم
جان مشامیمده ئولونجه عطر یار اولسون حسین
.
.
روزه سن ، بیر نچّه گوندور ای روان حوصله
دعوتون افطاره واردی روزه حالیله بله
گیت آتام جدّیم آنامیله اؤتور افطار ایله
هم ، پذیرا مجتبای گلعذار اولسون حسین
.
.
واقفم ، گلمیش آتام جدّیم آنام ، مظلوم حسن
پنج تندن دؤردی باهم ایلیوبلر انجمن
سنده گیت تشکیل تاپسون اجتماع پنج تن
محفل اهل کسا تا برقرار اولسون حسین
.
.
من ئوزومدن نوز آنامی خوش دگول مأیوس ائدوم
تاپشوروب بیر سوز اؤرکده ساخلیوب محبوس ائدوم
گل آنام زهرایه خاطر ، بیر بوغازون بوس ائدوم
تا آنام منظوری عیناً برگزار اولسون حسین
.
.
بی وفالیق رنگی سن رخساره آلمازدون اخی
مهر و رأفت یوللارین گتماقدا قالمازدون اخی
ئوز گوزوندن بو گوزل اطفالی سالمازدون اخی
راضی اولمازدون اولار سندن کنار اولسون حسین
.
.
شوق وصل یار بوللم صبریوى الدن آلوب
محو عشق یار اولوبسان قیزلارین گوزدن سالوب
بولموسن بو ناز پرور قیزلارین هاردا قالوب
باشدا شورین گیت ، سن اول بزم نگار اولسون حسین
.
.
لیک قیزلارین گوزی یاشلی دوزولموش صاق صولا
اولما راضی بو یول اوسته بیر بله گوزلر دولا
نازنین اطفالوی بیر بیر دانشدیر دوش یولا
همرهون گیت ، لطف ذات کردگار اولسون حسین
.
.
قیزلارین دیندیرمه سن گیتسن اورکلر قان اولار
قان اولان دل لر یانار گوزلر دولار گریان اولار
لطف ایدوب دیندیرماقین قارداش بیوک احسان اولار
ایله احسان شاد کام اطفال زار اولسون حسین
.
.
خوشنوا بُلبُل تلاش ایلر نجه چاتسون گُله
بو رقیّنده إئله آغوشیوه ایستور گَله
سویگلوندور ، آغلاماقدان آز قالور قارداش ئوله
آل یوزون أؤپ قویما بیله اشگبار اولسون حسین
.
.
من اؤرکده مینلریله سوز اورکده ساخلارام
ناگران گیتمه رقیّه ن بو گوز اوسته ساخلارام
یوخلینده نازیله باشین دیز اوسته ساخلارام
گویلون آلّام قویمارام چوخ دلفگار اولسون حسین
.
.
«تائب» درمانده دور آللّهه بیر عبد ذلیل
فاطمه اوغلی ، سنون درگاهیوه دوشموش دخیل
ایسته احسان ایله سین محشرده خلّاق جلیل
بو سیه رو ، خادموز محروم نار اولسون حسین
.
(1) متن مشابه برای وداع حضرت علی اکبر (ع) از مرحوم تائب تبریزی
#گیت_معینون_حضرت_جان_آفرین_اولسون_على
.
.
#وداع_تائب_تبریزی
#حسینیه_وداع
#گیت_معینون_حضرت_پروردگار_اولسون_حسین
#ترکی
.
✍️ #زبدةالاشعار ✍️
.
🆔: @nohe_torki