زبدةالاشعار

آتدی دنیانی گوزوندن تاجدار هل اتی #حیدریه_تائب_تبریزی

#حیدریه_شام_غریبان
شام غریبان حضرت امیرالمومنین علیه السلام
#گریز به #دفن_شهدا
.
.
مرحوم تائب تبریزی
.
.
آتدی دنیانی گوزوندن تاجدار هل اتی
ایلدی آل عبایه عالمی ماتمسرا
.
زینب کبری یولا سالدی آتا تابوتینی
بوینی چیگنینده گوزی یاشلی دلینده وا ابا
.
اوزگه بیر کیفیتیله نعشینی حمل ایتدیلر
گورمیوبدور بیله تشییع جنازه ماسوا
.
پیش تابوته دگولدی ظاهراً حامل اولان
باطناً تابوتی حمل ایتدی ملکلر جابجا
.
پشت تابوتی صاقیندان حمل ایدردی مجتبا
صول طرفدنده یاپوشمیشدی غریب کربلا
.
سوز غلط دوشمز دیسم نعشین قباقینجه دوشوب
ایلیوردی حضرت روح الامین بیله ندا
.
ایله استقبال گرم ای تربت پاک نجف
سنده گلدی دفن اولونسون افتخار اوصیا
.
جان کیمین آغوشه آل گل جسمین ای خاک عزیز
غبطه ایتسون شأنیوه هفت آسمان عرش خدا
.
بو علیدور خسته حالیله سنه مهمان گلور
باغریقان افسرده خاطر دل یارا باشدا یارا
.
بو علیدور اودلی دیلده واردی بیر دنیا غمی
دردی وار داغلار بوئی ئوز آدی هر درده دوا
.
بو علیدور تک لیقیندا جان مجموع جهان
دوتدی بیگانه صفتلر لیک اونی بی آشنا
.
آلدیلار حقین الیندن ایتدیلر خانه نشین
قالدی ائوده تک انیسی اولدی آه جانگزا
.
یرمی بش ایل صبر ایدوب دوزدی بو امره شاهدیم
عَین فی العَین قَذا دور بیرده فِی الحَلقِ شَجا
.
بسکه گوردی بی وفالیق امت بی مهردن
خلقدن گتدی کناره تاپدی حال انزوا
.
گورمه سین تا کیم ایکی اوزلی مسلمانلار یوزین
چولده اوز عمرین گونون باشه ویروب بو مقتدا
.
گاه گیزلینجه گئدوب چاهه دیردی دردینی
درد آلان کیمسه تاپولمازدی اورک دردین آلا
.
ملّت اسلام الیله اوّلین مظلوم دی
امّت قرآن الیندن چوخ گوروب جور و جفا
.
اینجیدوب صوری مسلمانلار یورولموش خسته دی
آل کناره راحت ایت ای خاک پاک پر بها
.
بو عدالت روحی دور اوز عدلینه قربان اولوب
دار دنیادن گوزون اورتوب گلوب سنده یاتا
.
خسته دور قانی گیدوب چوخ باش یاراسی کاری دور
گوزله اینجیتمه بو جان مصطفادور مرتضی
.
دوردی تابوتین قاباق سمتی قاباقدان ناگهان
قویدولار تابوتی یر اوسته او دم دلده نوا
.
گوردیلر بیر قبر حاضر باخدیلار تاریخینه
حضرت نوح نبی قازموشدی قبری گوئیا
.
قبریدن بیر بیله سس گلسیدی چوخ باجائیدی
گل یولوندا انتظارم من نه مدّت دور آقا
.
چوخ یوروب صوری مسلمانلار سنی دلخسته سن
سینم اوسته یات بیر آز دینجل سن ای فخر التُّقی
.
سن منیم سینمده یاتسان فخر اعظمدور منه
چوخ تاپارسان تک وجودیله مقام ارتقا
.
چوخ اسفلی منظره اولدی کنار قبریده
ایستدی دین باغبانین گللری قبره قویا
.
آچدیلار گل تک سولان رخسارین آه و وائیله
محو مهر و عاطفت اولدی حسین و مجتبی
.
یوز یوزه قویدی آتائیله ایکی دلبندلر
آتش دل سونمه دی بو آیریلیقدا مطلقا
.
مجتبا نعشین اگیلدی باسدی جان تک باغرینا
هم قوجاقلاشدی او نعشیله غریب کربلا
.
آه او ساعتدن ترابه تاپشریلدی بو تراب
مجتبا قویدی آتا رخسارینی توپراقلارا
.
حیف او گل رخسار سولدی همدم اولدی خاکیله
حیف ایله قامت که یاتدی توپراق آلتدا جابجا
.
حیف ایله بیر باغبانه کیم ایاقدان سالدیلار
گللری چیگنینده بوینی قالدیلار دلده نوا
.
حیف اولا بیر دللرین دردین آلان درد اهلینه
درد دل صاحبلرین هجرانی ایتدی بی دوا
.
حیف او رأفت بخش ابوالایتامه یاتدی قبریده
قالدی ایتام و ارامل یولدا گوزلر بی غذا
.
حیف او امّید فقیران که ترابه قویدی باش
قالدی بیر عده فقیر و دلشکسته بی رجا
.
حیف اولا بیر چاره ساز و و چارۀ درماندگان
گیتدی باشسیز قالدیلار بیر عده درده مبتلا
.
حیف او مولا گئتدی الدن کول الندی باشلارا
شیعه نی ائتدی عزالی آلدی دللردن صفا
.
حیف او شاهین فضای دین قالوب پروازدن
سست عنصر کرکسه اما وسیع اولدی فضا
.
حیف ایله قرآن ناطق که خموش اولدی خموش
ویرمدی فرصت او شاهه بو جهان تنگنا
.
بیله تشییع جنازه بیله دفن و کفندن
یاده دوشدی دفن و کفن شهریار کربلا
.
دوشدی قالدی گون ایوینده فاطمه اوغلی حسین
قانه غلطان خسته یورقون سر بسر پیکر یارا
.
#دفن و کفنه حضرت سجّاد گلدی کوفه دن
گوردی واردی کربلا دشتینده بیر عالی صفا
.
باخدی اول قانلی بیابان ایله عطریله دولوب
عطر آپارور جنته هر دم اسور باد صبا
.
جویبار عشقدور دوشموش ایاقدان سرولر
گل کیمی خندان اولوب یتمیش ایکی گلگون قبا
.
تاپدی اوّلده آتا نعشین دولاندی باشینه
حلق مذبوحیندن اوپدی گوزه اشک پر بها
.
بولمورم آیری کفن تاپدی او عالی قامته
بیر حصیری چولقادی یا جسمینه اول مقتدا
.
بوتراب اوغلون ترابه تاپشیروب رمزاً دیدی
توپراق اولسون باشینه بو عالمین سنسیز بابا
.
تاپدی اصغر نعشینی ویردی آتا آغوشینه
حشره تک یاتسون آتانین سینه سی اوسته بالا
.
دفن ائدوب پائین پاده شاهزاده اکبری
یاتدیلار بیر قبریده مظلوم اوغول مظلوم آتا
.
شمع دینین جمع ایدوب یتمیش ایکی پروانه سین
بیر مزاره قویدی جمعین بیر مزار ایتدی بنا
.
یعنی بو بیر جمع دور جانلاری بیر قانلاری بیر
اوزلری بیر سوزلری بیر ، بیر مرامه آشنا
.
جامۀ سرخ شهادت سرخ صحراده گیوب
سرخ رو ئوز جانلارین اسلامه ایلوبلر فدا
.
یوز قویوب سمت فراته دیدۀ خونباریله
حالی چوخ پوزقون شکسته، نی کیمی دیلده نوا
.
جویبار عشق ایدوب گوردی کنار علقمی
قان آرا دوشموش او سرو بوستان مرتضا
.
بی مروّتلر قریبلار قول بوداقین ظلمیله
خار تیریله دولوب گل پیکری باشدان باشا
.
نیزه پوش اولموش وجودی گل کیمی اوراق دور
گلموری اعضا اله حملی اونون امکان تاپا
.
دوشدوقی یرده قازوب بیر خردا مدفن آغلادی
اوز عموسین قویدی قبره اودلی دیده آه و وا
.
گتدی قویدی سینه سی اوسته کسیلمیش اللرین
تا او اللر خدمتینده شاهد عدلین اولا
.
ای صبا ام البنینه ویر خبر قان آغلاسین
خرداجا بیر قبریده یاتدی ایله قدِّ رسا
.
« #تائبا »یوردی سنی پیر ایلدی بو چرخ پیر
قدّیوی بوکدی او موزون قامتون ایتدی دو تا
.
دلده ذکر کربلا اوز گونلرون ویردون باشا
گیتدی عمرون قالدی دلده آرزوی کربلا
.
دامن عبّاسی دوت یالوار اوزی ایستر سنی
گیت ضریحیندن یاپوش اهل عزانی قیل دعا
.
.
#حیدریه_شهادت
#تائب_تبریزی
#آتدی_دنیانی_گوزوندن_تاجدار_هل_اتی
#ترکی
#زبدةالاشعار

متن پیشنهادی:  شامدن گلدی حسینیم وطن آواره لری #اربعین_نجمی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی