کوفه
.
✍️ زبدة الاشعار ✍️
?: @nohe_torki
.
مرحوم حاج حسین شاکر تبریزی
.
سسون قربانی قارداش باشلیوبسان هاردا قرآنی
یارالی باشون ایلور نیزه ده اثبات یزدانی
.
هلالا سن کیمی کیمدور اولان اسراردن آگاه
ائده سر نیزه ده اسلام ایچون تأسیس دانشگاه
باشون گوردوم کوله باتموش ائله درک ائتمدیم ناگاه
سسون گلجاق سنی من لهجۀ مألوفه دن تاپدیم
ایتورموشدوم بلا دشتینده گلدیم کوفه دن تاپدیم
.
بولار بلمز کول آلتیندا حسین سوزنده آتش وار
علیه کفره بیر شخص مبارزده کشاکش وار
گچر باشدان بولر خولی تنورینده نه مَفرَش وار
یاتار کولدن گئدر طشته اولار مانند یحیایه
جدانی طور ائدوب طعنه وورا دیره کلیسایه
.
چخوب اولدوزلارون دورینده چون آیات مکنونه
جداده وئرموسن خورشید تک تشکیل منظومه
ولی ناقصدی آیدان ناقصون مشکلدی کلثومه
او اولدوزلار سنون قارداش منیمده عابدیم واردی
نظیری اولمیان تابان ستاره ساجدیم واردی
.
بو گلمزدی خیاله واردی بیزده سهمگین تقدیر
اولا بیر خانواده جمله سی مظلوم ائدر تاثیر
اگر منله دانشمورسان یتیمه قزلارون دیندیر
گلایون اولسا مندن زینبون سیلمز غبار اوزدن
الیم چاتماز حسین اما اولار اشکیم نثار اوزدن
.
غریبه بولموشوخ وار هر قدر شوریده سر سنده
فنا فی الله لر استاد عرفان و نظر سنده
حسین بیر دسته ده لیلای صحرا دربدر منده
گوزل تقسیم اولوب کالا مساوی مایه شرکتده
بو شرکت ساخلیار بازار تاریخی حقیقتده
.
دئمه عاجزلیوب سهمیمده، مشکین جامه گللم من
اداءِ نقد اولوب تقدیم، کسر وامه گللم من
دوشوب آردینجا صحرایه، دیار شامه گللم من
حسین جان هاردا اولسان زینبونده سندن آیریلماز
گوگل پیوندی وار چون بو علاقه مندن آیریلماز
.
بلایه آشنایوخ هر نه نوعی ابتلا اولسا
تفاوت ایلمز یا کوفه یا که کربلا اولسا
گویَرمزدی بو نوعی قوللاری زینبده لا اولسا
نه دنیایه سنون تک بیر نفر قارداش گلر قارداش
نه من تک بیر باجی تا وار جهان بیرده گورر قارداش
.
حسین باخ گوشۀ چشمیله شهره گور نه عنوان وار
اسر هی تند باد حادثه فکریمده طوفان وار
خلافت ایلین یرده آتام، خرمادن احسان وار
باخوب یان هاشمیّه قزلارا سن اوردا من بوردا
شرار روزگاره توش اولاق من بوردا سن اوردا
.
آدیم «شاکردی» ای زهرا دل و جانی پناهیم یوخ
بغیر از خاندان مصطفی امیدگاهیم یوخ
غروب عمرده زاد بقا الّا گناهیم یوخ
منی تاپشورگلان قارداشیوه اللهه تاپشورسون
ووروب یاندورماسون محشرده آل اللهه تاپشورسون
.
#کوفه
#سسون_قربانی_قارداش_باشلیوبسان_هاردا_قرآنی
#شاکر_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید