زبدةالاشعار

الله الله نصف شب یثربده اِیللر قالمادی #خروج_مدینه_معزی_اردبیلی

رویای #حضرت_صغری (س) بعد از خروج کاروان از مدینه
.
✍️زبدةالاشعار ✍️
.
🆔 : @nohe_torki
.
معزی اردبیلی
.
الله الله نصف شب یثربده اِیللر قالمادی
عازم اولدی کعبیه سلطان محشر قالمادی
.
کاروان آیریلدی جان آیریلدی جسمیمدن دیدیم
اَلّلریم ایِلدن ئوزولدی تاب دیگر قالمادی
.
ظلم و جور اشقیا چیخمیشدی چوخ اندازه دن
شهر پیغمبرده فخر آل حیدر قالمادی
.
بیعت اوسته ایلدی رویت ولیدین مجلسین
مولدینده عالم اسلامه رهبر قالمادی
.
آچدیلار هجرت سوزون ابلاغ اولوندی گیتمیم
آغلادیم تک ایوده آچدیم باشدا معجر قالمادی
.
تِز آپاردیم اکبرین سَردیم ایاقی آلتنا
دوشدی چوخ دل پیچ وتابه گیتدی دلبر قالمادی
.
گر ئوگیلیک اولمادی باعث بیله گوزدن دوشم
بس ندندور فکریمه شبه پیمبر قالمادی؟
.
وای نه دردبی دوایه دوشدوم اکبردن صورا
یالواروب ئوپدوم ایاقلاریندن اکبر قالمادی
.
نه آنام لیلا نه عمّم راضی اولدی من گیدم
سینه مادرده حتیّ گیتدی اصغر قالمادی
.
باشلادی قرآن تلاوت ایلدی امّ البنین
آیریلوب عبّاس وعون و فضل و جعفر قالمادی
.
چوخ ملیحه ئیدی چوخ ایستردیم رقیّه خاطرین
سن اَقلّا قال دیدیم زهرایه بنذر قالمادی
.
دینمه باخدی گوز آلتی یوسف آل اللهه
بیلدیم اکبر سیز همان دردانه دختر قالمادی
.
ئولدورر آخر منی بیلّلم فراقین غصّه سی
گوگلومی آلسون یانیمدا یار و یاور قالمادی
.
هر بلادن ساخلا الله یَثُربین زیبالرین
گلستان حُسنیده گلهای احمر قالمادی
.
.
بسترینده یوخلادی صغرای نالان بیر گیجه
مرغ دل پر آچدی گوردی قانلی میدان بیر گیجه
.
.
کربلانون عالم رویاده صحراسین گوروب
گوزلری یاشلان دولوب غم غصّه دریاسین گوروب
.
پاره خنجر پاره شیشپر پاره پیکر پاره نعش
سو یانندا قیزلارین لب تشنه سقّاسین گوروب
.
قورخا قورخا خیمه دن بیرقیز گلوردی مقتله
دیده گریان اکبرون ماه دِلاراسین گوروب
.
یاره لنمیش سینه اوستونده آچوب گیسولرین
نورعین مصطفانون اوخلی اعضاسین گوروب
.
نصفی یانمیش خیمیه بیردن دوشوبدور گوزلری
قانلی صحرانون اوجا قامتلی زهراسین گوروب
.
سیلی گوی یاپراقه بنذتمیشدی زیبا یوزلری
قیزلارین گویا گونوز هنگام غوغاسین گوروب
.
ووردی محکم باشینه رویاده صغرا اَلّلرین
قاره سالمیش باشینه چون عترت یاسین گوروب
.
اکبرین زیبا جمالین گورمگه مشتاقیدی
ناگهان یوسف لقانون ماه سیماسین گوروب
.
دل دولوب دلبر غمیندن آخدی اشگ حسرتی
چوخ دوتولموش قلبینون صغرا مصفّاسین گوروب
.
اَسدی بیر یاپراق کیمین آز قالدی اولسون غصّه مرگ
قان ایچبنده اکبرین کی چشم شهلاسین گوروب
.
عرض ایدوب قارداش باشوندان قان گلور رخسارووه
اولما باشون زهریلی شمشیرین ایذاسین گوروب؟
.
گوزلمه رویاده گویا سن منی اکبر دیدی
باشینه دنیا دولاندی_قاره دنیاسین گوروب
.
خوابیدن بیدار اولوب سسلندی تِز گل جدّه جان
جدّه سی آغلار گوزیلن گلدی صُغراسین گوروب
.
.
چوخ سیزیلدور سان ندن؟جانیم سنه قربان دیدی
عالم رویاده جدّه قلبیم اولموش قان دیدی
.
.
کربلا دشتینده بیر قانلی بیابان گورمیشم
باغبان سیز گُلّلری پَر پَر گلستان گورمیشم
.
ایستی قوم اوسته یخیلمیشدی یارالی بیر بدن
اَلّلرین کسمیشدی دشمن نعشین عریان گورمیشم
.
من بابام اُمّیدگاه عالمه اوخشاتمیشام
سینه ده حدّون علاوه زخم پیکان گورمیشم
.
گلدی زهرا بنذری شام غریبان دوتماقا
صورتین نیلی اَنیسین آه و افغان گورمیشم
.
دوشموشیدی گُل وجودیندن عمومون قولّلاری
عمه جانی آل اطهاره نگهبان گورمیشم
.
خیمه نیم سوزیده باخدیم یوزی پوزقونلارا
عترت خیرالورانی دیده گریان گورمیشم
.
سسلنوردی وای علی اصغر رباب غمزده
قانلی بیر قُنداق قباقبنده پریشان گورمیشم
.
اول دعا گو جدّه جانم تابوخوم دوز چخماسون
چون یوخومدا من گیجه وحشتلی طوفان گورمیشم
.
شرح حال اکبری اصلا ئورک گلمور دیوم
هاشمی خال اوسته قاره گوزده من قان گورمیشم
.
من دیدیم قارداش دانیش منلن قادون گلسون منه
من دیدی صغرا آغیر بیر یاره باشدان گورمیشم
.
من دیدیم گل یثربه باغلی_اطاقون قالماسون
من دیدی عشق عالمینده کوی جانان گورمیشم
.
من دیدیم شمع حیاتیمسن علی پروانووَم
من دیدی یاندیم قوتاردیم نار سوزان گورمیشم
.
من دیدیم یولداشلارون طوی ایتمیور گوزلر سنی
من دیدی قاندان حنانب ای پریشان گورمیشم
.
آند ویرّم من سنی یارب علیّ اکبره
باخ ایکی دنیاده لطفیلن(مُعزِّی)نوکرَه
.
#خروج_مدینه
#حضرت_صغری
#الله_الله_نصف_شب_یثربده_ایللر_قالمادی
#معزی_اردبیلی
#ترکی
.
✍️ #زبدةالاشعار ✍️
.
🆔 : @nohe_torki

این متن را هم بخوانید:  ای ایدن شهر قمی باغ جنان معصومه #حضرت_معصومه #مجید_امینی

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی