زبانحال امام حسین (ع) در شهادت حضرت ابوالفضل (ع) به خواهرش
..
..
حاج اصغر احمدیان خسروشاهی
..
..
دنیانی دوتوب ناله و آهیم باجی زینب
عبّاسیم ئولوب سیندی سپاهیم باجی زینب
..
..
سیندی قوشونوم محنتیم اندازه دن آرتدی
یاتدی علمیم لشکر کین مقصده چاتدی
بو چولده بنی هاشم آیی ظلمیله باتدی
عبّاسیم ئولوب سیندی سپاهیم باجی زینب
..
..
گئت خیمه ده اعلان ائله باشلانسون عزاسی
چوخ نسگلی وار بوردا باجی یوخدور آناسی
چک خیمه سینه قاره باتوب قانه لواسی
عبّاسیم ئولوب سیندی سپاهیم باجی زینب
..
..
بو قانه باتان پرچم ائدر حالینی اعلان
نه حاله سالوب صاحبینی لشکر عدوان
شام اهلی ائدوب گل بدنین تیریله شان شان
عبّاسیم ئولوب سیندی سپاهیم باجی زینب
..
..
ئولدوردی سوسوز قارداشیمی فرقه ی اشرار
بو حالی خبر وئر بیله لر خیرداجا قیزلار
تا سو یولونی گوزلمه سون بیرده سوسوزلار
عبّاسیم ئولوب سیندی سپاهیم باجی زینب
..
..
اهل حرمی خیمه ده یغ باشیمه آغلا
باخ قانه دونن گوزده کی گوز یاشیمه آغلا
وئر سس سسیمه گل باجى قارداشیمه آغلا
عبّاسیم ئولوب سیندی سپاهیم باجی زینب
..
..
سو اوسته سالوب قوللارینی لشکر کینه
گوزلور سو یولی خیمه ده اول ماه مدینه
سسله گله بو مشکی گوره نازلی سکینه
عبّاسیم ئولوب سیندی سپاهیم باجی زینب
..
..
بو رسم وفادن باجی جان گئچمه دی ئولدى
گولدن نه قدر ووردیلا اوخ سئچمه دی ئولدی
مابین ایکی نهرده سو ایچمه دی ئولدى
عبّاسیم ئولوب سیندی سپاهیم باجی زینب
..
..
سقا سو کنارینده وئروب جان سو یولوندا
شام اهلی جفائیله سالوب صاق و صولوندا
بیر مشک سویا وئردی فدا ایکی قولوندا
عبّاسیم ئولوب سیندی سپاهیم باجی زینب
..
..
ای «احمدیان» آغلا ائله دردیوه چاره
چوخدور گنهون توشه گوتور الده مزاره
آغلار گوزیله بو سؤزى ذکر ایله دوباره
عبّاسیم ئولوب سیندی سپاهیم باجی زینب
..
..
#عباسیه #احمدیان_خسروشاهی #عباسیه_شهادت #ترکی #زبدةالاشعار
نظر دهید