زبدةالاشعار

اولدی آناسیندان ائله که زادۀ زهرا #حسینیه #منعم_اردبیلی

تولد خامس آل عبا حضرت سیدالشهداء
#گریز به شهادت امام حسین (ع) و حالات #ذوالجناح
.
✍️ #زبدةالاشعار ✍️
.
🆔: @nohe_torki
.
مرحوم منعم اردبیلی
.
اولدی آناسیندان ائله که زاده زهرا
امر ائتدی حسینی گتیرون حضرت طاها
.
عرض ایلدی لعیا وئرورم غسل ولادت
حضرت دئدی یوخدور بالامون غسلینه حاجت
.
پاکیزه گلوب عالم دنیایه حسینیم
پاکیزه گئدر جنّت الاعلایه حسینیم
.
غسل اولمیاجاقدور اونا دنیایه گلنده
ئوز قانی حسینون اولاجاق غسلی ئولنده
.
گوتدی بالانی جان کیمی آغوشینه آلدى
صود وئردی دیلیندن صورا گهواریه سالدى
.
جبریل امین سسلدی لای لای حسینیم
گهواره نی ترپتدی دئدی وای حسینیم
.
دولدی ملکیلن در و دربار رسالت
گلدی تزه مولودی هامی ائتدی زیارت
.
گویلرده ملکلر هاموسی قیلدی مناجات
عرض ائتدیله یا قادر و یا قاضی الحاجات
.
یا وئر بیزه رخصت توکولک روی زمینه
یا اینکه حسینی گتیروز عرش برینه
.
امر ایلدی خلاق جهان روح الامینه
محبوبیمی فی الفوری گتور عرش برینه
.
جبریل امین گوتدی حسینون اوزون اوپدی
باخدی یوزینه آغلادی آغلار گوزون اوپدی
.
قالخزدی سماواته ملک دوره سین آلدى
شادلق سسی اول وقته ملکلردن اوجالدی
.
هر کیم اوزونه باخدی پریشان اولوب احوال
گوردی سریوبلر باشینا بیر ساری دسمال
.
جبریل امین آچدی او دسمالی باشیندان
روحیم ساری دسمالوه هم جانوه قربان
.
بیر نور درخشنده او دم ائتدی تجلا
نور آلدی ایشقلاندی تمام عرش معلا
.
فخر ایلور حسین گلمگینه عالم بالا
قوی قالسون حسین اوردا گورگ نیلدی زهرا
.
بیرده خانمون سینه سی اندوهیله دولدی
گهواریه باخدی بالانی گوردی یوخ اولدی
.
عرض ایلدی پیغمبره ای نور دو عینیم
گهواره ایچینده بابا جان یوخدی حسینیم
.
حضرت دئدی جبریل آپاروب عرش برینه
الان گتورللر بالامی روی زمینه
.
تعریف حسینی ائشیدوب فاطمه گولدی
پیغمبرون اما گوزونون یاشی توکولدی
.
گوز یاشینی گورجک خانمون رنگی سارالدى
اولما بالام ئولدی بابا جان تئز خبر آلدی
.
یوخ یوخ دئدی الساعه حسین عرشه یتیشدی
من آغلیورام کرب و بلا یادیمه دوشدی
.
واضح گورورم اوغلومی طوفان آراسیندا
بیر سینه ده دورت مین یارا القان آراسیندا
.
عرض ایلدی بابا دئ گوروم کرب و بلاده
آیا اولاروخ بیز او بیابان بلاده
.
یوخ یوخ دئدی عطشان ئوله جک بی کس و بی یار
نه سن، نه من اولّام نه اولار حیدر کرّار
.
خاتون قیامت دئدی ای سرور ابرار
یاندیم بابا یاندیم سنه بیر کلمه سوزوم وار
.
آیا دئ گوروم بس بابا کیم آغلار حسینه
کیم قاره گییر کیملر عزا ساخلار حسینه
.
حضرت دئدی زهرا اونیچون چوخدی عزادار
دنیا نقدر وار بالاما شیعه لر آغلار
.
یا فاطمه ای دختر پیغمبر خاتم
باخ شیعه لره دوتموش حسین اوغلوا ماتم
.
بیر باخ هامی صدقیله عزادار حسیندور
یول وئرسه له والله هامی زوّار حسیندور
.
یا فاطمه الان بیلورم بوردا دوروبسان
باشونده قرا سنده عزا بزمی قوروبسان
.
یا فاطمه قوى عرض ائلیوم آغلا حسینه
بو مجلس ماتمده عزا ساخلا حسینه
.
یا فاطمه اوغلون آتین اوسته یورولوبدور
جنگ ائتمگه یوخ طاقتی اوخلار ورولوبدور
.
مرکب یورولوب قورخولی میدان آراسیندا
آواره او دریای خروشان آراسیندا
.
باخدی او سوسوز مرکبه سلطان شهیدان
یاندیم دئدی سال تپراقا یاندیم سوسوزومدان
.
عرض ایلدی قربان سنه ای شاه شهیدان
آخر منه تاپشوردی باجون زینب نالان
.
گوردون که حسینیم یخیلور جنگیده قالما
اخیامه گتور قانلی بیابانیده سالما
.
رحم ایله باجون زینبه ای شاه مدینه
الان سنی گوزلر الى قویندا سکینه
.
قوی خیمه سرایه آپاروم آغلیا زینب
آخر نفسونده گوزوی باغلیا زینب
.
امر ائتدی دایان تنگه گلوب یاره لی سینم
هیچ بیلمیورم هاردادی ایستکلی سکینم
.
تپراقه قویوب دیزلرینی فوری او حیوان
لنگر ائلدى صاق طرفه شاه شهیدان
.
عباسینون آخر قولی یوخدور دوتا قولدان
قوزاندی گنه ایستدی دوشسون یره صولدان
.
تپراقه گنه دوشمدی بیر بهتیده دوردی
قالخزدی ئوزون مرکبون اوستونده اوتوردی
.
آت دوندی باخوب حالتینه گلدی نوایه
رأیون دولانوبسا آپاروم خیمه سرایه
.
یوخ یوخ دئدی صاقدان ائلین وقتیده لنگر
قولارین آچوبدور دایانوب ختم پیمبر
.
بو حالیله اوخلار بوریوب دسته به دسته
امر ایلور حسینیم بالا گل سینمون اوسته
.
صولدان یخیلاندا گورورم حضرت زهرا
قوللارین آچوب آغلوری صدیقه کبرا
.
عرض ایلسم آچ باشوی یوخ منده جسارت
دوندی او بیابان بلا اولدی قیامت
.
غیرتلی جوانلار یارالی جانوه قربان
بو جوشه گلن قانلار آخان قانوه قربان
.
اوخلار آتین اوسته سنی آغوشه آلاند
کیم دوتدی قولوندان یره آتدان یخلاندا
.
آتدان یره که دوشدی قوشون هلهله قیلدی
جنگ ایلمگه دوردی ایاق اوسته یخلدی
.
یا فاطمه اولدی او زمان محشر کبرا
جبریل امین وردی صدا قُتل الحسینا
.
ظلمون اودی قوزاندی گئدوب عرشه دایاندی
بی صاحب آتی قانلی بیابانی دولاندی
.
بیر پارچا قزل قانه باتوب تلیدن آشدی
عطشان بالالار هولیله پیشوازینه قاشدی
.
جام الده سکینه نجه که قاشدی قباقه
گورجک او سوسوز طفلی باشین سالدی اشاقه
.
جمع اولدی بلالر توکولوب کرب و بلایه
اطفال حسین قانلی آتی آلدی ارایه
.
یوز وئردی دوباره سوسوز اطفاله مصیبت
چکمه ایاقندا یتیشوب بیر خانم عورت
.
دوندردی آتون زینینی با قلب شکسته
باشینده قرا میندی سوسوز مرکبون اوسته
.
شاهون دولانوب دربدر اطفالینه باخدی
اوندانصورا بیر زینبون احوالینه باخدی
.
عرض ائتدی حلال ایله خانم ترک ائدورم من
قویدوم سیزی دشمنلر ایچینده گئدورم من
.
الله ئوزون عالمسن او ساعت نلر اولدی
وای زینبه قارداش ئولومیندن بتر اولدی
.
بیر محشر کبرا او زمان اولدی نمایان
عطشان بالالار جامی آتوب قاشدی دالیجان
.
منعمدوره آدیم نوکر دربار حسینم
یوخ یوخ غلط ائتدیم سگ مردار حسینم
.
.
#حسینیه #منعم_اردبیلی
#حسینیه_میلادیه
#اولدی_آناسیندان_ائله_که_زاده_زهرا
#ترکی
.
✍️ #زبدةالاشعار ✍️
.
🆔: @nohe_torki

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی