زبانحال امام حسن (ع) خطاب به خواهرش
..
..
..
..
مرحوم تائب تبریزی
..
..
..
..
حسن قارداشوی درک ایت بلایه آشنا زینب
ویروبدور دشمن جانی منه زهر جفا زینب
وطنده بیر غریبم من
غریبم من غریبم من
..
..
..
..
یازیلموش صورتیمده اشگیله اوزگه بیان واردی
دوزولموش قطره قطره بو دوداقلاریمده قان واردی
بهار گلشن عمریمده آثار خزان واردی
نجه گور یاندیروب عمریم گولون باد جفا زینب
..
..
..
..
آنام یوخدور منیم بو قیدیمه سن تک قالان اولماز
بو غمگین ساعتیمده سن کیمی یاده سالان اولماز
یتوب دل دردیمه دل دردیمی دلدن آلان اولماز
کیمیم وار سن کیمی دل دردیمه ایتسون دوا زینب
..
..
..
..
آنام یوخدور ولیکن سن منیم زهرا نشانیمسن
آنامین یادگاری هم صفای خانمانیمسن
آنام سنسن باجیم سنسن آنام تک مهربانیمسن
آنام تک دردیمی گل آل آنام تک باوفا زینب
..
..
..
..
غمیله دوتموسان الفت بلایه آشنا سن سن
گنه بو حالیله درده یتن بیر باوفا سن سن
سراپا عاطفتسن باوفاسن باصفا سن سن
وفاده هم صفاده ای آنام خیرالنسا زینب
..
..
..
..
اوشاقلیقدان گرفتار ملال بی حسیبم من
غمیله الفتیم واردى بلالی غم نصیبم من
منه اولموش وطن غربت غریبم من غریبم من
غریبم گل منی درک ایت وفالی آشنا زینب
..
..
..
..
آتام گئتدی اُؤزوم مقهور قوم مشرکین اولدوم
منافق لر منى اینجیتدیلر عزلت گزین اولدوم
آتام تک حقّیمی غصب ایتدیلر خانه نشین اولدوم
قوییدی کاش راحت اؤز ایویمده اشقیا زینب
..
..
..
..
گه اولدوم روبرو من قوم بی شرم و حیائیله
یارالاندیم گهی زخم زبان اشقیائیله
وریلدی گه ایاقیمه یارا نوک عصائیله
منی ناراحت ایتدی زهرلی زخم عصا زینب
..
..
..
..
بساط کینه سین هر لحظه قانلی قاتلیم قوردی
قان اولموش قلبیمی سندیردی خونابیله دولدوردی
آجی دللر آچیلدی هر یتن دل یاره سی وردی
امان دل یاره سیندن کیم ساغالماز بو یارا زینب
..
..
..
..
شبیهم داغ باشیندا بیر گونه تیز باتماقیم خوشدور
او دنیا که دوشوبدور بو گوزومدن آتماقیم خوشدور
نگاریم دعوت ایلوب وصلینه تیز چاتماقیم خوشدور
وصال یار احسندور نه قدری تیز اولا زینب
..
..
..
..
نگار بی بدل شوقیله محو اشتیاقم من
دلیمده شور و شوق وصل نالان فراقم من
سیزه بو ایوده تزلیقدا گیدرگی بیر قوناقم من
دویونجا قارداشون گل گور بلایه مبتلا زینب
..
..
..
..
منیم تک سینه ده بیر کیمسه نین دل یاره سی یوخدور
منیم تک بیر کسین اکباد پاره پاره سی یوخدور
او اکبادی که اولدی پاره پاره چاره سی یوخدور
نه وار بو دردیمه چاره نه واردی بیر دوا زینب
..
..
..
..
پیمبر احترامین اشقیا بالعکس یوخلالّار
ایدوبلر چوخ جفا دلبندینه دویمازلا چوخلالّار
منیم تشییع ایدنده نعشیمی ظلمیله اوخلالّار
ایدر شانشان منی تابوتده تیر جفا زینب
..
..
..
..
منی کیم ایلیوب مسموم ارادم یوخدی افشایه
اورکده ساخلارام گیزلین آپارّام دار عقبایه
حضوراً عرض قیلّام اؤز آنام مظلومه زهرایه
اوغول دردین دیه خوشدور آلا دردین آنا زینب
..
..
..
..
باخار ایستکلی لر گورّم دولی گوزلی یانا یانه
دؤنور بو داغلی قلبیم تازه دن لاله کیمی قانه
اولار بیر یانه عبدالله و قاسم دردی بیر یانه
شرار آهیله اود یاغدیرولّار برملا زینب
..
..
..
..
حیاسین گوسترور قاسم عفیفانه نگاهیله
وفاسین ایلوری اعلان شفیقانه نگاهیله
منه درد آرترور امّا یتیمانه نگاهیله
دیور رمزاً نگاهیله غمین اول دلربا زینب
..
..
..
..
گل اوزلی قاسمیم یاده سالار آینده سین آغلار
او یادیله ایدر دلدن نوای آتشین آغلار
توکر فرط حیادن گوز یاشین گزلین حزین آغلار
گلوگیر ایلیوب غصه سزیلدار بی صدا زینب
..
..
..
..
دئ قارداشیم حسین گلسون منیم احوالیمی بیلسین
منیم دل دردیمی آلسون دوداقیم قانینی سیلسین
دیوم دولموش اورک دردین اورکده دردیم اسگیلسین
منیله یوز یوزه قویسون ایداخ باهم نوا زینب
..
..
..
..
بقیعین خاکی مدفندور منه یثربده ویرّم جان
حسینی کربلا عشقی ایدر چوللرده سرگردان
ویرر یتمیش ایکی تشنه منای عشقده قربان
اولار نه ایله قربان لار نه ایله بیر منا زینب
..
..
..
..
حسینه بیر سفر وار محنت و درد و بلائیله
دوشر صحرالره شور و هوای نینوائیله
سنونده شرکتون واردی اونا صدق و صفائیله
حسینون باشلینده انقلاب کربلا زینب
..
..
..
..
حسین باشینده نه عشق و نه شور و نه هوا واردی
سنون باشونده ده ایله هوائیله بلا واردی
حسین تک مشتری سن هر قضا هر ابتلا واردی
ایکی قارداش باجی باشوزدا واردی بیر هوا زینب
..
..
..
..
حسین آدیله جمع اولموشدیلار باهم نچه احرار
ایدوب احمد سیه چهره حبیبیله صادق اصرار
امام مجتبا آدیله تائب نظم ایده اشعار
بیزی دعوت ایله اؤز قبریوه بیر وقفه یا زینب
..
..
..
..
ادبدن چوخ اوزاقدور ایلیه سندن گله تائب
گلایه ایلمز ایستر ولی سندن صله تائب
مریضی وار دواسی یوخ دوشوب چوخ مشکله تائب
یتور ال مشکلین آچ ای اولان مشکل گشا زینب
..
..
..
..
خانم زینب آدوندور زیب نام مرتضا سن سن
آتان مشگل گشادور هم اؤزون مشکل گشا سن سن
ویررسن هر مریضه سن شفا روح شفا سن سن
منیم ده او غلوما گل ویر شفا روح شفا زینب
..
..
..
..
#حسنیه #تائب_تبریزی #ترکی #حسنیه_شهادت #زبدةالاشعار
نظر دهید