حضرت ارباب عطشان شاه مظلومان حسین #حسینیه_بهزاد_قاسمی

تعریف حضرت سیدالشهدا(ع)
و جریان دوازده ضربت در قتلگاه
..
..
..
..
..
بهزاد قاسمی اردبیلی
..
..
..
..
..
حضرت ارباب عطشان شاه مظلومان حسین
آفتاب بی کفن ماه غریبستان حسین
نعشی اوچ گون،گون قباقینده قالان سلطان حسین
باغبان شهر مستی گل فروش سرمدی
پاک آدی مین دورت یوز ایلدی آبروی شیعه دی
..
..
..
..
..
فخر آل فاطمه محراب عشقین حیدری
طور عاشورانین عریان جان وئرن پیغمبری
مست ائدوب حورالری عطر عبای اکبری
روح الرّحماندی باغ رحمتین ریحانه سی
گون به گون آرتور قرا کوینک گیین دیوانه سی
..
..
..
..
..
لیلة القدر اوغلیدی سرّ شب اسرادی بو
قنداقیندا عرشه معراج ایلین مولادی بو
عشق ئوزی اقرار ائدور من قطریم دریادی بو
سنده عاشقسن اگر گَل ساخلاما بوینوندا دِین
کلمه ی عشقه قلم چک اوستونه یاز یاحسین
..
..
..
..
..
یار اودور قیمت وئره عشق عالمینده یارینه
وقف ائده دار و ندارین تا ابد دلدارینه
مشتری زهرادی ای دل کربلا بازارینه
گَل بو سوداده تمام هستوی حرّاج ائله
جبرئیل اول،آچ قناد، گئت گویلره معراج ائله
..
..
..
..
..
کیم بصیرت تاپسا سیر ائتمز زمان فانیده
لامکانین عاشقی قالماز مکان فانیده
هر نئیه تای گلسه بیرگون بو جهان فانیده
جوت یاراتسا قادر الله هر نئی حتی آیی
بی کفن اربابیمون عباسینون گلمز تایی
..
..
..
..
..
ماه ماتمدور گلون دشت بلایه بیر باخون
چشم قلبیلن نوای نینوایه بیر باخون
آی بهشتی آختارانلار کربلایه بیر باخون
او بهشتی کی اونون تعریفی قرآندان قالوب
عطر و بوسین تشنه لب شاهین ضریحیندن آلوب
..
..
..
..
..
واژه لر گوزلور گریز شعری یوخ دلده دوام
نوحه تصویرین چکور بو نوعی نقّاش کلام
عصر عاشورا غروبین وقتی یورقون بیر امام
مقتل عشقه دوشوب یاحیّ و یامنّان دئیور
یوز گوزی قانلی چوخور یرده اناالعطشان دئیور
..
..
..
..
..
بیر قوجا سیّددی غربتده وطن سیز جان وئرور
بیر گلستان گل ساتوب ایندی چمن سیز جان وئرور
آج،سوسوز،ایستی قوم اوسته پیرهن سیز جان وئرور
روزه دار روزگار عشق اولوب افطارسیز
آبروی کعبه دور اما قالوب اَستارسیز
..
..
..
..
..
دیل دوداقیندن دمادم جوهر ایمان سوزور
تَرپننده کیپریگی رخسارینه مرجان سوزور
آلنینی داش سیندیروب عمّامه سیندن قان سوزور
آختارور وصل نگاری بوشلیوب اولدوزلارین
زینبه فکر ایلمور،یاددان چیخاردوب قیزلارین
..
..
..
..
..
سود ائدوب سودای غمده بی سر و سامان یاتوب
جان عالمدور ولی مقتلده نیمه جان یاتوب
اوچ پر اوخ قلبین بولوبدور اوچ یره عریان یاتوب
دوره سین دشمن آلوب حالی پریشان گورسنور
پاره پاره جسمینه هی نیزه دور قالخور اَنور
..
..
..
..
..
قلعه ی توحیدی ویران ایلیور قوم دنی
اوخشادوبدور نیزه لر،نیزاره پوزقون گلشنی
یازدیم اما کاش یازمیدیم بو غملی روضه نی
گردِ غم قونسا رُخ آئینیه گور نیلیر
اَنسه یوز نیزه سینیق بیر سینیه گور نیلیر
..
..
..
..
..
دوشدی دلدن دشت ماتمده امیر قافله
رحمسیز لشکر سرای عشقه سالدی ولوله
کاش نیزه ویرماقیلان ایش تاپیدی فیصله
آه او وقتدن اهل کوفه کام آلوب دینجلدیلر
دسته دسته قتلگاهه داش ویرانلار گلدیلر
..
..
..
..
..
آتش عصیانی یاندیردی گینه اشرار شر
نه شرافتدن خبر واردور نه غیرتدن اثر
بیر آدامسیز میهمانی داشلیور اون مین نفر
یوخدی بیر کس رحم ائده بو بی کسین گوزیاشینه
دیزلری تیترور آغیر داشلار دگنده باشینه
..
..
..
..
..
وار خبرلرده او اثناده عمر سعد دنی
وئردی فرمان شمره ذبح ایله بو شاه تشنه نی
گئت سَنان بن اَنس تک سنده خشنود ائت منی
پوز ، پوزولموش گُل کیمی پیغمبرین آئینه سین
سال فشاره چکمه ون آلتیندا عریان سینه سین
..
..
..
..
..
کربلا یعقوبینون سَپ تپراقا گوزیاشینی
آغ محاسینین یاپیش وئرمه امان کس باشینی
قوی هرایه سسله سون قولسوز یاتان قارداشینی
آفتابین جانین آل،جان جان دئسون اولدوزلاری
باشینی ویر نیزیه تا باشین آچسون قیزلاری
..
..
..
..
..
عفو ائله یابن الحسن سن بیل ننون زهرا منی
سوز چاتوبدور بیر یره بی تاب ائدر مولا سنی
گون باتان وقتیدی باتدی قانه شمرین دامنی
خنجری الده قدم قویدی منای اقدسه
تاکی باشی داشلانان بیر سیّدین باشین کسه
..
..
..
..
..
چیمرادی قوللارین اوّل گوتدی دَستار سَرین
دامنین قالخیزدی اوندان سیلدی آلنیندان تَرین
اللری تیتروردی امّا دوتدی محکم خنجرین
سالدی نامردانه دیلدن شاه مردان اوغلینی
باشلادی ذبح ایلیه زهرانون عطشان اوغلینی
..
..
..
..
..
ضربت اوّلده ائتدی طاقت دنیانی طاق
قانلی مقتلده بویاندی قانینه مظلوم قوناق
گوزلری سوزدی،آخیندی باشی،چالدی ال ایاق
عاشق شوریده سر ئوز عشقینه ویردی محک
نوک خنجر باتدی دالدان باشینه سرنیزه تک
..
..
..
..
..
ضربت دوّمده یرلر اسدی گویلر تیتره دی
دوشدی لرزه ماسوایه، طاق محشر تیتره دی
دیسکینوب قانلی عباده نعش اکبر تیتره دی
سسلدی یانّام بو چولده گورنه یالقوزسان بابا
وئر اجازه تا دوروم یردن اوغولسوزسان بابا
..
..
..
..
..
ضربت سوّمده چیخدی ئوز مداریندن زمین
سویدی اگنیندن گلینلیک کوینگین تازه گلین
قوینونا قویدی یتیملر تک حنالی اللرین
چیخدی ئوز حجله سراسیندن عروس کاروان
سسلدی مظلوم بابام بیکسدی قاسم هارداسان
..
..
..
..
..
ضربت چارمده دوتدی عالمی گرد محن
نیم خیز اولدی فرات اوستونده بیر قولسوز بدن
سسلدی عفو ایله ئوز عباسیوی آی بیکفن
اولمادیم من، غصل هجران گل کیمی سیخدی سنی
سن یخیلمازدون منیم دردیم یره یخدی سنی
..
..
..
..
..
ضربت پنجمده یاندی اوتدا قلب آفتاب
اصغرین قانلی قماطین باغرینا باسدی رباب
سسلدی آی دیلسیز اوغلوم هارداسان تئز وئر جواب
هاردا اولسون مقتله گئت قویما شاهیم تک قالا
چون اودا سن تک چکور الان بوغاز دردین بالا
..
..
..
..
..
ضربت ششم نفسدن سالدی جان سیز کوکبی
تلّیلن گودال آراسیندا قوجالتدی زینبی
دوشدی باشیندن یره قانه باتان چادرشبی
دیزلری اسدی،یخیلدی تپراقا،حسرت یئدی
بوینی چیگنینده باخوب گوداله جان قارداش دئدی
..
..
..
..
..
ضربت هفتمده دوغراندی دامارلار باتدی سس
ضربت هشتمده آغزین دوتدی قان،سیندی جرس
ضربت نهّمده چیرپیندی ئورک گئتدی نفس
ضربت دَهّمده کئچدی درد و غم اندازه دن
اندی بیر ضربیله خنجر چیخدی باش شیرازه دن
..
..
..
..
..
گلدی اون بیرمینجی ضربتده نوایه نینوا
چکدی یللر زوزه،گون باتدی،قرا گئیدی هوا
دیسکینوب بیردن رقیه سسلدی جان جان بابا
جان بابا،مظلوم بابا،بیکس بابا،عطشان بابا
هارداسان،نازلی رقیّه‌ون جانوه قربان بابا
..
..
..
..
..
ضربت آخرده آخدی اشک حسرت دامنه
مقتله گلدی قولی پهلوسی سینمیش بیر ننه
سسلدی باشون قالوب اللرده اوغلوم وای منه
کور اولیدیم کاش گورمیدیم سنی بو حالیده
اون ایکی ضربتله ذبح اولدی باشون گودالیده
..
..
..
..
..
سن هارا مقتل هارا، ای شاه مظلومان بالا
داشلار آلتیندا قالوب باشسیز جنازون جان بالا
بو داغیلمیش نعشوه زهرا ننون قربان بالا
قلبیمی هئچ غم بو غم تک بؤلمیوب بؤلمز حسین
هئچ ئولن سن تک بو دنیاده غریب ئولمز حسین