زبدةالاشعار

غملنیب دور کون امکان آغلیور #حیدریه_هدایت_تبریزی

شهادت حضرت علی (ع)
.
.
هدایت تبریزی
.
.
غملنیب دور کون امکان آغلیور
اولموش عشق اهلی پریشان آغلیور
.
بستر مرگه دوشوب شیر خدا
زینبین اشکی اولوب قان ، آغلیور
.
باشه قرآن آلماقا یوخ طاقتی
ناطق قرآنه قرآن آغلیور
.
حالینی سویلور سارالمش صورتی
غرق ماتم جمله یاران آغلیور
.
وای بابا وای صوتی عرشه اوج ائدیب
اهل بیتی دلده افغان آغلیور
.
شمع سوزان تک گئدیر خاموش اولا
پر ورور پروانه سوزان آغلیور
.
دردینه درمان اطبّا پاپمادی
دکتر عاجز قالدی درمان آغلیور
.
مرتضائیله عدالت ده ئولور
عدل دن آد قالدی ، میزان آغلیور
.
اوج ائدنده ناله منزل دن گویه
سس چکیر چولده محبّان آغلیور
.
آلمش ایتام اللره سود کاسه سی
بیوه لر سردر گریبان آغلیور
.
بعضی لر گلدی عیادت ایلیه
گودولر گوز توکدو باران آغلیور
.
مرتضانین صورت زردین گوروب
میزبانه غملی مهمان آغلیور
.
دای مناجات علی دن یوخ خبر
کوفه نخلستانی هر آن آغلیور
.
گلموری مولایه یا مولا سسی
دل پریشان اهل ایمان آغلیور
.
مسجد و محراب و منبر غملی دور
شرم دن محراب اودور قان آغلیور
.
جبرئیلین نوحه سی غوغا ائدیر
انس و جنّ و حور و غلمان آغلیور
.
بوینو چگنینده قالیب اولادنین
گوزلری گریاندی طفلان آغلیور
.
دؤنماقا صاق و سولا یوخ طاقتی
درد آغردی ، انجیور جان آغلیور
.
ایستیوب بیر بیر وصایاسین ائده
جانشین چون ابر نیسان آغلیور
.
باشنه دؤندوقجا پروانه کیمی
غملی اولادی هراسان آغلیور
.
( درد دل باشه یئتشدی آرتدی درد)
(تر دوزولدی آلنا ئولدی شیر مرد )
.
گوزلرین یومدی ولیّ کردگار
روحی اوچدی باشه یئتدی انتظار
.
وئردی لر طبق وصیّت غسلونی
کفن ائدوب لر اولدی تابوته سوار
.
نصف شب گیزلنجه چخدی پیکری
دفن اولا تا ، شهردن اولدی کنار
.
شهریارین بیر باخین تشییعنه
بیر بئله تشییعی گورموب روزگار
.
پشت تابوتی دوتوب اوغلان لاری
پیش تابوتی گئدور اعجاز وار
.
چاتدیلار گریان نجف صحراسنه
ائتدیلر بیر قدری تپراقی کنار
.
گوردولر بیر قبر آماده ، و لیک
قبرده بیر لوحه اولموش استتار
.
گوردولر نوح نبی دن دی ، یازئب
مرتضایه حفر اولوبدور بو مزار
.
قویدولار قبره او یورقون پیکری
توکدولر گوزیاشلارین بی اختیار
.
تاپدی ارزش وادی ملک نجف
کسب قیلدی مرتضادن اعتبار
.
قویدولار قبره قرار عالمی
اوزلری اولدی ولی دل بی قرار
.
اوستونه تپراق توکه گلمور ئورک
بو فنا دنیا اولیدی تار و مار
.
بعضی سی تپراق سپردی باشنه
آغلیاردی ایلیردی آه و زار
.
تپراق اولسون باشینه بو عالمین
وار یئری عالم اولیدی خاکسار
.
بو علی دور ، جان عالم ، رکن دین
بو علی دور ملک دینه شهریار
.
بو علی دور عدلینه قربان اولوب
بو علی دور معدلت ده شاهکار
.
بو علی اؤز قاتلین اینجتمیب
ایلیوبدور دشمنین ده شرمسار
.
ساقی کوثردی بوردا دفن اولوب
مرشد اعظم دی کونه افتخار
.
بو امیرالمؤمنین دی ای تراب
سنده دفن اولدی بو درّ شاهوار
.
فخر عالم سنده یاتدی فخر ائله
قبرین ائتمه اهل جوره آشکار
.
لیل قدرین قدرینه یارب قسم
دوت الین اولسون ( هدایت ) رستگار
.
.
#حیدریه #هدایت_تبریزی #حیدریه_شهادت #ترکی #زبدةالاشعار

متن پیشنهادی:  گلور سرشک عزادیده خلایقدن #صادقیه_رمضانی_خاکی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی